السيره النبويه العطره 48

 

#السيرة_النبوية ❤️ 

👈 إفتراء عدو الله على السيده عائشة " حادثة الإفك "✋

💢اتكلمنا اخر مره عن زواج النبى ﷺ من السيده جويريه رضى الله عنها..كانت السيدة جويرية من القانتات العابدات السائحات, صاحبة حديث مشهور جدا فى السنة.

السيدة جويرية كانت تصلى الفجر وتفضل قاعدة تذكر الله لحد صلاه الظهر. فمرة النبى ﷺ صلى الفجر وخرج، فلما رجع النبى لاقى السيده جويريه لسه قاعده قى مكانها تذكر الله .. فقال لها النبى ﷺ : "يا جويرية, انى قلت بعدك كلمات, لو وزنت بما قلتيه جميعا لوزنتهن وهم : سبحان الله, عدد خلقه ورضاء نفسه وزنه عرشه ومداد كلماته"

( احنا كمان لازم نعمل ورد ذكر يومي و نستفيد بحلقات السيره في تغيير حياتنا ونطبق على الواقع حتى يسعد بنا النبي ﷺ لان محبتك للنبي ﷺ دليلها ان تتبع سنته ❤️) ..

💢دلوقتى الجيش راجع من غزوة بنى المصطلق, ولازم طول الطريق نعسكر و نقف فى مكان كل شوية ..

و كان من ضمن جيش المسلمين رجل هو رأس المنافقين وهو "عبد الله بن أبى بن سلول", كان طالع مع المسلمين عشان يفرق بين المسلمين ومكنش هدفه أبدا الجهاد فى سبيل الله. فيقف ويقول للنبى ﷺ : "يا هذا! لا تغبر علينا مجالسنا!" ..

تخيلوا بيقول كدة للنبى ﷺ ! طبيعى النبى ﷺ وهو راكب خيله, الحصان بيعمل غبرة من التراب على الأرض, وسلول كان قاعد مع مجموعة من أصحابه,

فتخيلوا بيقول للنبى ﷺ يا هذا!؟.

ويقول له: "انصرف عنا! اذا أرادك أحد جاء اليك!" .. ( ايه الجرأة دى على سيد البشر!!)..

فالنبى ﷺ يبص له و يقول له : "نعم" و يسكت النبى ﷺ .. طب ليه ؟🤔

 لان النبى ﷺ كان نفسه ان سلول يهتدى فكان بيصبر عليه، فلم يسىء له أبدا ﷺ👌

فيسمع و يشوف الكلام ده صحابى اسمه سعد بن عبادة فيقف و يرد على " عبد الله بن ابى بن سلول " و يقول له : "كذبت يا عدو الله, و يبص للنبى ﷺ و يقول : يا رسول الله, افعل ما شئت و اغشانا ما شئت, فإنا نحب مجالستك يا رسول الله" ..و بدأوا فى الخناق ✋

فأسكتهم النبى ﷺ وقال: "اسكنوا, اسكنوا" ،

ودى كانت أول مرة عبد الله بن ابى بن سلول يتطاول فيها على النبى ﷺ .

ويقف مره تانيه وسط المسلمين ويقول: "والله, لئن رجعنا الى المدينة, ليخرجن الأعز منها الأذل" (قصده انه هو العزيز وأن النبى ﷺ هو الذليل استغفر الله) ✋..

فيسمعه واحد من الصحابه اسمه "زيد بن الأرقم", ويروح يحكى للنبى ﷺ فالنبى ﷺ يتضايق طبعا, ويذهب لعبد الله بن سلول ويقول له: "أقلت هذا؟"

فيقسم سلول على أنه ماقلش!

فالنبى ﷺ يقول لسيدنا زيد: "يا زيد, لقد أقسم بالله"

فسيدنا زيد يزعل ويبكى لأنه فكر ان رسول الله مش مصدقه. ففى اليوم اللى بعده ، يقوم النبى ﷺ رايح لزيد يجبر بخاطره و يفهمه..

و يقول له : "يا زيد, ان الله قد صدقك" و يقرأ عليه قول الله تبارك و تعالى بعد نزول الآيه الكريمه :

"يَقُولُونَ لَئِن رَّجَعْنَا إِلَى الْمَدِينَةِ لَيُخْرِجَنَّ الْأَعَزُّ مِنْهَا الْأَذَلَّ وَلِلَّهِ الْعِزَّةُ وَلِرَسُولِهِ وَلِلْمُؤْمِنِينَ وَلَكِنَّ الْمُنَافِقِينَ لَا يَعْلَمُون"

💢طيب هتعمل ايه مع عبد الله بن سلول يا رسول الله بعد ما عرفت ده ؟🤔

سيدنا عمر بن الخطاب مضايق جدا فيقوم قايل : "يا رسول الله, دعنى أضرب عنق هذا المنافق" ,

فيقول النبى ﷺ : "لا ياعمر, حتى لا يتحدث الناس فيقولون إن محمدآ يقتل أصحابه" (لأن سلول ظاهريا مسلم )...

