السيره النبويه العطره 46

 

#السيرة_النبوية ❤️

👈موقف رائع للنبي ﷺ مع عبد الرحمن بن عوف ❤️

👈قصه جميله مع ناقه النبي ﷺ في أحد السرايا ❤️

👈"رؤيه" النبي ﷺ انه رايح يعتمر مع الصحابه 🤗❤️ 

💢نكمل سوا السرايا اللي خرجت لصد العدوان على المسلمين... ومع سرية دومة الجندل بقيادة سيدنا عبد الرحمن بن عوف ، و حصل موقف لطيف إنه و هو طالع السرية دي كان طالع عمامته كانت مش مظبوطة شوية مش مهتم أوي بنفسه ، حرب بقى 🤗 .. 

فالنبي ﷺ قال له تعالى يا عبد الرحمن ، أرجع ✋

أصل النبي ﷺ بيحب الجمال .. و الإهتمام بالنفس ..

فقال ما هذا يا عبد الرحمن.. أجلس 😊

فأجلسه أمامه ، فقعد عبد الرحمن على ركبته قدام النبي ﷺ ، فوقف له النبي ﷺ و فك له العمامة.. و بدأ يعلمه إزاي يعتم بنفس الطريقة اللي هو شخصيا ﷺ بيعتم بيها 🤗.. 

على فكرة النبي ﷺ يا جماعة عمامته مش زي اللي بنشوفه دلوقتي .. أحنا بنشوف في التلفزيون الغطرة البيضا و دى عمر ما النبي ﷺ لبسها ولا العقال الأسود .. و حاجات كتير بيلبسوها الشيوخ و دي ماكنتش سنة النبي ﷺ .. مش حرام طبعا إنهم يلبسوها بس النبي ﷺ مكانش بيلبس كده ..

طب تعالوا نشوف عمامة النبى ﷺ 🤗❤️

👈أولا النبي ﷺ شعره ناعم جدآ فأي حاجة هيلبسها هتتزحلق .كان بيحط قطعة قماش مستديرة على رأسه ، و بتكون رأسه كلها متغطية ، و بعدين يجيب قماشة و يطبقها مستطيل كأنها شريطة طويلة ، و يجيبها من قدام من على جبينه و يلفها على رأسه مرة أو أتنين و يعقدها على ورا عقدة أو اتنين عشان متتفكش و تنزل باقى القماشة بين كتفيه ،يعني تبقى طويلة و واصلة كده بين كتافه ❤️

دي عمامة النبي ﷺ .. سهلة جداً .. هي كل حاجته سهلة عليه الصلاة والسلام ♡ ..

وكانت العمامة بتاعته ممكن يلبسها بيضا و ممكن سودا و المشهور عنه إنه كان بيلبسها أبيض ..❤️

بس لما كان بيلبس العمامة اللى لونها أسود .. الصحابة كانوا بيحبوا شكلها عليه اوى عشان هو أبيض و شعره أسود فكان بيزداد حسنا و جمالا ❤️ يوم ما هيدخل يفتح مكه بعد كده .. هيدخل و على رأسه عمامة سوداء ، دي كانت من علاماته يوم فتح مكة 🤗.

المهم قام النبي ﷺ لف العمامة لعبد الرحمن و قال له هكذا تعتم العمامة 🤗 وقال ﷺ له : يا عبد الرحمن أغزو في سبيل الله و لا تغدروا و لا تمثلوا و لا تحرقوا شجرآ ..👌 دى وصايا النبي ﷺ العظيمة الحربية ﷺ ❤️

💢لكن برضوا مع كل الردع ده فى كفار هجموا على المدينة ✋ راح واحد اسمه عيينة بن حصن بعدد من الجنود للمدينة و دخلوها بالليل و حرق بيت و قتل ذر بن أبي ذر الصحابي الجليل 😔 و أسر إمرأة من الأنصار و سرق الإبل من المدينة و سرق ناقة النبي ﷺ العضباء ..

تخيلوا كل ده حصل 😔 

المهم أتخض المسلمين من الهجوم ده و حاولوا يطلعوا ورا الجنود الكفار بس مقدروش يلحقوهم .. و الكفار كتفوا المرأه و حبسوها .. فالمرأه دى بتحكى و بتقول : كنت وحدى خائفة ، فجعلت أتحلل من القيد ، فتحللت ..

فتقول فانطلقت إلى النوق التي حولي ، فذهبت لأركب الاولى فوالله ما إن اقتربت منها حتى هاجت و ماجت و صاحت !!!

فتركتها كى لا يكشف أحد أمرى.. فذهبت للناقة الأخرى فهاجت فتركتها كى لا يستيقظ أحد و وصلت إلى العضباء ناقة النبي ﷺ ( دي مجرد ناقة بس شوفوا هتعمل إيه 😊) فبتقول فوالله فأناخت إلي حتى أركب عليها و ما أصدرت صوت 🤗❤️ فركبتها و دخلت على المدينة الحمد لله و ربنا نجاها و قابلت النبي ﷺ في نص الطريق هو و الجيش لما طارد المعتدين و رجعوا كلهم مع بعض 🤗 ..

