السيره النبويه العطره 50

 

#السيرة_النبوية ❤️

👈 لحظات صعبه علي النبي ﷺ والسيده عائشه " حادثة الإفك " ونزول البراءه من فوق سبع سماوات 🤗❤️

💢شفنا النبى ﷺ و هو بيحاول يعمل رأى عام عشان يقدر يعاقب سلول المنافق ، و بدأ يسأل اكتر من حد عشان يضمن ان فى ناس مأيداه فى تبرئه السيده عائشه..والوحى بينزل على رسول الله بس مفيش شئ يخص موضوع عائشه و الازمه تستمر لمده شهر ✋ ..

طيب النبى ﷺ عمل رأى عام و هيقف دلوقتى على المنبر ويبدأ يواجه الناس بالآراء الى معاه ويحاول أنه يكسب الناس فى صفه و يقف النبى ﷺ على المنبر ويقول : أيها الناس إن هناك رجلاً بلغ أذاه الى أهل بيتى ووالله ما علمت عن عائشة إلا خيرا ( هو بنفسه بيبرأها فده أكبر دليل أنه مكنش مصدق الكلام ده).. ولقد ذكروا لى رجلاً من أصحابى (يقصد صفوان بن المعطل) وما علمت على صفوان الا خيراً (وكمان برأ صفوان ، يعنى النبى ﷺ مش مصدق أن هما الاتنين يعملوا كده وبرأهم الاتنين) ..

و يكمل النبى ﷺ كلامه و يقول : أيها الناس والله إن صفوان كان لا يدخل البيت الا معى ( بيقولهم كده علشان الكلام الى اتقال أن صفوان كان بييجى لعائشة البيت والنبى ﷺ مش موجود .. شوفتوا الموقف الصعب الى اتحط فيه النبى ﷺ اضطره انه يتكلم لحد تفاصيل صعبه ازاى !! بأبي انت وامي يارسول الله 😢 ) ...

فسيدنا سعد بن معاذ مش قادر يستحمل الكلام ده فقام وقال يا رسول الله فداك أبى وأمى وعِرضى إن كان هذا الرجل من الأوس (لأن سعد أوسى) مُرنى آتيك برأسه وإن كان من إخواننا من الخزرج فمرنى أفعل ما تشاء ..

( اصل المنافق بن سلول يبقى خزرجى ..فسعد نسب الأمر للنبى ﷺ .. عشان يبان ان سعد قتل بن سلول الخزرجى تنفيذ لأمر النبى ﷺ فبتالى مش هتحصل مشاكل بين الاوس و الخزرج ). 

فقام واحد تانى اسمه سيدنا سعد بن عُبادة ( وكان خزرجى بس هو هيحصل منه تصرف مش صح عشان خدته النعره القبيليه فهيقوم يرد على سعد بن معاذ و يقول : كذبت يا سعد بن معاذ ، فأنت لا تستطيع أن تقتل رجلاً منا فأنا سيد الخزرج .. فيقوم واحد تالت اسمه أُسيد بن حضير (صاحب سعد بن معاذ .. وكان أوسى برده)

فقال يا سعد بن عُبادة : كذبت أنت منافق تدافع عن منافق (أكيد يقصد ان مدام بتدافع عن سلول يبقى أنت اكيد زيه !) و كلمة من هنا و كلمه تانيه من هنا فقامت خناقه ..

فنظر اليهم النبى ﷺ ودمعت عيناه 🥺😔..

و راح قايل : أبدعوى الجاهلية وأنا بين أظهركم ؟ (هترجعوا للجاهلية وانا فى وسطكم) ✋✋

اسكتوا اسكتوا ما لهذا جئت.. ما لهذا جئت..

فسكتوا ونزل من على المنبر يبكى ﷺ ودخل الى بيته ..(بأبي انت وأمي يارسول الله فداك نفسي 😢)

 

💢و فى حاجه تانيه كمان حصلت هي ان صفوان بن المُعطل " اللى اتهموه مع عائشه رضى الله عنها " لما عرف أن حسان بن ثابت نقل كلام عليه ،مقدرش يمسك اعصابه فأخد القوس بتاعه وراح ضرب حسان ،

فراح حسان أشتكى للنبى ﷺ ،

فجاب النبى ﷺ صفوان و قال له : يا صفوان..هل ضربته ؟ ..

