السيره النبويه العطره 49

 

#السيرة_النبوية ❤️

👈 إفتراء عدو الله على السيده عائشة " حادثة الإفك "(٢) 

💢نكمل سوا حادثه الإفك ، على فكره حادثه الإفك من أشد المواقف على رسول الله ﷺ (وكلمة إفك معناها غير كلمه كذب ، كذب يعنى حاجة موجودة واتغيرت لكن إفك يعنى حاجة مالهاش اى وجود ..حاجة حد ألفها و أخترعها تماماً يعنى مالهاش أى أساس من الصحة ) .. 

 

عارفين فى ناس بتقول أن إيذاء ابن سلول للنبى ﷺ كان أشد من أبى جهل لأن أبو جهل أذاه راجل لراجل فى حرب..

لكن ابن سلول أذاه فى شرفه وعِرضه وأن التعب النفسى اللى مر بيه النبى ﷺ فى حادثة الإفك كان أشد من تعب غزوه أحد ومن حادثه أهل الطائف 😔

لأن الوجع البدنى أهون من الوجع النفسى و عائشة دى كانت مراته حبيبته و الموضوع استمر شهر كامل..

يعنى معاناه كبيره 🥺

💢تعالوا نفتكر سوا أد أيه النبى ﷺ كان بيحب السيده عائشة علشان نحس أد أيه النبى ﷺ أتعذب وأتأذى فى مشاعره ،

مرة النبى ﷺ عند السيده عائشه فى البيت وعايز يقوم يصلى فيستأذنها قبل ما يقوم يصلى (صلاة السنة مش الفريضة، طبعاً الفريضة مافيهاش إستئذان) ..

طب ايه المشكلة ليه أستئذنها فى صلاه السنه !!

طب ما يقوم يصلى على طول ؟ ..

النبى ﷺ استئذن احتراما لوجود زوجته.. شوفتوا أدب مع الزوجة أكتر من كده !! ) هيقولها يا عائش أتأذنين لى أن أقوم أصلى لربى ساعة ؟

فتقوله: يا رسول الله إنى لأحبُ قربك وأكره فراقك ولكنى أُحب الذى تحب ، قم بأبى أنت وأمى يا رسول الله ﷺ ..

فيقوم يصلى ويصلى، فهي شايفاه طول الصلاه بيبكى فبعد الصلاة بتسأله و تقول : يا رسول الله لما تبكي ؟

و قد غفر لك الله ما تقدم من ذنبك وما تأخر ؟؟

فقال لها : يا عائش أفلا أكون عبداً شكوراً ♡ ..

💢ويوم وفاه النبى ﷺ (هنحكيه بالتفصيل بعد كده) ..

هيبقى بيموت ﷺ و كان يتصبب عرقاً ويغمى عليه ويفوق ويغمى عليه ويفوق فعائشة قاعدة جمبه و وخداه فى حضنها و عمالة تبكى و تمسح العرق و تدعي له..

فيفتح عينيه ويقول لها : والله يا عائش إنه ليهون علىّ الموت أنك زوجتى فى الآخرة ❤ ( بيحبها لآخر لحظه فى حياته .. و بيراعى مشاعرها و بيصبرها على فراقه رغم تعبه الشديد و يطمنها بإنهم هيبقوا سوا فى الجنه ❤️🤗) ..

💢و بعد وفاته ﷺ هتقول السيده عائشه :

والله مات رسول الله وهو بين سحرى ونحرى (بين صدرى ورقبتى ) و تحكى عائشه و تقول ان قبل ما النبى ﷺ ما يموت بلحظات دخل عليهم عبد الرحمن بن أبى بكر (أخوها) وفى إيده السواك فأخدته عائشة و قطمته ولينته بفمها وبعدها إدته للنبى ﷺ فأستاك (غسل سنانه) وكانت أخر حاجة تدخل فمه ..

فتقول السيده عائشة : من كرم الله علىّ أن النبى ﷺ مات فى حجرتى وفى ليلتى بين سحرى ونحرى وأن الله جمع بين ريقى وريقه قبل أن يموت (أخر حاجة دخلت فى جوف النبى ﷺ كانت ريق عائشة لما لينت السواك )..

شايفين أد أيه كان حبه لعائشة و تخيلوا الجرح الكبير اللى هيتعرضوا له بعد ما يتقال ان عائشة زنت مع صحابى ( حاشاها رضى الله عنها وأرضاها ) ..

