السيره النبويه العطره 55

 

#السيرة_النبوية ❤️

👈سرايا رسول الله تنطلق بعد "غزوه الخندق" 💪

👈رحمه النبي ﷺ بالاسري والصحابه ❤️ ❤️

👈حكايه زواج النبي ﷺ من السيده زينب بنت جحش 👌

💢لا إله الا الله وحده.. أنجز وعده.. ونصر عبده..

وهزم الأحزاب وحده 💪🤗❤️

وقال النبي ﷺ : "اليوم نغزوهم و لا يغزوننا" 👌

أصل الأحزاب اللي كانوا محاصرين المسلمين كانوا لازم يتأدبوا .. دول اتفقوا مع بنى قريظة اللى جوه المدينة و اقنعوهم يغدروا و ينقضوا العهد مع رسول الله ﷺ ..

يعني مش بس جايين يحاربوا النبى ﷺ ..

لأ دول بيدبروا خطط لضياع أمن و إستقرار المسلمين. 

فالقبائل دي محتاجة ردع عشان ميفكروش يتحدوا ضد النبى ﷺ و المسلمين تانى .. لأن غزوة الأحزاب كانت هتبقى حرب خطيرة .. لأنها إتحاد لكل القبائل ✋

بس الحمدلله.. ربنا بكرمه نصر المسلمين .. فالأحزاب محتاجة ردع .. و إلا هنلاقيهم بعد أسابيع هاجمين على المدينة من تانى ...

يبدأ النبي ﷺ يبعت سرايا للقبائل اللي غدرت بالمسلمين .. و كمان هيبعت سرايا للقبيلة اللى غدرت و قتلت السبعين صحابى اللى كانوا من القراء للقرآن (فاكرين 😔).

دلوقتى هيقدر النبى ﷺ يجيب حقهم ..

أصل دم المسلم غالي أوي 👌،

هتعمل إيه يا رسول الله؟🤔

هيبعت سرية ( مش جيش ، لأنها مش غزوة..الغزوة بيطلع فيها النبى ﷺ .. أما السرية دى بيطلع فيها الصحابة ) ..

فهيبعت سرية بقيادة محمد ابن مسلمة .. للقبائل اللى شاركت فى دبح السبعين صحابى غدرآ .. فيوصل محمد ابن مسلمة لقبيلة نجد و ينتصر و يأسر قائد القبيلة ..

و جنبها قبيلة بني حنيفة و دى ناحية اليمامة فينتصر المسلمين و يتأسر قائد اليمامة "ثمامة ابن أثال" و يوصلوا بيه للمدينة ، و يتربط على سارية (عمود) عند المسجد النبوي .. 

أصل لما يبقى مربوط قدام المسجد .. ده هيخليه يتفرج على الصلاة و يسمع خطبة الجمعة و يسمع الدروس و يسمع المواعظ و يسمع صوت النبي ﷺ في القرآن في الصلاة .. الصحابة بيقولوا والله ما سمعنا لا أحلى و لا أطيب و لا أندى صوتآ في القرآن من صوت رسول الله ﷺ

( إن شاء الله نسمع صوته ﷺ في الجنة ❤️❤️) ..

المهم "ثمامة" مربوط .. و كل يوم يعدي النبي ﷺ من قدامه و يقول له سلام عليك يا "ثمامة" .. كيف حالك ؟ ..

فيقول له : كويس .. فيمشي النبي ﷺ .. فينادى ثمامة و يقول : يا محمد .. ويرد عليه النبي ﷺ و يقول له : لبيك 

(طب ده أسير يا رسول الله ﷺ .. بتتكلم معاه كده ؟!! ايوه .. عشان أنا مش هدفي إنى أهينه !!🤚) 

فقال "ثمامة" أنى جائع ، رغم إن الصحابة أكلوه ..

فقال النبى ﷺ : حسنآ .. تخيلوا النبى ﷺ هيعمل إيه .. ( هيقول حد يا جماعه يديله أي أكل ، انا مش فاضى ؟ ) ..