وبعد الأحداث دى و بعد ما عسكر الجيش شويه.. أذن النبى ﷺ بالرحيل. فيجى سيدنا "اسيد بن حضير" ويقول له: "يا رسول الله, لما نرحل فى هذا الوقت بالتحديد؟ماذا حدث؟" فيحكى له النبى ﷺ ما حدث مع عبد الله بن سلول,

فقال له أسيد:" لا تحزن يا رسول الله, أنت العزيز وهو الذليل ،ففى اليوم الذى دخلت فيه المدينة, كانوا يتوجون عبدالله بن سلول ليصير ملكا, فلما دخلت, انفض الناس من حوله ليذهبوا إليك ♡ فامتلأ حقدا عليك...(وكان ده سبب كره عبد الله بن سلول للنبى ﷺ ) ✋..

طيب الصحابه بعد ما عرفوا كلام عبد الله بن سلول ..

كلهم عمالين يتكلموا بينهم و بين بعض و الكلام بقى كتير و هيحصل مشاكل فالنبى ﷺ يعمل أمر عجيب جدا.

النبى ﷺ مشى بالجيش من ساعة موضوع سلول لغاية ما وصلوا المدينة من غير راحة خالص, طيب ليه؟🤔

النبى ﷺ كان عايز يطلع من المسلمين الطاقة السلبية من خلال المشى وفعلا هدأوا وناموا بمجرد ما اجسامهم لمست الارض من كتر المجهود.. و محدش منهم كان قادر يتكلم او يفكر حتى و بكده النبى ﷺ اخمد الفتنة ..

عبد الله بن سلول المنافق ده ،كان عنده ابن، و الابن ده كان مسلم صادق من صحابه رسول الله فبعد ما يعرف اللى ابوه عمله ، يقوم واقف على باب المدينة ويقول :" والله يا أبى, لا يؤويك ظلها, ولن تستظل بسمائها حتى يأذن لك رسول الله", (ايه ده.. ده بجد!؟ ايوه بجد ابن عبدالله بن سلول بيحب النبى ﷺ اكتر من اى حاجه فى الدنيا)

فلما يرفض انه يخلى ابوه يدخل المدينه،

فأبوه يقول له :" ويحك يا بنى, أدخلنى!"

فيرفض و يقول: لن تدخل حتى يعلم النبى ﷺ ..

فالنبى ﷺ يقول له : ويحك ! لا تفعل, لا تفعل.. دعه يدخل .. بر أباك و احسن صحبته, لعل الله أن يهديه" ..

💢طيب اللحظه اللى النبى ﷺ امر فيها الجيش انه يستعد للرحيل من المعسكر..بتحكى السيده عائشه و بتقول : "وضعت يدى على صدرى, فوجدت أن عقدى سقط فقلت أنزل سريعا أبحث عنه حتى يستعد الجيش, وفعلا نزلت و وجدته, ولكن عندما عدت, وجدت أن الجيش قد رحل, فقلت فى نفسى الآن سيفتقدنى الجيش وسيعودوا من أجلى, فجلست تحت شجرة, ومن خوفى نمت" ..

( ومن عادة النبى ﷺ يا جماعه انه بيسيب جندى فى آخر الجيش عشان لو حصلت مشكلة يلحقها.. فبتحكى السيدة عائشة عن اللى حصل بعد ما نامت تحت الشجره: فما فقت إلا على صوت" صفوان بن المعطل " (ده الراجل اللى النبى ﷺ سايبه فى آخر الجيش) ..

فصفوان لما لاقى السيده عائشه نايمه قام قايل: "انا لله وانا اليه راجعون" , فبتقول عائشة: "فقمت على استرجاعه ووالله ما سمعت منه إلا هذه الجملة. فقمت, وكان يعرفنى قبل الحجاب, فما ان رأيته, خمرت وجهى بجلبابى ..

فاستدار صفوان وأناخ لى الجمل ووالله ما سمعت منه الا انا لله وانا اليه راجعون, حتى وصلت الى المدينة وانضممت للجيش"..طيب مين شافهم بقى ؟🤔

سلول المنافق فقام قايل "والله ما سلمت منه, وما سلم منها, فجر بها صفوان" (يعنى زنى) !!  