فقال : نعم يا رسول الله ، فقال له و لماذا يا صفوان؟ (شوفوا رد صفوان وأخلاقه وأخلاق الصحابة مع النبى ﷺ ) وطى صفوان وشه فى الأرض وقال يارسول الله لقد أتهمنى فى عِرضى (مش قادر يقوله فى عِرضك !! فقاله شتمنى فى عِرضى انا) ،

فقام النبى ﷺ قال له : عليك دية يا صفوان،

بس النبى ﷺ هو اللى هيتحمل الدية و هيدفعها لحسان بن ثابت.. (شايفين اد ايه النبى ﷺ بيشق على نفسه و بيتحكم فى اعصابه.. مفيش أجمل منك ياسيدنا النبي ﷺ ❤️) 

💢طيب دلوقتى النبى ﷺ تعبان .. و فى بيته لا بياكل و لا بينام .. طيب فين السيده عائشة بقى ؟🥺

السيده عائشه فى بيت والدها ابو بكر الصديق ✋

وبتقول : والله ظللتُ ثلاثون يوماً لا يرقأ دمعى ولا أكتحل بنوم ولا آكل طعاماً ولا أشرب شراباً.. كنت أبكى ليلآ ونهارآ حتى ظن أهلى أن البكاء فالق كبدى ..

فبتقول حتى إن كان فى اليوم الثلاثين دخلت عليا صاحبتى من الأنصار (واحدة صاحبتى) فرأت حالى فأشفقت علي..

فلم تتكلم و جلست تبكى معى فجلسنا نبكى سوياً وأبى يبكى وأمى تبكى ..حتى دخل علينا رسول الله ﷺ

( و دلوقتى أول مواجهة فى الموضوع ده هتحصل بين السيده عائشه و رسول الله ﷺ ) ..

❤️❤️❤️❤️❤️ صلوا على النبى ❤️❤️❤️❤️❤️

💢و يدخل عليهم النبى ﷺ فبتقول السيده عائشه فسلم علي ونظر الىّ (وأول مرة يبص لعائشة عينه فى عينها و يكلمها كلام مباشر و يتفتح الموضوع بينهم) ..

فقال النبى ﷺ : يا عائشة علمتِ ما قيل؟

فقالت: نعم يا رسول الله ،

فقال: يا عائشة إن كنتى بريئة فسيبرأك الله تعالى وإن كنتى قد ألممتى بذنب فأستغفرى الله وتوبى اليه فإن العبد إذا أذنب وتاب غفر الله له ..

( هو فيه إيه؟ شاكك فيها ؟ لأ .. امال فيه ايه ؟ فى مشكله.. احنا عايزين دليل نواجهه بيه المجتمع..الحادثه و التهمه دى مش سهله و كفايه انها حصلت فى مجتمع مغلق.. يعنى لو فى مجتمعنا دلوقتى واحده رجعت مع واحد بالليل هتبقى كارثه خصوصآ لو فى منطقه ريفيه .. فما بالك ان ده يحصل فى مجتمع بعاداته اللى من ١٤٠٠ سنه !! ) ✋ ..

فبتقول السيده عائشة فنظرت إليه وجف دمعى ( عايزة تقول هو فى احتمال !! ) فقلت : ما تقول يا رسول الله !! فلم يرد .. فراحت لأمها فقالت: يا أمى أجيبى عنى رسول الله ،فقالت والله يا بُنية لا أدرى ما أقول 😔..

يا أبتى أجب عنى رسول الله ، فقال يا بُنية لا أدرى ما أقول لرسول الله 😔

فحست السيده عائشة أنها لوحدها و مفيش فى اللحظة دى ملجأ ولا منجا من الله الا إليه سبحانه وتعالى..

فبصتلهم وبكت وقالت والله إنى أرى فيكم أنكم سمعتم أمراً وصدقتموه حتى أستقر فى أنفسكم ووالله لو قلت لكم أنى بريئة والله يعلم أنى بريئة ما صدقتمونى 🥺🥺

ولو أعترفت على نفسى بذنبٍ لم أفعله ،صدقتمونى والله يعلم أنى منه بريئة.. فوالله لا أجد لكم الا كما قال أبو يوسف (نسيت أسم سيدنا يعقوب من كتر الزعل 😔)

و قالت : فصبرٌ جميل والله المستعان على ما تصفون .. 

