السيره النبويه العطره 45

 

#السيره_النبويه ❤️

👈حصار يهود "بني نضير" واستسلامهم 💪

👈انتصار المسلمين في غزوه "ذات الرقاع" 💪

👈حوار جميل بن سيدنا النبي ﷺ وجابر ❤️❤️

💢شفنا المره اللى فاتت غدر يهود "بنى نضير" و أنهم كانوا هيقتلوا النبى ﷺ و دى خيانه للعهد بينه و بينهم..

والنبى ﷺ اعطاهم مهله ١٠ ايام للخروج من المدينه..

و بدأ "بنى نضير" يجهزوا حالهم..

و فى اليوم التاسع جه عبد الله بن أبى ابن سلول" المنافق " و قال لهم : لا تخرجوا.. أنا أحميكم ✋

و هجيب الحلفاء بتوعى يساعدونا و ندخل جوه حصن و نتحصن فيه و بنى نضير يردوا عليه و يقولوا : أصبت يا عبد الله .. فيروحوا لرسول الله ﷺ فيقولوا : يا محمد إنا لن نخرج .. فأفعل ما شئت .. 🤚

و بكده أعلنت "بنى نضير" الحرب على المسلمين..

طيب هتعمل أيه يا رسول الله ؟🤔

سيدنا النبى ﷺ بدأ يجهز جيش ..فبسرعه يخش اليهود فى الحصن بتاعهم فيحاصرهم جيش المسلمين ..

طيب فين عبد الله بن أبى بن سلول 🤔

مش كان قايل لليهود انه هيساعدهم.. !! ؟؟

عبد الله مش موجوود.. أختفى 😊 ..

و نزلت فيه الآيه الكريمه دى من سوره المنافقين..

قال تعالى:

" أَلَمْ تَرَ إِلَى الَّذِينَ نَافَقُوا يَقُولُونَ لِإِخْوَانِهِمُ الَّذِينَ كَفَرُوا مِنْ أَهْلِ الْكِتَابِ لَئِنْ أُخْرِجْتُمْ لَنَخْرُجَنَّ مَعَكُمْ وَلَا نُطِيعُ فِيكُمْ أَحَدًا أَبَدًا وَإِن قُوتِلْتُمْ لَنَنصُرَنَّكُمْ وَاللَّهُ يَشْهَدُ إِنَّهُمْ لَكَاذِبُون ". 

طيب يهود" بني نضير" إستخبوا في الحصون و معاهم فلوسهم و حاجاتهم و أكلهم و أزواجهم و أطفالهم.. يعنى مش محتاجين حاجه خالص من بره الحصن.. و جيش المسلمين فضل محاصرهم لمده سنة ..

فالصحابه تعبوا لأنهم كانوا لسه طالعين من غزوه" أحد"

 و" حمراء الاسد" و نكبات الغدر اللى أدت لموت بعض الصحابه ..و فى الغزوات كان الصحابى يدوب ياكل تلات تمرات يتقوى بيهم .. و ماكنش فيه حاجه تانيه ياكلها ..

💢طيب وسط كل الأحداث دى.. فجأه ينزل في نص الليل على رسول الله آيه تحريم الخمر ✋ 

طب ايه علاقة ده بالموضوع ؟ 🤔

هنعرف بس استنو 😊 ..

دلوقتى الخمر أتحرم بالتدريج ..

وكان كل شويه سيدنا عمر بن الخطاب يسأل النبى ﷺ : يا رسول الله هل نزل جوابآ شافيآ في الخمر؟

اصل عمر كان شايف الإسلام و الخمر مش راكبين على بعض ..فكان مضايق ان لسه الخمر مش محرم ..

فتنزل آيه تحريم الخمر قال تعالى : " يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنصَابُ وَالْأَزْلَامُ رِجْسٌ مِّنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحون " ..

