السيره النبويه العطره 43

 4️⃣5️⃣

#السيره_النبويه ❤️

👈(مابعد غزوه أحد) نقض القبائل للعهود مع النبي ﷺ ✋

👈محاولات لغزو المدينه وغدر قبيلتين بالنبي ﷺ ✋ 

💢خلصت احداث غزوه احد ✋✋

دلوقتي احنا سنه اربعه هجريا ،كل القبائل المحيطه بالمدينه نقضت عهودها مع الرسول ﷺ ،العهود دي كان الرسول ﷺ واخدها معاهم بعد غزوه بدر بتنص على ان رسول الله لا يحاربهم ولا يحاربوه .. بس بعد أحد و بعد ما حققت قريش خساير فى جيش المسلمين ، قالوا أن جيش النبي ﷺ مش قوي ولا حاجه و قرروا ينقضوا العهود ..

وهتبدأ القبائل تعمل محاولتين لغزو المدينه✋

👈أول محاوله لغزو المدينه كانت من قبيله بني اسد بقياده طلحه بن خويلد الاسدي (هيسلم بعد كده) ..

المهم الرسول ﷺ هيعرف من المخابرات أن جيش بقياده طلحه هيهجم على المدينه ،طيب هتعمل ايه يا رسول الله؟

هيأمر رسول الله ﷺ بخروج جيش بقياده ابو سلمه ( فاكرينه ؟ ده أول مهاجر لله و رسوله من مكه للمدينه .. و زوجته أم سلمه ) ..

المهم خرج جيش المسلمين، و طلحه اتخض لما وصلت له الاخبار دى لأنه لاقي ان الموضوع بقى جد، فخاف طلحه و خد جيشه و انسحب ✋ ،،

اصل طلحه كان متجرأ لأنه معتمد على فكره ان المسلمين تعبانين فأكيد مش هيطلعوا يحاربوه، و هيهجم على المدينه على غفله و يهزم المسلمين و ينتصر و خلاص. .

و انسحب طلحه و بكده فشلت اول محاوله لغزو المدينه، و هيرجع جيش المسلمين بقياده ابو سلمه للمدينه، بس أبو سلمه كان عنده إصابه فى غزوه احد و مستريحش، فالجرح يأثر فيه جامد و يموت رضى الله عنه و أرضاه 😔❤️

💢طيب تاني محاوله لغزو المدينه بقياده خالد بن سفيان الهذيلي ده من قبيله أسمها هذيل ✋ 

خرج خالد ومعاه جيش كبير اكبر من جيش بني اسد،، و أتجه للمدينه،، و عسكر فى منطقه قريبه من المدينه و طبعا دي كارثه!!..

وصلت للنبى ﷺ الاخبار و جيش المسلمين تعبان فمكنش فى حل غير ان المعركه تخلص من قبل ما تبدأ ..يعنى لا المسلمين يخرجوا يحاربوا .. ولا الجيش اللى مع خالد يهجم على المدينه، طيب ازاي ده هيحصل ؟🤔

هيستدعي النبي ﷺ صحابي اسمه عبدالله بن انيس ..

ده كان عنده عشرين سنه،فيقول له: لبيك يا رسول الله، فيقول النبي ﷺ اخرج واذهب إلي المعسكر واقتل خالد بن سفيان و أرجع إلينا ،،فقال : يا رسول الله !!!،

فقال النبى ﷺ : اذهب يا عبد الله ..

فعبد الله مخضوض فقال يارسول الله كيف اعرفه!! ( يعنى دى مشكله عبد الله !!انه بس مش عارف شكله !! طب مفكرتش ازاى هتعمل ده اصلا!! طبعا ده عشان حبه للدين و ثقته فى النبي ﷺ )

فيرد النبي ﷺ عليه و يقول له : إذا رأيته وجدت لبدنك قشعريره وتذكرت الشيطان..

و بعدين خرج عبد الله و قال : أنا مكنش قدامى غير انى انفذ و اطيع امر رسول الله ﷺ .. 

فبيقول عبد الله : فأخذت سيفى و خرجت و لبست لبس الحرب و الحديد على وجهى و اقتربت فوجدت جيش كبير، فقلت الحرب خدعه ،فدخل بينهم فقالوا من انت؟✋

قال رجل يحمل من الكره لمحمد اكثر منكم..

فطبعا رحبوا بيه ودخلوه ،،و فضل يبص و يدور على خالد بن سفيان قبيقول عبد الله بن انيس : فسقطت عيني على رجل فأقشعر بدني وتذكرت الشيطان فقلت صدقت يا رسول الله ،، صلي الله على سيدنا محمد ❤️

طيب عبدالله لاقى خالد..و خلاص هيبدأ يروح يقتله .. بس جه وقت صلاه العصر .. طيب هتصلي يا عبد الله؟🤔

اه ..لان عبد الله خاف يوصل لخالد و يشك فيه و يتقتل عبدالله وهو عليه فرض :) ..