 لأ .. النبى ﷺ هيروح بنفسه و يرجع بيته يحضر قصعة من الطعام و يروح يحطها بين إيدين "ثمامة بن أثال" ..

و يقول للصحابة فكوه عشان يعرف ياكل براحته لحد ما يخلص أكل (ياحبيبي يارسول الله ❤️) ..

و تانى يوم النبي ﷺ معدي ، فينادى عليه "ثمامة" و يقول : يا محمد ، فيرجع له و يقول : نعم يا ثمامة ؟

فيقول "ثمامة" : عطشان ..

فالنبي ﷺ يروح يجيبله مايه.. فيبدأ ثمامة قلبه يتغير .. فبعدها بيوم يعدي النبي ﷺ .. فالنبي ﷺ عايز يعرف "ثمامة" قلبه حصل له إيه .. فيقول له : ما عندك يا ثمامة ؟

فقال "ثمامة" : نعم .. أعف عن شاكر و إن تقتل تقتل ذي دم ( لو عفيت عني هفضل أشكرك و مش هنسهالك الجميل ده و لو هتقتلني هتبقى معذور ، أنا في إيديا دم أصحابك و شاركت في قتلهم )

فالنبى ﷺ يسيبه و يمشى عشان النبى ﷺ مش عايز يقتله .. لكن عايزه يسلم ..

طيب ممكن حد يسأل : هو مش المفروض إنهم يقتلوه عشان القصاص ؟🤔 

بصوا خلي بالكم إن ثمامة مش هو لوحده اللي قتل ده اولآ .. ثانيآ ده سيد القبيلة فالنبى ﷺ مخير بين أمرين ، يا إما أقتله و آخد القصاص و ده من حقي .. يا إما لو أسلم هتسلم القبيلة بتاعته كلها معاه .. فأنهى اختيار فيهم فيه الخير الأكبر ؟

النبى ﷺ رحمة الله للعالمين هيشوف ان من الحكمة إنه هيختار إن يسيبه يسلم .. فيعدى النبى ﷺ عليه تاني ، و يقول له ما عندك يا ثمامة ؟ 

فقال : نعم .. إن تقتل تقتل ذي دم و إن تعفو فأعف عن شاكر .. و ثالث يوم يكرر ثمامة نفس الحاجة..

فقال النبي ﷺ : حلوا وثاقه ( فكوه ) .. فيتحل "ثمامة" ..

كان فيه نهر ورا المسجد ، عارفين "ثمامة" عمل إيه ؟

جري على النهر اللي ورا المسجد وأخذ جردل و بقى يكب على رأسه المايه.. هو بيعمل إيه ؟

ثمامة بيغتسل عاوز يتطهر من نجس الكفر .. و يملي الجردل و يكب و يملي و يكب لحد ما اغتسل تماما و رجع للنبي ﷺ .. و قال : يا رسول الله أشهد أنه لا إله إلا الله و أنك رسول الله 🤗❤️ ..أصل المعاملة دي مش ممكن تكون غير من نبي ، الأخلاق دي مش ممكن تكون غير من دين إختاره رب العالمين سبحانه و تعالى ..

بس أحيانا بتقتضي الحكمة ، إن لازم قصاص ، ذي بني قريظة .. بس برده مننساش إن النبى ﷺ عرض عليهم الإسلام الاول .. لكن رفضوا .. و لما قرر يحكم عليهم .. رفضوا حكمه برده .. و طلبوا أن اللى يحكم سعد بن معاذ .. يعنى لو كانوا أختاروا حكم النبى ﷺ كان ممكن يختار حكم أرحم .. فده يدل إن الأصل في الإسلام إنى أدعوك عشان تدخل الجنة ..❤️صلى الله عليك ياحبيبي يارسول الله ❤️ 

❤️❤️❤️❤️❤️صلوا على النبى ❤️❤️❤️❤️❤️

 💢بصوا بقى "ثمامة" هيعمل إيه بعد اسلامه ..