من فرحة المرأة قامت ندرت و قالت : يارب لئن أنجيتني و وصلت إلى المدينة ، والله لأنحر هذه الناقة و أقسم لحمها على الفقراء ..

فلما وصلت المدينة، فتاني يوم راحت للنبي ﷺ ،

فقالت : يا رسول الله أذن لى بأخذ الناقة لذبحها ..

فقال لها : ولما تذبح ؟!

فقالت يا رسول الله لم أكن أعلم أنها ناقتك ، و قد أقسمت ( ندرت ) ﻷن نجانى الله أن أذبحها و أقسمها على الفقراء ..

عارفين النبى ﷺ قال لها ايه ؟🤔

قال : بئس ما جزيتها .. ( معقولة ده جزائها .. يعني تشيلك لحد هنا و تقومي دبحاها !! )

شوفوا حنيه النبي ﷺ مع الناقة ، صلى الله عليه وسلم ❤️. 

و بدأ يفهم المرأة و يقول : لا نذر في معصية الله و لا فيما لا تملكين 👌..

النذر في معصية الله زي لو واحد قال لو حصل كذا مش هكلم أخويا .. ده نذر في معصية الله و كفارة النذر زي كفارة اليمين و هى ( إطعام عشرة مساكين من أوسط ما تطعمون أهليكم أو كسوتهم أو تحرير رقبة .. فمن لم يجد فصيام ثلاثة أيام ) و النذر لازم يوفى إلا لو في معصية الله و لو نذر فى شئ مش ملكك ، فده مينفعش يتنفذ و لازم كفارة للنذر ...

💢أنتو عارفين برضوا كان عند النبى ﷺ ناقة اسمها القصواء .. القصواء دي كانت ناقة عجيبة أوى ..😁

كانت بتفهم النبى ﷺ ..عارفين لما النبي ﷺ مات ، أمتنعت القصواء عن الطعام و الشراب ، كان الصحابة بيحاولوا يأكلوها و يشربوها ، فحفرت حفرة في الأرض و دفنت رأسها فيها و ماتت حزنا على رسول الله ..

حتى الناقة بتحبه صلى الله عليه وسلم ❤️❤️ 

❤️❤️❤️❤️❤️صلوا على النبى ❤️❤️❤️❤️❤️

💢 دلوقتي وضع المدينة ممتاز ، المدينة آمنة داخليا و خارجيا . داخليا بأن مفيش يهود أو مفيش قبائل ضخمة .. بس لسه موجود فى المدينة اليهود المسالمين طبعا ..

اه اتحكم بالإعدام على اليهود الخونة لكن المسالمين محدش قرب منهم . و لما حصل جلاء أو طرد ليهود بني النضير ، بسبب غدرهم .. برده ده كان حكم على اللى غدروا بس ..و بني قينقاع .. برده أتحكم على اللي غدروا بس ..

أما باقي اليهود فضلوا موجودين .. و الدليل إن النبي ﷺ مات و درعه مرهون عند رجل يهودي👍

بس بعد كده في الآخر أمر النبي ﷺ بإجلاء اليهود تماما من المدينة و ده أمر من الله عز وجل مش بإختيار النبى ﷺ

بإن لا يبقى في المدينة دينان ✋

و النبي ﷺ حتى ملحقش ينفذه ..لأن النبي ﷺ قال على ده و هو بيموت فنفذه سيدنا أبو بكر الصديق و سيدنا عمر بن الخطاب ..

و ده كان لحكمة و الحمد لله ربنا حفظ مكة و المدينة من أي دين تاني و إلا كان أختلط على المسلمين دينهم .. فمكة و المدينة هم الحرمين ، مفيهمش كفار .. مفيهمش أي دين غير الإسلام .. و ده أمر الله عز و جل علينا ..

علشان كده تلاقي حتى الآن مكتوب يفط وانت داخل الحرمين انهم للمسلمين فقط ✋👌

💢طيب زي مقولنا ان المدينة آمنة داخليا وكمان خارجيا من العشرة آلاف بتوع الأحزاب .. فخلاص تم ردعهم ..

طب هتعمل إيه بقى دلوقتى يا رسول الله ؟🤔 

خلاص إرتاح بقى يا رسول الله و عيش و كل واشرب و نام

و اعبدوا ربنا و احفظوا القرآن و موتوا و خشوا الجنة..

طب ده صح ؟ لأ طبعا ده غلط و مينفعش ..

لأن لازم نشر الإسلام و نشر الدعوة ..طيب ليه ؟

عشانى و عشانك .. عشان الدين يوصل ليا و ليك عشان أقدر أفهم الحياة و أعيش و أعرف إن ربنا موجود فأدعيه .. و أعرف المنهج اللى فى صالحى اللى ربنا خالقنى عشان أختار إن أمشى عليه ..

