السيره النبويه العطره 53

 

#السيره_النبويه ❤️

👈شجاعه السيده صفيه عمه النبي ﷺ 💪❤️

👈بطوله سيدنا علي في التصدي لفارس الأحزاب 💪

👈فكره عبقريه من الصحابي "نعيم" قلبت الموازين 🤗

👈دعوه النبي ﷺ على جيوش الاحزاب ونزول المدد 🤗

💢يهود بنى قريظة فى جنوب المدينة نقضوا العهد مع رسول الله ﷺ و غدروا ، بنى قريظة بدأوا إنهم يخططوا للهجوم على حصن نساء و اطفال المسلمين 😱 ..

و المعروف إن اليهودى جبان حتى لو ظهرت من بره عليه الشجاعة , ربنا قال عليهم : { لَا يُقَاتِلُونَكُمْ جَمِيعًا إِلَّا فِي قُرًى مُّحَصَّنَةٍ أَوْ مِن وَرَاءِ جُدُرٍ ۚ بَأْسُهُم بَيْنَهُمْ شَدِيدٌ ۚ تَحْسَبُهُمْ جَمِيعًا وَقُلُوبُهُمْ شَتَّىٰ ۚ ذَٰلِكَ بِأَنَّهُمْ قَوْمٌ لَّا يَعْقِلُونَ } ..

فأرسل كعب بن أسد , جندى من عنده يتفقد حصن النساء , يشوفوا عليه حراسة و لا أيه عشان يهجموا ✋

اللى حصل بالظبط , إن الجندى راح معسكر النساء يتفقد المكان , ومكنش على الحصن أى راجل يحميه , شافت السيده صفية عمة النبى ﷺ إن الجندى اليهودى بيلف حوالين الحصن فضربته بالقوس , وراحت قطعت راسه و رمتها ناحيه اليهود عشان يكون ردع ليهم.. 

 (شايفين دور النساء 💪🤗❤️)

طيب ممكن حد فيكو يشوف الموقف شديد ..

بس لازم تعرفوا إن لولا الحركه دى كان زمان يهود بنى قريظة هجمت على النساء واستباحوا أعراضهم وقتلوا الأطفال , فصفية أنقذت نساء المسلمين كلهم ✋

و فعلا بنى قريظة مش هيهاجموا حصن النساء تانى .. والصحابة مش هيوصل لهم الأحداث اللى حصلت من بنى قريظة طول مواجهتهم لجيش الأحزاب عند الخندق ..

💢حصل موقف بعد كده ,

سيدنا سعد بن معاذ كان واقف عند الخندق ففوجىء بسهم فى كتفه جى من الضفة التانية , فنزف سعد دم كتيير , وقال دعاء حلو أوى , طلب من ربنا إن يارب لو دى كانت آخر حرب بين رسول الله وقريش فأقبضنى إليك شهيد ,لكن لو فيه حروب تانية فأنا أحب أن أحارب و أدافع عن رسول الله , و يارب لا تمتنى حتى تشفى قلبي من بنى قريظة 🤲

و بعد ما خلص سيدنا سعد الدعاء و كل ده و هو عمال ينزف تخيلوا يحصل إيه ؟🤔

إلتئمت الجراح , والنزيف وقف تماما , سبحان الله ❤️

💢دلوقتى المسلمين عند الخندق و حصار الأحزاب للمسلمين قعد مدة طويلة , وبدأت تحصل محاولات تعدى على المسلمين ، فنزل مقاتل من الكفار اسمه عمرو بن عبد ود .. وده من أقوى و أعرق جنود قريش فكان لا يُهزم أبدا ً, فوقف عند الخندق ورفع سيفه و جى ولابس الدرع بتاعه و بدأ يكلم المسلمين و يقول : هل من مبارز ؟؟ 

مين بقى من المسلمين هيتجنن و يبارز عمرو ؟🤔

سيدنا على بن أبى طالب 🤗

و النبى ﷺ جنبه بيقول له لا تذهب يا على ..

أصل النبى ﷺ عارف ان عمرو قوى و خايف على علي .. فعمرو بن ود فضل ينادى .. هل من مبارز ؟✋

و راح قايل بيت شعر قوى عشان يستفز المسلمين : 

ولقد بححت من النداء ... لجمعهم هل من مبـارز

ووقفت إذ جبن المشجع ... موقف القرن المنـاجز 

ولذاك إني لـــم أزل ... متسرعا قبل الهـزاهز 

إن الشجاعـة في الفتى ... والجود من خير الغرائز ..

فسيدنا علي هيتجنن فبدأ يستأذن النبى ﷺ ..