فأول ما يسمع الصحابه و سيدنا عمر الأيه.. فيفرحوا جدا.. و يفرح عمر و يجيب الأزايز و يكسرها ويكبها فى طرقات المدينه و ينادى على المسلمين و يقول : كبوا الخمر اللى معاكم.. و يرد الصحابه و سيدنا عمر على الأيه "فَاجْتَنِبُوهُ" و يقولوا أنتهينا يارب.. أنتهينا يارب .. و بيحكى الصحابه و يقولوا : فأصبحنا في اليوم التالي و كانت طرقات المدينه أنهارآ من الخمر و كأنما السماء أمطرت خمر ..

طيب تعرفوا أن سيدنا عمر بن الخطاب أتسمى "بصاحب الموافقات" عشان لما كان بيقول حاجه كانت بتوافق قول الله تبارك و تعالى و بينزل فيها قرآن.. زى موضوع الخمر كده 🤗❤️

و فى مره كمان زى ما هنشوف بعد كده لما يموت المنافق عبد الله بن ابى بن سلول ..هيبقى النبى ﷺ عايز يصلى عليه.. لكن سيدنا عمر هيقف و يقول: يا رسول الله لا تصلى عليه و يحاول يقنعه بس النبى ﷺ هيرفض ..

و ينزل القرآن الكريم :

" وَلَا تُصَلِّ عَلَىٰ أَحَدٍ مِّنْهُم مَّاتَ أَبَدًا وَلَا تَقُمْ عَلَىٰ قَبْرِهِ إِنَّهُمْ كَفَرُوا بِاللَّهِ وَرَسُولِهِ وَمَاتُوا وَهُمْ فَاسِقُون "

💢يحصل بعد كده حاجه غريبه .. "بنى نضير" طلعوا بره الحصن واعلنوا إستسلامهم لجيش المسلمين ..

طب ايه العلاقه بين تحريم الخمر و استسلام بنى نضير؟🤔

العلاقة هي بركة الطاعة ..👌

شفتوا المسلمين لما حصل لهم خساير في غزوه احد ..

ده كان بسبب ٤٠ مسلم عصوا أمر رسول الله..

فلما اتحرم الخمر و بقى الصحابه يرموا الخمر فى طرقات المدينه طاعه لأمر ربنا.. فقام ربنا نصرهم على يهود بني النضير.. 

قال تعالى : " سَنُلْقِي فِي قُلُوبِ الَّذِينَ كَفَرُوا الرُّعْب"

المهم خرج يهود بنى نضير من الحصن و قالوا : يا محمد كف عن دمائنا و أخرجنا من البلاد ..

فقال النبى ﷺ : لكم ذلك ..فقالوا : و نأخذ أموالنا..

قال النبى ﷺ : اجل ، لكم أموالكم ولكن من غير سلاح..

فيخرج يهود "بني نضير" من المدينه إلى منطقه اسمها" خيبر" و على فكره يهود "بني قينقاع" اللى غدروا قبل كده راحوا خيبر هما كمان فبقت خيبر مستوطنه يهود..

💢طيب أحنا دلوقتى لسه فى سنة ٤ هجرية ،

هتطلع قبيلتين (ثعلبه و محارب) ودول هيقرروا يغزوا المدينه.. و النبى ﷺ هيقرر يطلع لهم و بجيش من ٤٠٠ مقاتل و هتتسمى غزوه ذات الرقاع ..

طيب ليه كل الجيش الكبير ده يا رسول الله !!..

هو جيش القبيلتين ( ثعلبه و محارب) كبير اوى ؟ لأ..

امال سيدنا النبى ﷺ هيبذل المجهود ده ليه ؟ 🤔

عشان النبى ﷺ عارف كويس ان القبائل عارفه ان جيش المسلمين تعبان فبيستغلوا ده و بيهجموا على المدينه .. فالنبى ﷺ قرر يخرج بالجيش الكبير ده عشان يوصل للناس رساله مهمه و هي أن جيش المسلمين مستعد يحارب و هيخرج للحرب فيخافوا و يبطلوا يهجموا على المدينه ..