(رضي الله عنك يا أم المؤمنين 🥺😢)

فبتقول السيده عائشه: فتركتهم و ذهبت الى فراشى وأعطيتهم ظهرى وأضطجعت وغطيت رأسى و ظللت أبكى وأبكى وأبكى ووالله ما قام أحد ولا دخل أحد ولا خرج أحد .. فنظرت إلى رسول الله فإذا تلبسه الوحى فأرتجفت أطرافه و تصبب عرقاً كما كان يحدث حين يتنزل به الوحى، فعلمنا أنه يُوحى إليه ..

فظل النبى ﷺ يتصبب عرقاً و يوحى اليه.. يوحى اليه (آيات كتيرة) حتى اذا سُرى عنه ( جبريل مشى) رأيته يضحك وما ضحك منذ ثلاثين يوماً (تعبان و مضغوط ﷺ 😔)

فقال ﷺ : يا عائش أبشرى لقد أنزل الله برائتك 👆❤️

فبتقول السيده عائشة : فقالت أمى قومى الى رسول الله .. وقال أبى قومى الى رسول الله ..

فقلت :والله لن أقوم إلا لربى الذى برأنى ✋

 فسجدت شكر لله عز وجل 🕋❤️🤗

💢طيب إيه الآيات اللى نزلت فى السيده عائشه؟🤔

تأملوا الآيات الجميلة قال تعالى :

 " إِنَّ الَّذِينَ جَاءُوا بِالْإِفْكِ عُصْبَةٌ مِّنكُمْ لَا تَحْسَبُوهُ شَرًّا لَّكُم بَلْ هُوَ خَيْرٌ لَّكُمْ لِكُلِّ امْرِئٍ مِّنْهُم مَّا اكْتَسَبَ مِنَ الْإِثْمِ وَالَّذِي تَوَلَّى كِبْرَهُ مِنْهُمْ لَهُ عَذَابٌ عَظِيمٌ ﴿١١﴾ لَّوْلَا إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنفُسِهِمْ خَيْرًا وَقَالُوا هَـذَا إِفْكٌ مُّبِينٌ ﴿١٢﴾ لَّوْلَا جَاءُوا عَلَيْهِ بِأَرْبَعَةِ شُهَدَاءَ فَإِذْ لَمْ يَأْتُوا بِالشُّهَدَاءِ فَأُولَـئِكَ عِندَ اللَّـهِ هُمُ الْكَاذِبُونَ ﴿١٣﴾وَلَوْلَا فَضْلُ اللَّـهِ عَلَيْكُمْ وَرَحْمَتُهُ فِي الدُّنْيَا وَالْآخِرَةِ لَمَسَّكُمْ فِي مَا أَفَضْتُمْ فِيهِ عَذَابٌ عَظِيمٌ ﴿١٤﴾ إِذْ تَلَقَّوْنَهُ بِأَلْسِنَتِكُمْ وَتَقُولُونَ بِأَفْوَاهِكُم مَّا لَيْسَ لَكُم بِهِ عِلْمٌ وَتَحْسَبُونَهُ هَيِّنًا وَهُوَ عِندَ اللَّـهِ عَظِيمٌ ﴿١٥﴾ وَلَوْلَا إِذْ سَمِعْتُمُوهُ قُلْتُم مَّا يَكُونُ لَنَا أَن نَّتَكَلَّمَ بِهَـذَا سُبْحَانَكَ هَـذَا بُهْتَانٌ عَظِيمٌ ﴿١٦﴾ يَعِظُكُمُ اللَّـهُ أَن تَعُودُوا لِمِثْلِهِ أَبَدًا إِن كُنتُم مُّؤْمِنِينَ ﴿١٧﴾ وَيُبَيِّنُ اللَّـهُ لَكُمُ الْآيَاتِ وَاللَّـهُ عَلِيمٌ حَكِيمٌ ﴿١٨﴾"

(سوره النور) ..

👈والذى تولى كبره منهم .. المقصود بيها عبد الله بن أبى بن سلول "المنافق" فربنا بيتوعده بعذاب عظيم ،

👈و الأيه اللى بتقول لولا اذ سمعتموه ظن المؤمنون والمؤمنات بأنفسهم خيراً ...دى المقصود بيها الناس اللى زى أبو أيوب الأنصارى وأم أيوب .. فاكرين لما قالوا ان مستحيل ده يحصل من صفوان و عائشه..

👈و أما الآيه :لولا اذ سمعتموه قلتم ما يكون لنا أن نتكلم بهذا سبحانك هذا بهتان عظيم .. يعنى زى زينب لما قالت ان ده محصلش و مشفناش من عائشه غير كل خير، و قالت عايزه احفظ ودنى من الكلام ده ..