أرجوك يا رسول الله أرجوك , فسمح له النبى ﷺ 😊

وقال له : انزل يا علىَّ .. فنزل على بن أبى طالب , و فضل النبى ﷺ يدعي له و يقول : " اللهم احفظ على َّ 🤲"❤️

سيدنا علي و هو رايح عشان يحارب عمرو بن عبد ود ألف بيت شعر جميل اوى يرد بيه على شعر عمرو : 

لا تعجلن فقد أتـاك ... مجيب صوتك غير عاجز 

في نية وبصيــرة ... والصدق منجي كل فائز 

إني لأرجو أن أقيم ... عليك نائحة الجنــائز 

من ضربة نجـلاء ... يبقى ذكرها عند الهزاهز ..

فيقف عمرو بن عبد ود , و هو مبهور و مستغرب مين الشاب ده , فسأله من أنت يا بنى ؟ 🤔

فرد : علىَّ بن أبى طالب ,

فعمرو أتفاجىء وقال : ابن أبي طالب .. !!

يا بنى كان أباك صاحبى أرجع فإنى لا أحب أن اقتلك ..

فرد عليه على بن أبى طالب و قال : عجيب , مع إنى أحب أن أقتلك ..(ياحبيبي ياسيدنا على 🤗❤️)

وبدأ على بن أبى طالب يضرب حصان عمرو عشان يستفزه و أبتدت المبارزة وأرتفع التراب و الغبار و محدش بقى شايف أى حاجة , والرسول بقى قلقان وواقف يدعى , وفجأة هبط التراب وبدء السكون , وسمع النبى ﷺ صوت بيظهر و بيعلى و بيقول الله أكبر , ففرح النبى ﷺ وقال الله أكبر وشاف علىَّ واقف وحاطط رجله على بطن عمرو بن عبد ود .. 

وجرت العادة إن المنتصر يأخذ درع المهزوم , فوطى علي بن أبى طالب عشان يأخذ الدرع .. و لسه بيشده , فإنكشفت عورة عمرو بن عبد ود , فأضايق سيدنا على َّ, وخبى عينه وساب الدرع عشان يغطى عورة عمرو بن عبد ود ..

علشان كده أتلقب ب "كرم الله وجهه". 

( شايفين أخلاق المسلم .. أخلاق صحابة رسول الله .. دى قمة الإنسانية من سيدنا على َّ, اه عدوه كافر لكنه إنسان ) ..

💢طيب وصل لقبيلة عمرو بن عبد ود خبر موته فبعتوا للنبى ﷺ طلب , أنه أرجوك يا محمد لا تمثل بجثة عمرو بن ود , وهنشترى جثته ب ١٠٠٠٠ درهم ..

طبعاً دى فرصة للمسلمين , لكن رفض النبى ﷺ وقال : هو لكم بغير ثمن ( شايفين النبى ﷺ عزيز أوى والمسلمين كمان أزاى ❤️ بأبي انت وامي يارسول الله ❤️ ) ..

💢الحصار مدته طولت والمسلمين تعبوا أوى , بس ربنا هيبعت لهم هدية .. إيه الهدية دى ؟🤔

إسلام واحد من جيش الاحزاب اسمه " نُعيم بن مسعود " من قبيلة أشجع , فيعدى نُعيم الضفة التانية و يروح لرسول الله و يقول له : يا رسول الله جئتك مسلما ً, أشهد أن لا اله الا الله , أشهد أنك رسول الله , ولكن يا رسول الله قومى لا يعرفون إنى أسلمت , فأطلب منى ماشئت 🤗❤️.. 

❤️❤️❤️❤️❤️صلوا على النبى ❤️❤️❤️❤️❤️

💢يفرح النبى ﷺ جدا لاسلام "نعيم بن مسعود" و يقول له : " يا نعيم إنما أنت رجل فينا ( زدت علينا فرد ) و إن الحرب خدعة فخذل عنا يا نعيم إن أستطعت "

فقال نعيم : سأفعل يا رسول الله .. و يخرج نعيم من عند النبى ﷺ و يبدأ يفكر فى فكرة ..

و هيعمل خطة من أروع ما يكون ..👌 🤗

هيروح نعيم دلوقتى لبنى قريظة فى جنوب المدينة و يقول لهم : يا بني قريظة تعلمون حبي لكم ،

فقالوا : نعم أنت عندنا لست بمتهم ..

فقال : أتشكون في نصحي لكم ..

فقالوا : لا أبدآ..

فقال نعيم : يا بنى قريظة إنى أخشى عليكم ..

يا بني قريظة ألا تعلمون أن قريش قد تمل الحصار ..

فكيف بكم إذا نفذ منهم الزاد و الطعام و ملت قريش الحصار و رجعت إلى مكة و تركتكم لمحمد !!؟

فأنظروا حينها ماذا سيفعل بكم بعد أن غدرتم به ..