قال : يا رسول الله نفسي أروح أعمل عمرة ، أتأذن لي ؟

فأذن له النبى ﷺ .. أتاريه كان في نيته حاجة تانية

وصل "ثمامة" مكة و دخل الحرم ، و طاف و عمل عمرة ، و بعدين وقف يكلم قريش .. أصل قوم ثمامة " بنى حنيفه " بينهم و بين قريش اقتصاد ، فلوس ، و تجارة .. فقبيلته هي اللي بتورد ( الحبوب / القمح ) لقريش .. و قريش بتشتريه من هناك ... فكده قريش روحها في أيديهم .. 

المهم هيقف" ثمامة" و يقول لهم : يا معشر قريش ، أتأذون رسول الله ؟ فقالوا : ما بك يا ثمامة ( هما مستغربين كلامه أوى .. مش فاهمين هيقول إيه )

فقال "ثمامة" : و الله لا تأتيكم من بلادى حبة من حبها حتي يأذن فيها رسول الله .. فقريش أتجننت .. مش مصدقة اللى بتسمعه ، فيرجع بلده و يمنع التجارة لقريش ..

و تبدأ قريش تعانى .. مفيش أكل لمدة شهر ، و التانى و التالت .. بقت مجاعة .. طيب هيعملوا إيه ؟

هيستنجدوا .. طب بمين ؟ بسيدنا النبي ﷺ ❤️🤗

إنجدنا.. إنقذنا يا محمد !! و يقولوه له يا محمد أنقذ قومك .. ( دلوقتى بقيتوا قومه .. طب و الحصار اللى استمر شهرين للنبى ﷺ و المسلمين فى غزوة الأحزاب !! ) ..

المهم بعتوا و قالوا : أنقذ قومك يا محمد قد أحلت بهم المجاعة و أمر صاحبك فليخلي بيننا و بين الحنطة ( يعنى الحبوب ) .. فالنبي ﷺ هيعمل إيه ؟🤔

ياترى هيذلهم ؟ ماهم خلاص روحهم فى إيده ؟

لا والله مش هيعمل كده ﷺ .. ده بسرعة هيبعت لثمامة

جواب و يقول له : يا ثمامة خلي بين قومي و بين جارتهم.. (و يسميهم قومه .. يااا بتعمل كده رغم كل اللى عملوه فيك يا رسول الله )..

فثمامة يقول إيه ؟ ..سمعآ و طاعة يا رسول الله ، فيفتح التجارة تاني و تنتهى المجاعة فى قريش ..

(شوفتوا يا جماعة أخلاقه ﷺ ياحبيبي يارسول الله ❤️) 

💢و يبعت النبى ﷺ سرية تانية ، عشان يأدب قبيلة تانية بعد ما غدرت بيه ، سرية إلى سيف البحر و دى منطقة ساحلية ، و يطلع فيها سيدنا أبو عبيده بن الجراح ..

و محصلش فيها أحداث كتير .. بس المسافة ليها كانت طويلة ، فالأكل اللي مع السرية خلص و مبقاش معاهم غير تمر .. و من كتر الجوع بيحكى الصحابة.. 

و بيقولوا : كان أحدنا يأخذ التمرة فيمصها كما يمصها الصبي ثم يخرجها من فمه و يشرب عليها الماء ..

بس إشتد بالسرية الجوع .. لكن المنطقة ساحلية زى ما قلنا ، و همه ماشيين لاقوا سمكة عنبر إترمت على الشط ..

فبيقول الصحابة : فقلنا نأكل ( طبعا مكنتش لسه نزلت آية بتقول إن ميتة البحر حلال ، لحد الوقت ده كانوا فاكرين إن ميتة البحر حرام لأن ربنا قال : { حُرِّمَتْ عَلَيْكُمُ الْمَيْتَةُ وَالدَّمُ وَلَحْمُ الْخِنزِير }ِ [ المائدة -3]

فالسمكة دي طالعة من البحر ميتة ، فقالوا : ميتة .. لا تأكلوها .. فقال أبو عبيدة : ميتة !!

فقالوا : و لكننا سنموت من الجوع ..