وفعلا لما جيش القبيليتين شافوا النبي ﷺ خرج بجيشه.. أنسحبوا ..و أتسأل الصحابى سيدنا أبو موسى سؤال جميل و مهم ..ليه سميت الغزوة بغزوه ذات الرقاع ؟🤔

فقال أبو موسى : كنا في هذه الغزوة نتعاقب على 6 بعير ..

( تخيلوا !! فطبعا ده خلاهم يمشوا كتير أوي ) و يكمل أبو موسى كلامه و يقول : فتعبنا من المشى ..و نقبت أقدامنا و سقطت أظافرنا .. فكنا نقطع من الثياب فنجعلها خرق و نربط على أقدامنا فبذلك سميت ذات الرقاع..

( يعنى من كتر المشى الأحذيه بتاعتهم اتقطعت.. فرجليهم اتعورت و اظافرهم وقعت 😢❤ فى سبيل الله ..رضى الله عنهم ❤️❤️.. بس تعرفوا بعد ما ابو موسى حكى الموضوع ده.. إضايق اوى اوى .. وحس انه كأنه قال سر و عمل جميل بينهم و بين ربنا.. خاف يكون عمل رياء ..يااا.. معقول بيتهم نفسه بالرياء 😊 رضى الله عنه و أرضاه ❤️❤️ )

💢طيب دلوقتى بعد إنسحاب القبيلتين هيرجع جيش المسلمين للمدينه الحمد لله .. بس و الجيش مروح هتحصل 3 أحداث 🤚

❤️❤️❤️❤️❤️صلوا على النبى ❤️❤️❤️❤️❤️

💢اول حاجه حصلت هي صلاه العصر..😊

جه وقت الصلاه فجيش المسلمين مش عارف يصلى..

طب ليه ؟🤔

اصل المسلمين خايفين ان يكون فى حد بيراقبهم و يستناهم و أول ما يسجدوا فيقوم هاجم عليهم.. و فعلا هيطلع حد مراقبهم ..المهم كان لازم المسلمين يصلوا بطريقه مختلفه ..

فى الوقت ده انزل الله تعالى ، سيدنا جبريل بتشريع صلاه الخوف و ده له اكتر من طريقه، فالمهم وقف النبى ﷺ و بدأ المسلمين يصلوا 👌..

و كان فعلا مراقبهم قائد المشركين و هو خالد بن الوليد (قبل إسلامه) أستغرب جدا من براعه المسلمين ..

و قال : الصلاة دي مش ممكن تكون اخترعها بني آدم إنما هي من رب العالمين .. و دي كانت أول حاجه من الإسلام تأثر فى قلب خالد بن الوليد .. طب دلوقتى الجيش صلى و اتحرك و بدأ يكمل الطريق للرجوع للمدينه ..  

💢و في نص الطريق جيش المسلمين قعد يستريح شويه .. محتاجين يناموا ، فالنبي ﷺ ينام و أتنين من الصحابه كانوا لازم يفضلوا سهرانين عشان يحرسوا الجيش و هم سيدنا عمار بن ياسر و سيدنا عباد بن بشر ..

والاتنين فضلوا يتناوبوا طول الليل فى الحراسه..

فعمار نام الاول و عباد وقف يحرس الجيش ..

فقال عباد فى نفسه أن مادام انا واقف لوحدي، طب ما أقف أصلى قيام ليل و فعلا بدأ يصلي .. بس للأسف طلع فى حد مراقب عباد.. و بدأ الراجل الكافر اللى مراقبه يرمي السهام على عباد .. و رشق السهم الاول فى ضهر عباد ..

طيب و عباد عمل ايه ؟ 🤔 ..

عباد شد السهم و كمل صلاه.. فأترمى عليه سهم تانى فرشق فى عباد 😢 فشد عباد السهم و كمل صلاه..و يترمى السهم التالت.. فعباد قام مخلص الصلاه بسرعه و صحى عمار بسرعه فعمار شاف عباد متعور فأتخض جدا فحكى له عباد على اللى حصل ..