فقالوا : يقتلنا شر قتله!! ،

فرد نعيم و قال : نعم لو ظفر بكم محمد ما ترككم و قتلكم شر قتله فقالوا : أصبت يا نعيم ،، و ما ترى ؟ 🤔

فقال نعيم : أرى أنكم تذهبوا ﻷبو سفيان و تقولوا له أن بكم أمرآ في الجنود و أنكم فى حاجة إلى زيادة الجنود و أطلبوا من أبى سفيان خمسين قرشى من الفرسان الماهرين ..

فيا بنى قريظة إن قبل أبو سفيان و أعطاكم من جنوده فأعلموا حينها و اطمئنوا أن ليس لقريش أى نية لترك الحرب و إن امتنع عنكم إذن فهو ينوى كف القتال و سيترككم لمحمد ..🤗

و يمشى نعيم و بنى قريظة مقتنعة جدآ بكلامه و يعدى الضفة التانية من الخندق و يدخل على جيش الأحزاب و يروح لأبو سفيان و أعوانه و يقول : أتعلمون حبي لكم ...

قالوا : نعم أنت عندنا لست بمتهم ..

فقال : أتشكون في وفائي لكم ..

فقالوا : لا ابدآ ..

فقال نعيم : إني سمعت أن بني قريظة قد اصطلحوا مع محمد و سألوه الود و طلبوا منه أن يعفو عنهم فأمتنع ،

فقالت بنى قريظة أرأيت يا محمد إن آتيناك بخمسين رجلا من قريش تضرب أعناقهم .. أحينها تعفو عنا✋

فقال محمد : نعم أعفو عنكم ..

و يكمل نعيم و يقول : يا أبا سفيان إن طلبت منك بنو قريظة خمسين رجلا فلا تعطهم ..

فقال أبو سفيان : نعم سأفعل يا نعيم 👌 ..

و فعلا هتنجح الخطة هيطلب كعب ابن أسد قائد بنى قريظة من أبو سفيان خمسين فارس زى ما نعيم قال لهم ..

و أول ما يعرف أبو سفيان الطلب ده هيتأكد إن كلام نعيم كان صح بإن بنى قريظة عايزة الفرسان عشان تقتلهم لإرضاء محمد 👌 ..

فيقول أبو سفيان : والله يا بنى قريظة لن نعطيكم جندى واحد .. وفهم أبو سفيان صدق نعيم بن مسعود ..

و بكده أتأكدت بنى قريظة إن بردوا صدق نعيم ..

و تنجح الخطة و بكده أتكسر جيش التحالف بين بنى قريظة مع قريش و كان ده أول النصر للمسلمين ..

(فكره خطيره من الصحابي الجليل رضي الله عنه ❤️👌) 

💢الصحابة تعبانين أوى فيروحوا للنبي ﷺ

و يقولوا : يا رسول الله " هل من دعاء نقوله " ..

فقال النبى ﷺ : قولوا " اللهم استر عوراتنا وآمن روعاتنا"

و فضل الصحابة يرددوا الدعاء ده 🤲❤️

ووقف النبى ﷺ يدعى و يقول : " اللهم يا مجرى السحاب يا منزل الكتاب ، اهزم الأحزاب ، أهزمهم و زلزلهم "

و فضل النبى ﷺ يدعى و يدعى و يبكي 🥺

و ينتهى النبى ﷺ من الدعاء فيجى فتح ربنا عزوجل ..

أرسل الله تعالى ريح قوية ✋، قال تعالى :

{ يَا أَيُّهَا الَّذِينَ آمَنُوا اذْكُرُوا نِعْمَةَ اللَّهِ عَلَيْكُمْ إِذْ جَاءَتْكُمْ جُنُودٌ فَأَرْسَلْنَا عَلَيْهِمْ رِيحًا وَجُنُودًا لَّمْ تَرَوْهَا }(سورة الأحزاب 9) ..

الريح كانت قاسية جدا أقتلعت خيام المشركين و أطفأت النيران .. فالمشركين أصابهم الرعب و بدأوا يجروا في كل مكان .. أما معسكر المسلمين لم تصبهم الريح و لكن أصابهم برد شديد و بقى رسول الله ﷺ عايز يعرف إيه اللى بيحصل على جبهة المشركين و كان الصحابة من شدة البرد عندهم رعشة و بقوا يحفروا و يدفنوا جسمهم جوه الرمال عشان يدفوا ..

فبص لهم النبى ﷺ و قال : " أيها الناس من منكم يذهب و يأتي بخبر القوم "... فمحدش رد.. أصل الجو برد جدااا ..

و يكرر النبى ﷺ الكلام تانى : و برده محدش رد ..

فيكرر النبى الكلام تالت مرة و يزود عليه جملة جميلة جدا

نكمل بكرة إن شاء الله ❤ 

#كن_محمديا