فبدأوا يشوفوا إنهم كده في حكم المضطرين .. فأخدوا السمكة و شووها و كلوا منها حتتين عشان يسدوا جوعهم و بعد كده خافوا يكملوا ..و زعلوا أوى إنهم أكلوا ..

فخدوا بقيت السمكة معاهم إلى النبي ﷺ.. فيبدأ أبو عبيدة يحكى للنبى ﷺ اللى حصل . فتنزل إكراما ليهم الآية دى ، قال تعالى : { أُحِلَّ لَكُمْ صَيْدُ الْبَحْرِ وَطَعَامُهُ مَتَاعاً لَكُمْ وَلِلسَّيَّارَةِ وَحُرِّمَ عَلَيْكُمْ صَيْدُ الْبَرِّ مَا دُمْتُمْ حُرُماً وَاتَّقُوا اللَّهَ الَّذِي إِلَيْهِ تُحْشَرُونَ } [المائدة:96] .. ففرحوا جداً 🤗❤️

💢بس أبو عبيدة و الصحابة كانوا برده مضايقين لأنهم عملوا حاجه مش مألوفة 😔..

فالنبى ﷺ عشان يطمنهم قالهم : أمعكم منه شئ ؟

فقالوا : نعم ..

فأكل النبى ﷺ حتة منها عشان يأكد لهم إنها مش حرام و يستريحوا .. ودي من أعظم طرق التعليم عند النبي ﷺ ..

💢 زواج النبي ﷺ من السيده زينب بنت جحش ..

العرب زمان كان التبني منتشر ، فالنبي ﷺ متبني "زيد بن محمد" اللى اصلا اسمه كان "زيد بن حارثة" بس النبى ﷺ كان مسميه على إسمه ..

فلما نزل تحريم التبني ، قال تعالى : { ادْعُوهُمْ لِآبَائِهِمْ هُوَ أَقْسَطُ عِنْدَ اللَّهِ } [سوره الأحزاب -5]

فرجع سيدنا زيد لأسمه الحقيقى " زيد بن حارثة " .. 

فبكده خلاص مبقاش ابن النبى ﷺ .. بس بردوا العرب و الصحابة كانوا لسه شايفين إن زيد ابن النبى ﷺ ،

فربنا عز وجل علشان يبطلوا العادة دي و ميخلطوش الأمور قال للنبي ﷺ فى القرآن الكريم :

{ فَلَمَّا قَضَىٰ زَيْدٌ مِّنْهَا وَطَرًا زَوَّجْنَاكَهَا لِكَيْ لَا يَكُونَ عَلَى الْمُؤْمِنِينَ حَرَجٌ فِي أَزْوَاجِ أَدْعِيَائِهِمْ إِذَا قَضَوْا مِنْهُنَّ وَطَرًا ۚ وَكَانَ أَمْرُ اللَّهِ مَفْعُولًا } [سورة الأحزاب -37] ..

فالنبي ﷺ ربنا أمره أنه يتجوز السيده زينب ليثبت للصحابة إن دي مش زوجه ابني ، لو زوجه ابني مكنتش اتجوزتها ..

زيد مش ابني ✋✋ ..

فلما تزوج من السيده زينب خلاص كده ثبت عند العرب إن فعلا ابنى بالتبنى مبقاش ابنى بعد تحريم التبنى و الدليل إنى أقدر أتزوج مراته👌

👈فأنك تعرف إن النبى ﷺ فى حاجات بيعملها عشان بس يعلمنا .. مش عشان له رغبه فيها .. دي تحل بعض الشبهات في الأحاديث و بالذات في صحيح البخاري ،إن ممكن يعدي عليك حديث ، فتقول ليه النبي ﷺ عمل الحاجة الفلانية دى ؟!

فخلي دايما عندك الإحتمال بإنه ﷺ بيكون مضطر يعمل حاجات عشان يثبّت حكم معين و شايف إنه تقيل على الصحابة ، فبيعمله عمليآ عشان يأكد ﷺ لهم إن ده مش حرام وصلي اللهم وبارك عليك ياسيدي يارسول الله ❤️..

نكمل بكرة إن شاء الله ❤

#كن_محمديا