والسيدة عائشة معرفتش ان اتقال عنها كده ومن رحمة ربنا جاتلها حمى شديدة وفضلت قاعده فى بيتها شهر ...

 و دى اتسمت حادثه الافك و الافتراء على اشرف و اطهر امرأه ، حبيبه رسول الله وزوجته في الدنيا والآخرة و ام المؤمنين..السيده عائشه رضي الله عنها وأرضاها ❤️

❤️❤️❤️❤️❤️صلوا على النبى❤️❤️❤️❤️❤️ 

💢بدأ عدو الله يقول للى حواليه و يفترى عليها رضى الله عنها و يقول : دى مش أول مرة يبقوا سوا ، ده صفوان كان بيروح لعائشه البيت والنبى ﷺ مش موجود وفضل بن سلول يتكلم يتكلم والاشاعة تنتشر و تنتشر ..

طيب فين السيده عائشة من كل ده ؟✋

هى بتقول : كان مِن فضل الله عليا أن مرضتُ بالحمى (جاتلها حمى فقعدت ٥ أو ٦ أيام غايبة عن الوعى متعرفش ايه اللى بيتقال و ده من فضل و رحمه ربنا على السيده عائشة ) ويمشى الموضوع فى المدينة والناس بتتكلم ..

ربنا فى القرأن بيصور المشهد بيقول عزو جل : "إِذْ تَلَقَّوْنَهُ بِأَلْسِنَتِكُمْ (سوره النور) ..

طيب هما الصحابة كانوا بيتكلموا .. صح ؟

يعنى الصحابة كانوا مصدقين ؟ ✋

لأ طبعا.. اللى حصل انهم نقلوا الكلام .. زى مثلا لما واحدة تميل على واحدة تانية وتقول لها: انا سمعت كذا وكذا عن فلانة، انا مش مصدقة بس سمعتهم بيقولوا كده ،

أهو ده فى حد ذاته حرام 🤚

نقل الكلام نفسه حرام لأنه تشهير ..

الشيخ الشعراوى رحمه الله ❤️ قال فى تفسير الحتة دى أن المفروض الكلام بيتنقل من اللسان للأذن يعنى اللى بتتلقى الكلام هى الأذن مش اللسان بس ربنا بيقول إذ تلقونه بألسنتكم ،فده دليل على السرعة فى انتشار الكلام بينهم ، وأنه بيتنقل من حد للتانى للتالت بسرعة من لسان للسان... فإنتشر الخبر 😔

💢 الكلام وصل للنبى ﷺ ❤️🥺

النبى ﷺ زعل و تعب وكان يبكى ليل نهار ..(ياحبيبي يارسول الله ❤️ 😢😢)..

طيب والصحابة ؟ فى من الصحابة اتكلموا (نقلوا الكلام) منهم مسطح بن أثاثة و حسان بن ثابت (ده اللى قال بيت الشعر المعروف فى رسول الله " وأجمل منك لم ترى قط عينى وأفضل منك لم تلد النساء ،خلقت مبرأً من كل عيبٍ كأنك قد خُلقت كما تشاءُ )

تخيلوا حسان كان من ضمن اللى اتكلموا !!

ايوه حسان بشر ..أخطئ ..و على فكرة حسان مش مصدق الكلام هو مجرد بس نقل الكلام ..

السيده عائشة بتحكى و بتقول : قعدت أيام فى الحمى فلما حسيت بشوية تحسن فأردت أن أقوم فأذهب الى المناصع (المناصع دى منطقة فى المدينة فيها حمامات نسائية فزمان مكنش فى حمامات فى البيوت فكانت الحمامات فى منطقة بعيد شوية عن البيوت)..

فخدت عائشه معاها واحده ست اسمها أم مسطح .. فماشيين سوا ،فأم مسطح اتكعبلت فقامت قايله : تَعِس مسطح (زى ما بنقول مثلا يخربيت فلان ) فتقولها السيده عائشة : أتقى الله يا أم مسطح أتسبين مسطح وهو من أصحاب بدر ؟ ( اصل السيده عائشه متعرفش حاجه من اللى نقله عنها مسطح.. بس شوفتوا أد ايه السيدة عائشة رقيقة وطيبة بتدافع عنه) ..

فأم مسطح بصت لها وقالت : يا بُنية أولا تعرفى ما قاله فيكى ؟ قالت عائشه : لا والله !! وما يقول فىّ ؟

قالت يا بُنية أو ما عرفتى ما يقوله الناس ؟!