و ينزل تشريع حد قذف المحصنات ✋

قال تعالى : " وَالَّذِينَ يَرْمُونَ الْمُحْصَنَاتِ ثُمَّ لَمْ يَأْتُوا بِأَرْبَعَةِ شُهَدَاءَ فَاجْلِدُوهُمْ ثَمَانِينَ جَلْدَةً وَلَا تَقْبَلُوا لَهُمْ شَهَادَةً أَبَدًا وَأُولَـئِكَ هُمُ الْفَاسِقُونَ ﴿٤﴾"

فبعد ما تتحمل السيده عائشه كل البلاء ده و تدفع التمن ده و تتعذب نفسيا عشان بعد كده كل بنت مسلمه تعيش بكرامه..و ربنا يحميها ان حد يقول عليها ربع كلمه 👌 ..

نزل تشريع يحمى الاعراض بإن اللى يتكلم على اى واحدة او واحد من غير أربع شهود فهيبقى جزاؤه انه يتجلد ٨٠ جلدة (و من لم يُجلد فى الدنيا هيجُلد يوم القيامة) ..

💢طيب و بعد التشريع ده فى ناس هتتجلد فعلاً ؟

اه زى سيدنا حسان بن ثابت الصحابى الكريم هيتجلد (الحق عند ربنا ما بيتقسمش مش علشان ده صحابى مش هجلده لا الحق حق ..و الحق أحق أن يُتبع ✋ ) ..

و يُجلد مسطح بن أثاثة (اللى حارب فى بدر) وتًجلد حِمنة بنت جحش دى أخت زينب بنت جحش زوجة النبى ﷺ... طب واحدة ست تتجلد ؟؟ أه .مدام غلطت..

احنا ماعندناش فى الاسلام ست و راجل..

طب ليه الحد أتطبق عليهم وهما لما أتكلموا مكنش لسه الحد نزل وماكنوش يعرفواا ؟؟

لأن حادثة الإفك دى تطبيق عملى دى قصة عملية علشان تفضل ليوم القيامة لأى حد اتكلم على واحدة فكان لازم ينزل الحكم ويتطبق كمان 👌

فتبقى كل حاجة فى حياتنا هنلاقيها فى سيرة النبى ﷺ ،

فلو كان الحكم مش اتطبق ،يبقى ساعتها كان هيبقى عندنا كده حاجة ناقصة ، فالإفك حادثة عملية مكتملة ، حصلت الاشاعة والناس اتكلمت ونزل الحد و تم تطبيق الحد و ربنا سامح فى الاخر 👌

حسان بعد ما اتجلد كان ندمان وعايز يعتذر للسيده عائشة فيقول لها بيت شعر جميل فإن كان قد بلغوكمُ أننى كنت أهجوكمُ فلا رفعت صوتى الىّ أناملى ..

طيب حسان ومسطح وحِمنة ، الناس شهدت عليهم وهما كمان أعترفوا على نفسهم علشان كده أتجلدوا .. 

لكن عبد الله بن ابى بن سلول معترفش، ولا حد شهد عليه فما اتجلدش (أحنا دينا دين عدل مطلق .. بس عارفين حاجة الحد فى الاسلام بيكفر ويطهر فحسان ومسطح وحِمنة اتطهروا من الذنب لكن سلول ربنا ادله فرصه بس برده اصر على الذنب..و كأن ذنب السيده عائشه لازم يشيله سلول يوم القيامة ويكون العذاب والعقاب أشد بكتير )..

💢طيب ليه استمر الإفك و الإفتراء ده لمده شهر كامل و منزلش الوحى بسرعه 🤔؟

فى حكمه جميله اوى من ده 👌

فى مستشرق (عالم اجنبى بيهتم بعلوم الشرق) بيقول كلما أردت أن أُكذب محمد ﷺ واجهتنى حادثة الإفك أقول هو صادق (كل ما اقرى عن الإسلام و اقول ان محمد مش نبى و اكيد بيكذب ألاقى نفسى بفكر فى حادثه الإفك..

طب ليه؟🤔

اصل لو سيدنا محمد ﷺ هو اللى مألف القرآن كان ألف بسرعه آيه تبرأ السيده عائشه وخلاص ويحمى شرفه وعرضه لكن يفضل شهر مافيش قرأن بينزل ..

فده أكبر دليل أن القرأن من عند الله تبارك وتعالى )

(الله على الجمال 🤗) 👌

💢أجمع العلماء على كفر من سب و شتم السيده عائشة وكفر من سب ابو بكر الصديق و فسق من سب الصحابة ..