💢طيب كنا اتكلمنا على ان النبى ﷺ مصدقش اللى اتقال فى عائشه.. بس هو كان تعبان و مهموم.. شايل هم كبير .. مراته حبيبته حد اتجرأ يمسها بسوء ، السيده عائشه بتقول : كنت أجد فى عينيه ﷺ الحزن والهم ولا أدرى ما الذى به ؟ وأرى الدموع فى عينيه ولا أدرى ما به ؟

(مارضيش ﷺ حتى يقولها علشان هى كانت عندها حمى و تعبانة فخايف لما تعرف تتعب أكتر ) ...

فيوم ما عرفت من ام مسطح اللى اتقال عليها.. استنت النبى ﷺ يرجع البيت فقالت له يا رسول الله أتأذن لى أن أُمرض فى بيت أبى ؟ ..

(عايزة تروح بيت أبوها .. عايزة تتأكد من أبوها وأمها يمكن أم مسطح غلطانة ..عائشه مش قادرة تصدق)

فقال النبى ﷺ :نعم يا عائشة (مقلهاش لأ مش هتخرجى غير لما أعرف حقيقة الكلام ده ايه.. شايفين اهو انه سمح له بالخروج ده دليل أن النبى ﷺ متأكد أنها بريئة ♡) .. 

فبتقول السيده عائشه : فخرجت حتى وصلت الى بيت أبى فمكنش فى البيت كان فوق السطح بيصلى ويبكى، فقلت يا أماه (فأمها لقيتها بتبكى ففهمت أن عائشة عرفت)

فقالت : هونى عليكى يا بُنية ،

قلت يا أمى أحقاً ما يقوله الناس ؟؟ ..

فقالت نعم يا بُنية ، قالت: أو عَلِم ذلك رسول الله ؟؟

قالت نعم يا بُنية،، يا بُنية هونى عليكى ، فما من إمراةٍ وضيئة (حلوة) عندها زوج يحبها ولها ضرائر الا وأكثرن عليها ( طبعا هي بس بتقول اى حاجه، كانت عايزة تلاقى مخرج تهون بيه على عائشة)..

فقالت عائشه : ولِمَ لم تخبرينى ؟؟

فقالت: ما استطعت ..

فدخل أبو بكر الصديق (وكان سمع كلامهم)

فقالت عائشه :يا أبتى أو حقاً ما يقوله الناس ؟ أوعَلِم رسول الله ؟ قال نعم ..

فبتقول عائشه : فظللت أبكى وأبكى حتى كاد لا يرقأ دمعى ولا أكتحل بنوم ولا آكل طعاماً ولا أشرب شراباً.. كنت أبكى ليل نهار حتى ظن أهلى أن البكاء فالق كبدى (هموت من كتر البكاء) 😢😢😢

❤️❤️❤️❤️❤️صلوا على النبي ❤️❤️❤️❤️❤️

💢طب النبى ﷺ كان بيعمل ايه دلوقتى ؟

يا ترى كنت مصدق يا رسول الله ؟ ..

 استحاله.. طبعا مكنش مصدق..

أوعوا تصدقوا أن النبى ﷺ كان مصدق الكلام ده ..

فى ناس بتحكى حادثه الإفك دى وتقول أن النبى ﷺ صدق وانه بشر فوقع فى قلبه ما يقع للبشر !! .. أبدا أبدا ..طبعا مكنش مصدق.. استحالة.. أومال مالك يا رسول الله ؟

شوفوا بقى عظمة سيدنا محمد ﷺ اللى كل مرة بتبان أكتر ، محمد الزوج مصدق جداً أن عائشة ماعملتش كده ، محمد الزوج يقدر دلوقتى يعاقب كل اللى بيتكلم فى مراته لكن محمد القائد ، قائد الدولة لازم يكون عنده دليل علشان يحكم حكم ، عندك دليل يا رسول الله ؟

لأ معنديش دليل ...

فهو ﷺ ماكنش حاكم ديكتاتورى ..حاشاه ❤️ .. 

أى حاكم ديكتاتورى دلوقتى لو حد اتكلم عن مراته كلمه ، أبسط حاجة يعملها يدخل الحد ده السجن و يوقف الفتنة دى .. سواء دخل الشخص ده ظلم أو لأ مش مهم ..