هو ربنا بعث النبى ﷺ لأهل المدينة و مكة بس ؟

لأ طبعا.. ربنا بعثه رحمه للعالمين لكل الدنيا كافة 👌 ..

طيب يطلع النبي ﷺ يروح للقبائل المحيطة و يدعو إلى الله ؟ لأ .. مينفعش طبعاً

طب ليه ؟ 🤔 

لأن كل قبيلة من دول عملت تحالف مع قريش لأنها سيدة العرب .. فمفيش و لا قبيلة سامحة للنبي ﷺ أنه يكلمها نص كلمة ! طب ليه ؟🤔 

لأن لو قريش عرفت إن بقى فيه بين القبائل دى و بين النبى ﷺ إتصال هتنقض التحالف معاهم و تعزل القبائل دى و تقطع كل العلاقات الإقتصادية .. و القبائل تجوع .. و بكده يا جماعة قريش مكتفة النبي ﷺ و بقت هى العائق ✋

طيب النبى ﷺ كده قدامه حلين .. يا إما أطلع دلوقتي و أفتح مكة و أحارب ، و قريش تعبانة عالآخر فأكيد هنتصر .. يأما أحاول أوصل لمعاهدة سلام بيني و بين قريش ..

وهيختار النبى ﷺ الحل التانى ❤️🤚

النبى ﷺ هيشوف رؤية فى المنام 🤗🤗

و هى إنه هيلاقى نفسه لابس لبس الإحرام و رايح يعمل عمرة .. و بيقول لبيك اللهم لبيك ..

يا جماعة احنا دلوقتي فى سنة ٦ هجرية ، يعني النبي ﷺ بقاله ٦ سنين محروم من مكة .. فتخيلوا يحلم إنه بيعتمر 🤗 و فى الرؤيه بيشوف أن كل الصحابة وراه و بيلفوا حولين الكعبة .. فيصحى النبى ﷺ من النوم و يفهم الرسالة .. و زى ما احنا عارفين أن رؤيا الأنبياء حق 👌..

فيروح ﷺ يقول للصحابة " أيها الناس إني رأيت في المنام أني مرتحل للعمرة فارتحلوا "انتو متخيلين قلب الصحابة ؟ ياااا معقول هنطلع عمرة ؟! 😢🤗..

(يا جماعة ده اللي راح مننا الكعبة و عمل عمرة واحدة بيرجع منها و قلبه متعلق بيها هناك .. و تفتح التلفزيون و تتفرج و تقول يارب رجعني ... فما بالك بالصحابة اللي كانوا عايشين هناك ! فتخيل فرحتهم هتكون إزاى !)..

فالصحابة روحهم المعنوية مرتفعة جدآ .. فيبدأوا يقولوا لبيك اللهم لبيك .. و يبدأوا يجهزوا نفسهم للعمرة 😊..

و يحصل حاجة عجيبة جداً ، الصحابة هيلاقوا النبى ﷺ بياخد معاه خرفان ..فالصحابة مش فاهمين هو النبي ﷺ واخد معاه خرفان ليه ، إيه علاقة العمرة بالسلام مع مكة و ليه واخد خرفان 🤔 ..

قال تعالى : { وأَتِمُّوا الْحَجَّ وَالْعُمْرَةَ لِلَّهِ فَإِنْ أُحْصِرْتُمْ فَمَا اسْتَيْسَرَ مِنَ الْهَدْي } (البقره - 196)

يعني لو اتمنعتوا و مقدرتوش تعملوا عمرة فأدبحوا الهدى يعنى الخرفان . فالرسول ﷺ حاطط إحتمال أنهم يمنعوه ..

وكمان النبى ﷺ هيطلع من غير سلاح عشان يحط قريش فى موقف محرج لو حاولوا يقاوموهم لأنهم كده مسالمين ..

بس خدوا بالكوا الصحابة لحد دلوقتي مش فاهمين القصة دي و مش عارفين النبى ﷺ ناوى على ايه ، هما بس فرحانين جدا بالعمرة ♡

و انهم هيشوفوا بلدهم بعد هجرة ٦ سنين ..

💢و دلوقتى خرج الصحابة و بدأوا في التلبية ( لبيك اللهم لبيك .. لبيك لا شريك لك لبيك ) ماشين ماشين و في نص الطريق عرفت قريش إن المسلمين جايين على مكة 🤚

و اتخضوا جدآ و قالوا إن لو محمد جه على باب مكة مش هينفع مندخلهوش لأن ده هيدمر زعامتنا قدام القبائل

فالحل الوحيد إننا نمنع محمد من نص الطريق لمكة ..

طب هيعملوا إيه ؟ 🤔

نكمل بكرة إن شاء الله ❤

#كن_محمديا