فقال عمار : يرحمك الله يا عباد .. لما لم توقظني من أول سهم.. فرد عليه عباد .. تخيلوا عباد قال ايه ؟🤔

عباد قال : والله يا عمار كنت أصلى بسوره و لذهاب روحي و ذهاب الدنيا أحب إليا من أن أقطعها ♡ و لولا ان رسول الله كلفني بحماية الجيش ..ما كنت قطعتها أبدا حتى تخرج معها روحي.. كنت أقرأ سورة الكهف ❤️

( الصلاه هي صله بالله عزوجل عارف يعنى ايه ؟

الصلاه صله برب العالمين يعنى موصول بالله بأسماؤه الحسنى..لو مكسور!! هتبقى موصول بالجبار..

مظلوم !! هتبقى موصول بالمنتقم..

ضعيف !! هتبقى موصول بالقوى ..

الصلاه دى ليك عشان تقويك و تمدك بكل اللى ناقصك 👌

عرفتوا ليه حتى وقت الخوف ربنا من رحمته خلى فى طريقه للصلاه ..الصلاه فرض ليك انت و عشانك..

قال تعالى : "وَأَقِمِ الصَّلَاةَ إِنَّ الصَّلَاةَ تَنْهَىٰ عَنِ الْفَحْشَاءِ وَالْمُنكَرِ " .. انت مخير تصلى او متصليش ..و ربنا خلاك مخير فى العباده عشان تجيله بإختيارك و تجيله بحبك له..

اصل اختيارك للشئ دليل حبك ليه و اول حاجه هيتحاسب عليها العبد هى الصلاه ♡ .. ربنا بيحبك و رايد يشوف انت اخترت ايه .. اصل دى الغايه " الحب و الجنة " ❤️

محتاجين نراجع صلاتنا تاني 🤚🤚) ..

طيب دلوقتى عباد خلى عامر يصحى و انتبه الجيش و صحى و اللى كان بيرمى السهام جرى و هرب و انتهى الموضوع..

💢و دلوقتى جيش المسلمين خلاص قرب من المدينه.. فالنبي ﷺ لما كان بيخرج فى غزوه كان بيبقى في أول الجيش و لما بتخلص الغزوه و يبقى الجيش راجع ..

فالنبى ﷺ بيبقى فى اخر الجيش.. شايفين الشجاعه 🤗.. فالنبي ﷺ لقى حد من جيش المسلمين ماشى ورا و شكله مضايق و عنده مشكله ..

فقال النبي ﷺ : من؟

فقال : انا جابر بن عبد الله يا رسول الله..

فالنبي ﷺ قرب منه و قال له : ما بك يا جابر؟

فقال : أبطئ جملي يارسول الله،

فالرسول ﷺ قال له : لماذا يا جابر ؟

فجابر قال : ناقتي ضعيفة يارسول الله ،

فقال النبى ﷺ : يا جابر اعطنى هذه العصى التى في يدك ..

فأخد النبي ﷺ العصايه و نغز الجمل بتاع جابر تلات نغزات.. و راح قايل أركب يا جابر و يركب جابر ..و بيحكى جابر و يقول: فأصبحت ناقتي سريعه فكانت تسابق ناقة النبي 😊

وكنت استحي و أشد اللجام حتى لا تسبق ناقتى ناقه رسول الله..والنبي ﷺ فضل يضحك..(ياحبيبي يارسول الله ❤️) ..

و يفضل جابر مع رسول الله ❤️

فالنبي ﷺ هيتسامر مع جابر و يسأله عن أحواله الشخصية فقال النبي ﷺ : هل تجوزت يا جابر؟

فقال: أجل يارسول الله، فقال من يا جابر؟ ..