 القائد له وضع سياسى.. زى قصه سيدنا يوسف عليه السلام لما أتسجن ظلم لمجرد أن الناس بدأت تتكلم عن حب إمراءة العزيز له ..مع أنها هى اللى كانت غلطانة..

و رغم كده اتسجن سيدنا يوسف رغم انه برئ ..

فالعزيز كان مصدق سيدنا يوسف ومع ذلك سجنه وظلمه علشان كرامته و وضعه السياسى ..

فكان النبى ﷺ يقدر يعمل كده.. صح؟

اه يقدر بس هل النبى ﷺ ديكتاتور ؟ لا ابدا..

صلى الله على محمد هو اللى بيعلم البشرية العدل.. فإزاى ما يبقاش عادل 👌❤️..

طيب معاك دليل يا رسول الله أن حد سمع سلول بيقول الكلام ده فنعاقبه ؟ للأسف لأ ..

أصل سلول حكى الكلام ده للمنافقين و محدش منهم هيقول عليه وهما بسرعه نشروا الكلام، فالنبى ﷺ بقى متكتف ..

النبى ﷺ الزوج يقدر ياخد رد فعل عنيف لكن النبى ﷺ القائد لازم يبقى محايد لأنك يا رسول الله قائد الدولة لازم يكون معاك دليل وبناءً عليه تحكم .. 

طيب ايه الحل اللى قدامك يا رسول الله ؟ 

هيفكر النبى ﷺ فى فكرة جميلة أوى .. 

هو دلوقتى محتاج يثبت براءة عائشة طيب إزاى ؟🤔

النبى ﷺ عايز المجتمع نفسه هو اللى يثبت براءة عائشة .. فهيحاول النبى ﷺ يعمل رأى عام ، شريحة من المجتمع تأيده وتبقى فى صفه وهما اللى يحفزوا باقى الناس أنهم يثبتوا براءة عائشه..

طيب فى اتنين جمال أوى قاعدين بيتكلموا مع بعض الاتنين دول هما أبو أيوب الأنصارى وأم أيوب (فاكرينهم الى استضافوا النبى ﷺ لما هاجر للمدينة ) أبو أيوب بيقول لأم أيوب: أسمعتى ما قيل يا أم أيوب ؟ قالت نعم ،

وقالت يا أبا أيوب أتصدق ما قيل فى عائشة ؟؟ 

قال لا والله .. 

فقال : يا أم أيوب لو كنتى مكان عائشة أتفعلين ما قيل فى عائشة ؟ قالت لا والله حاشى لله،

فقال : وعائشة خيرٌ منكِ عند الله .. قالت أعلم..

وأنت يا أبا أيوب أكنت تفعل الذى قيل فى صفوان ؟

قال : لا والله وصفوان خيرٌ منى عند الله

(يبقى لو انا وانتى اللى أقل منهم.. عمرنا ما نعمل كده .. يبقى أزاى عائشة وصفوان يعملوها !!)❤️🤗

💢طيب قلنا ان النبى ﷺ عايز يعمل رأى عام و الناس هي اللى تبرأ عائشه.. طيب هيسأل مين؟🤔

عُمر بن الخطاب (خلوا بالكم لحد اللحظة دى محصلش مواجهة بين الصحابة والنبى ﷺ فى الموضوع ده .. الموضوع محرج جدا )..

هيقول النبى ﷺ لعُمر: يا عُمر أسمعت ما قيل ؟

فيقوله نعم يا رسول الله ..

فيقول النبي ﷺ فما تقول يا عُمر

(فعُمر يرد رد مبهر جداً ) 🤗

فيرد عُمر و يقول : يا رسول الله من الذى زوجك عائشة ؟ فيقول له الله ... فيبتسم عُمر 😊 (يعنى ايه ؟) 

يعنى بيقول له اللى جوزك عائشة هو ربنا. فإستحاله يجوزك واحده مش كويسه) فالنبى ﷺ يقول له: قل لهم يا عُمر (يبقى اهو النبى ﷺ متأكد من براءه عائشه).

يروح النبى ﷺ لأسامة بن زيد ويقول له: يا أسامة أسمعت ما قيل ؟ نعم يا رسول الله ، فيقول له و ما قولك يا أسامة ؟ قال يا رسول الله أهلك وما علمنا عنهم الا الخير ..

فيفرح النبى ﷺ كده بقى معايا عُمر وأسامة ..