لأن سب عائشة والصديق تكذيب للقرأن..

طب ليه ؟🤔

لأن سب السيده عائشة تكذيب بالإفك

أما سب سيدنا أبو بكر فربنا قال "إِذْ يَقُولُ لِصَاحِبِهِ لا تَحْزَنْ إِنَّ اللَّهَ مَعَنَا " فربنا اثبت للصديق الصُحبة لرسول الله. فاللى يسبهم و يشتم فيهم يبقى بيفترى على الله ..

شوفتوا ربنا كرم السيده عائشة ازاى ! رضى الله عنها 🤗❤️

💢فى قصة جميلة عن عفو السيده عائشة ..

مرة كانت ماشية مع عُروة بن الزبير" ابن أختها" وكان بعد وفاة النبى ﷺ و كان حسان بن ثابت جى من بعيد فشافته فأنفعل عُروة وافتكر اللى حصل ايام الإفك..

فراح وبقى عايز يتخانق مع حسان فمسكته السيده عائشة وسألته إلى اين يا عُروة ؟

قال :تذكرت ما قاله يا خالة ، فقالت يا بنى دعه فإنه كان يدافع عن رسول الله أما سمعت أخر بيت فقد قال إن أبى وأخى وعمى وعرضى لعرض محمد منكم فداء .. 

💢أخر حاجة هنحكى عنها هي مسطح بن أثاثة ..

مسطح بقى كان سيدنا أبو بكر بيصرف عليه (تخيلوا .. قال كده على السيده عائشة وسيدنا أبو بكر بيصرف عليه)

فلما نزلت الآيات وأتأكد سيدنا أبو بكر أن مسطح متورط .. فأقسم بالله أنه ميصرفش على مسطح أبداً ..

تسمعوا بقى رحمة ربنا وعفو الله عز وجل " ولا يَأْتَلِ أُولُو الْفَضْلِ مِنْكُمْ وَالسَّعَةِ أَنْ يُؤْتُوا أُولِي الْقُرْبَى وَالْمَسَاكِينَ وَالْمُهَاجِرِينَ فِي سَبِيلِ اللَّهِ وَلْيَعْفُوا وَلْيَصْفَحُوا أَلَا تُحِبُّونَ أَنْ يَغْفِرَ اللَّهُ لَكُمْ وَاللَّهُ غَفُورٌ رَحِيم " (سوره النور- آيه 22)ٌ ..

الآية دى نزلت فى سيدنا أبو بكر الصديق ✋

والمهاجرين فى سبيل الله دى المقصود بيها مسطح ربنا ما نزعش منه لفظ المهاجر مخدش منه اللقب ..

و فى الايات ربنا بيقول ان أبوبكر الصديق رضي الله عنه الاحسن انه يعفى عن مسطح و يصرف عليه و ربنا وعد ان اللى يعفى عن حد ظلمه .. ربنا هيعفى عنه..

فلما نزلت بكى سيدنا أبو بكر وقال : بل أحب أن تغفر لى يا رب ،فرجع أبو بكر الصديق وبقى بيصرف على مسطح أضعاف ما كان بيصرفه قبل كده 🤗❤️

💢عارفين الإمام الشافعى بيقول بيت جميل أوى عن العفو .. بيقول : " من نال مني أو علقت بذمتـــــه، أبرأتــــه لله شاكـــرا منتـــــه، أأُرَانى معَوِقَ مؤمن يوم الجزاء، أو أن أسوء محمدا في أمته " ..

(اللى شتمنى أو علقت فى ذمته يعنى هاخد منه حسنات يوم القيامة ، أبرئته الى الله .. مش عايز منه حاجة ، معقولة أنا أأخر مؤمن يخش الجنة ؟؟ أو أن أسوء محمدا فى أمته .. مش النبى ﷺ هيزعل لو حد دخل النار فمعقولة أنا أسوئه فى أمته؟؟..

والله يا جماعة لو أخدنا النية دى .. اننا هنسامح عشان ربنا يعفو عنا وعشان ميزعلش النبى ﷺ ..

هنسامح الناس كلها وحياتنا هتختلف ✋✋... 

❤️وليعفو وليصفحوا. ألا تحبون أن يغفر الله لكم ❤️

وبكده خلصت حادثة الإفك رضى الله عن عائشة ❤

نكمل بكرة إن شاء الله ❤ 

#كن_محمديا