قالت لا والله وما يقول الناس ؟؟

قالت يقولون كذا وكذا وكذا (حكيتلها كل الى فات) ..

فبتقول السيده عائشة ، فلم أصدق أذنى وعدت أسوأ مما كنت و بكيت و بكيت وقلت يا أم مسطح أو يتكلم الناس فى هذا ؟؟ قالت نعم يا بُنية ..

قالت أو بلغ ذلك رسول الله ؟؟ ...

قالت نعم يا بُنية ،

قالت أو بلغ ذلك أبى ؟؟ قالت نعم .. 

فبتقول السيده عائشه: ظللت أمشى كأنى لا أرى (مش شايفة قدامى) وجعلت أبكى حتى عُدت الى بيتى (بيت النبى ﷺ ) وجعلت أبكى وأبكى أنتظر قدوم النبى ﷺ (خلى بالكم مش هتحصل مواجهة..مش هتقدر.. صعب 😔) ،

💢طب والوحى ؟🤔

الوحى خلال الشهر ده كان بينزل على الرسول ﷺ بس مافيش حاجة بخصوص موضوع السيده عائشه. بينزل عادى بأيات تانية لكن شهر كامل مفيش وحى يبرأ السيده عائشة.

 

وبتقول السيده عائشة انها قبل ما تعرف اللى حصل من أم مسطح: وما كان يُريبُنى من رسول الله (مافيش حاجة كانت مخليانى مستغرباه) الا أنى لا أجد منه اللطف الذى كنت أجده. بس فى نقطه مهمه هو النبى ﷺ زعلان منها ليه؟

هو صدق اللى اتقال ؟ طبعا لأ ..

امال زعلان ليه؟

الكلام صعب جدا على أهل بيت النبى ﷺ 😢

عارفه لما يبقى ليكى صاحبه و بتحبيها اوى و فى يوم تحط نفسها فى موقف تخلى الناس يفهموها غلط..

بتلاقى نفسك بتعاتبيها و زعلانه منها و ممكن تزعقيلها عشان مبتستحمليش عليها حاجه و حشه.. او ابنك يتأخر و من قلقك عليه تزعقيله و تخاصميه ❤ .. اهو الموقف كده بالظبط 👌 .. أصلها قصه حب كبيره بينه ﷺ و بين السيده عائشه رضى الله عنها ..❤️

💢فاكرين لما عمرو بن العاص سأل النبى ﷺ : يا رسول الله أى الناس أحبُ اليك ؟ فيقول عائشة (بمنتهى الرجولة ..لو شاب دلوقتى اتسأل السؤال ده هيتكسف يقول انه بيحب مراته حتى لو بيحبها فعلا لكن النبى ﷺ كان سيد الرجال ﷺ وكمان قالها بأسمها .. مش عيب ❤ )

فيقول عمرو : من الرجال يا رسول الله ؟

فيرد ويقول :أبوها ❤️

فاكرين لما كانت السيده عائشه مسمية حب رسول الله ليها "العُقدة " فكانت فى الرايحة والجاية تقوله يا رسول الله كيف حال العُقدة ؟

فيقولها وطيدة يا عائشة ( جامدة ما تقلقيش ❤ ) ..

كان النبى ﷺ يدلعها و يقولها يا عائش إنى أعلم متى تكونين عنى راضية ومتى تكونين عنى غاضبه ، فقالت وكيف تعلم ذلك يا رسول الله .. فقال : إن كنتى عنى راضية قلتى لا ورب محمد وإن كنتى علىّ غاضبه قلتى لا ورب إبراهيم ..

فضحكت السيده عائشه وقالت والله لا أهجر الا إسمك يا رسول الله ( انا بخاصم إسمك بس يا رسول الله لكن مقدرش أخاصمك أنت ابداً .. صلى الله عليه وسلم ) ❤️

فاكرين لما مرة راحت له وقالتله يا رسول الله كل نسائك لهن كًنية الا أنا (يعنى عندهم ولد ويتقال ليها أم فلان) .... فصعبت عليه عشان ربنا مرزقهاش بالخلفه فحب يطيب بخاطرها فقال لها يا عائش أنتى أم عبد الله ( عمل لها كُنية بإسم ابن اختها عشان ما تزعلش ،شوفتوا أد أيه بيحب يراضيها !! ❤ ) ..

ياحبيبي يارسول الله كم نفتقد لحبك وحنانك وعطفك علينا..وحشتنا يارسول الله 😔

اللهم اجمعنا برسولك وارزقنا مرافقته في الجنه 🤲❤️

نكمل بكرة إن شاء الله ❤ 

#كن_محمديا