و يروح النبى ﷺ لمين كمان ؟ لعلىّ بن أبى طالب ..

(بس لازم نستوعب رد علىّ صح و لو عرفنا على بيفكر إزاى ،ساعتها هنفهم قصده كويس ).

سيدنا علىّ كل اللى شاغل باله أن النبى ﷺ يبقى كويس، اى حاجة تعكر مزاج النبى ﷺ نمحيها احسن..

يعنى دلوقتى عندنا هدف يا رسول الله و هو أن الرسالة تكمل و الدعوه للإسلام تنتشر، فأياً كان التمن ممكن ندفعه علشان الإسلام ندفعه..

 يعنى لو حطينا نفسنا مكان سيدنا علىّ بإنى أقعد أفكر فى الموضوع ده والإسلام يقف ...ولا نكمل ؟

أحنا عايزين نفتح مكة، عايزين الإسلام يستقر ..

فسيدنا علىّ له وجهة نظر .

فالنبى ﷺ يروح لعلىّ و يقول له: يا علىّ أسمعت ما قيل ؟

فقال: نعم يا رسول الله ، فيقوله: فما قولك يا علىّ ؟

فيقول على:" يا رسول الله أهلك وما علمنا عنهم الا خيراً وإن الله لم يضيق عليك ..طلقها وتزوج غيرها "

سيدنا علىّ متأكد أن عائشة ما عملتش كده وعارف أن ربنا أكيد مش هيسيبها وهيتولاها بس بيوازن بين أمرين..

الأسوأ أن الدعوة تتوقف والسئ أن عائشة تتظلم..

فأحنا ممكن نيجى على عائشة علشان الدعوة تستمر ..

فسيدنا علي مش قصده أنه مابيحبش السيده عائشة.. حاشاه بالعكس علىّ كان بيحبها جداً وعائشة كانت دايماً تقول على علىّ كل الخير وهما الاتنين أهل بيت النبى ﷺ هو ابن عم النبى ﷺ وهى زوجة النبى ﷺ ...

بس كأن النبى ﷺ مكنش عايز الإجابة دى ✋

فقام راح لبريرة.. مين دى ؟ ..

دى خادمة عائشة .. فسألها: يا بريرة أسمعتى ما قيل ؟ فقالت : نعم يا رسول الله ،فقال: وما تقولين ؟

فتقول بريرة: يا رسول الله أهلك وما علمنا عنهم الا الخير ، فقال لها : هل رأيتى شئ رابك من عائشة ؟؟

(يعنى شفتى أى تصرف منها خلاكى تستغربى .. طيب بتسأل ليه يا رسول الله ؟ علشان يثبت أن حتى اللى عايشة معاها بتبرأها ..فالنبى ﷺ لما بيسألها مش معنى ده انه شاكك لكن هو عايز رد مقنع للناس) 

فقالت نعم.. فقال: خير يا بريرة ؟

فقالت : كنت كلما عجنت العجين آتى به لعائشة وأقول يا عائشة أحفظى العجين (لحد ما يخمر علشان نخبزه ونعمله عيش) فكانت عائشه لا تهتم وتنام وتأتى الدواجن فتأكله ( عائشه بتنام فبتيجى الفراخ تاكله 😊 )..

فأبتسم النبى ﷺ و قال : أرأيتى شئ غير ذلك يا بريرة ؟

فقالت : لا ..

و بعدين راح النبى ﷺ الى زينب بنت جحش "زوجة النبى ﷺ" (ودى اللى بتنافس عائشة على قلب النبى ﷺ) 

فقال النبى ﷺ : يا زينب أسمعتى ما قيل ؟؟

فقالت : نعم يا رسول الله ،

فقال : وما تقولين يا زينب ؟

فقالت أصون سمعى وبصرى ( أنا مش هأذى ودانى بالكلام ده يا رسول الله ) أهلك ، وما علمنا عنها الا الخير والله ما رأيت من عائشة الا كل الخير والدين والتقوى والعفاف ♡ ..

(الله على اخلاق أمهات المؤمنين ❤️🤗) 

و دلوقتى هيروح النبى ﷺ و يقف على المنبر ويبدأ يواجه الناس و يحاول أنه يكسب الناس فى صفه .. علشان يعاقب ابن سلول المنافق..

طيب هيقول ايه صلى الله عليه و سلم ؟ 🤔

نكمل بكرة إن شاء الله ❤ 

#كن_محمديا