فقال جابر: أيم كانت في المدينة ( يعني ست كبيره و كانت أرمله ) فقال النبى ﷺ : لماذا أيم يا جابر !!. لما لم تتزوج بكرآ تلاعبها وتلاعبك و تضاحكها و تضاحكك؟..

فقال جابر : يارسول الله مات أبي"عبدالله بن حرام"     

( فاكرينه؟ اللى عمل قرعه مع ابنه جابر عشان يطلع يحارب فى غزوه احد .. اللي بعد وفاته النبى ﷺ قال عنه ان ربنا كلمه من غير حجاب )

فيكمل جابر كلامه و يقول : مات ابى و ترك لي تسع بنات خُرق (مش بيعرفوا يعملوا حاجه خالص، بنات صغيره ) فكرهت يا رسول الله أن آتي بخرقاء مثلهن 😊 ( بنت مش بتتحمل مسئوليه ) ..

فتزوجت يا رسول الله بأيم تقوم عليهن و تهتم بهن .. 

فإبتسم النبي ﷺ و قال: أصبت يا جابر ..

و راح قايل والله ياجابر لا نعود إلى المدينه حتى نخبر زوجتك بمجيئك فتعد لك النمارق ( يعنى المخدات .. يقصد إنها توضب البيت و تهتم ان زوجها على وصول )

فرد جابر و قال :ليس عندنا نمارق يارسول الله

فقال النبى ﷺ له : سيكون عندكم يا جابر ..

 وبعدها بشويه يقول النبى ﷺ : يا جابر هل تبعني جملك؟

( اصل كان النبى ﷺ عايز يساعده بفلوس بس كان يستحى انه يكسر بخاطره.. فحب ان يبقى مساعدته لجابر بيع و شراء) فالمهم فجابر قال: أبيع جملى لك!! هو لك هدية يارسول الله ..

فقال النبى ﷺ : لا بل أشتريه منك يا جابر..

و يصر جابر انه يعطي الجمل هديه للنبى ﷺ . و يصر النبى ﷺ انه يشتريه ،فالنبى ﷺ يهزر و يعرض مبالغ رخيصه جدا على جابر و يقول :اشتريه منك بدرهم يا جابر 😊 ؟

فيقول جابر درهم؟

فالنبي ﷺ يقول له إذن درهمين يا جابر 😊 ،

فجابر يقول له : خذه هديه يا رسول الله..

فيقول النبى ﷺ اذن آخذه يا جابر، فيقول جابر سأنزل من عليه يا رسول الله فيقوله النبى ﷺ : لا.. إركب عليه فإذا وصلنا إلى المدينه أعطنى إياه ..

فلما وصل الجيش للمدينه.. هيرجع جابر على بيته و فى تانى يوم الصبح هيروح جابر بالجمل بتاعه اللى اعطاه هديه للنبى ﷺ و يربطه فى عمود المسجد النبوى ،

فالنبى ﷺ يخرج و يسأل بتاع مين الجمل ده ؟

فيقولوا له :دا بتاع جابر ،

فينادى النبي ﷺ على سيدنا بلال و قاله خد الفلوس دى و الجمل ده و روح لجابر و قول له " رسول الله يُقرأك السلام ويعطيك ثمن الجمل ويقول لك أمسك عليك جملك بارك الله لك في أهلك ومالك و جملك"😊❤️ ..

(شايفين قد ايه النبي ﷺ جميل ❤️ وبياخد بخاطر الصحابه ويهزر معاهم .. كل ما الدنيا تيجي عليك وتحس بتعب ومشاكل... اتصبر برؤيه النبي ﷺ عند الحوض وافتكر كلامه الجميل مع جابر.. وفكر في مرافقته في الجنه ❤️ والله الدنيا ومافيها ماتسوى 🤚لحظات بس مع نبي الرحمه والتسامح..حبيبنا المصطفى ❤️.. صلوا عليه 😍

الحمد لله انك نبينا ورسولنا.. ياخير خلق الله ❤️) 

نكمل بكرة إن شاء الله ❤ 

#كن_محمديا