و فعلا يا جماعه هيصلى عبدالله .. رغم كل المخاطر اللي حواليه و رغم المهمه الكبيره اللي رايح يعملها فى سبيل الله والاسلام.. 

طيب هيصلي ازاي عبد الله ؟🤔 ..

بيقول عبد الله : أخذت أومأ براسي و انا امشى ..

طبعا ده ذكاء و فقه من عبد الله يعنى مش ينفع يصلي بصوت عالي والله اكبر و يلا.. لا طبعا ..المسلم فطن و بيفكر،،لاقى حل عشان يصلي ويكمل مهمته و مقلش مش هصلى ^_^ ..

المهم وصل عبد الله لخالد فقال خالد من الرجل؟

فقال عبد الله : رجل يحمل من الكره لمحمد اكثر منك ، وسمعت بجمعك هذا و جيشك هذا ،فجأت أفعل كما تفعل،، فقال خالد: اجل..

و بيحكى عبد الله و يقول : فظللت اتودد اليه حتي جعلني حارسه الخاص ( بيخطط ويفكر و اكيد اخد مده عشان يوصل لكده) المهم فى ليله دخل عبد الله بن انيس بعد ما خلاص بقى حارس من حراس خالد ..

فدخل لخيمه خالد و قتله فصرخت النساء فأنطلق عبد الله من الخيمه يجري و أتجمع ناس من الجيش عشان ييجروا وراه ،، فشاف عبد الله كهف فأستخبى فيه تلات ايام ،

 فبيقول : كنت لا اجد الا ورق الشجر آكله،،حتي تشتت الجيش و عدت إلى المدينه .. عبد الله راجع بسرعه يبشر النبى ﷺ 🤗

طيب دلوقتى النبي ﷺ فين؟ 🤔

كان واقف على باب المدينه قلقان مش بينام لحد ما شاف عبد الله داخل المدينه من بعيد فقال له: اافلح الوجهه؟

فرد عبد الله و قال : فعلتها يا رسول الله،

فقال النبي ﷺ الله اكبر.. الله اكبر فراح النبي ﷺ واحتضنه ،، وقال له تعال يا عبد الله أكافئك ❤️🤗. 

ففرح عبد الله و راح مع النبي ﷺ لحد بيته ،

فالنبي ﷺ قال له: انتظر ..

و دخل النبي ﷺ بيته،وعبد الله كان متشوق بهديه النبي ﷺ ، فخرج النبي ﷺ من بيته واعطي لعبد الله "عصا "فبص له عبد الله..

فالنبي ﷺ قال له: خذها يا عبدالله فأخدها وقال: اجل..( بكل ادب عبد الله بيتصرف مع رسول الله،، أخد عبد الله العصايه و مسألش إيه ده )..

المهم فضل يقلب فيها يمين وشمال ،جايز فيها قوه خارقه او اى ميزه بس طلعت مش بتعمل اي حاجه! ..

فالصحابه قابلوه و سألوه : ماذا اعطاك رسول الله ؟ فقال :هذه العصا،، فقالوا له: وما تفعل !! عد الي رسول الله فأساله ..

فقال : ما كنت لأفعل هذا،

بس ضغطوا عليه انه يروح للنبي ﷺ و يسأله ..

فراح وقال يا رسول الله ما تفعل هذه العصا؟

فقال النبي ﷺ : يا عبدالله خذ هذه العصا علامه بيني وبينك يوم القيامه، فإذا رايتك عرفتك وادخلتك بها الجنه.

فقال عبد الله : فكانت احب شئ إليا ❤️❤️..

فكنت اذا نمت اخذتها بجانبي واذا قاتلت كانت معي وامرت ان تدفن معي، حتي اذا انشق عني القبر ابحث عن رسول الله واقول انا عبد الله بن انيس وهذه العصا التى اعطيتنى إياها .. وادخل الجنه 🤗❤️

💢شايفين ازاى النبى ﷺ ربط و علق قلب عبد الله بالجنه 😊، اي حد عاوز يعيش مرتاح يعلق قلبه بالجنه،كل حاجه ف الدنيا فيها تعب و محتاجه جهاد 

قال تعالى : " لَقَدْ خَلَقْنَا الْإِنسَانَ فِي كَبَدٍ ".

يعنى الدنيا كلها تحديات و راحتك الحقيقه فى الاخره فى الجنه ،فاللي نفسه فى حاجه ومخدهاش .. ميزعلش.. هياخدها فى الاخره، واللي اتظلم فى الدنيا حقه هياخده ، والفقير هيبقي غني فى الجنه، يوم القيامه سيدنا محمد ﷺ هيبقى واقف على الحوض و معاه عصا يوم القيامه ،

طب ليه يا سيدنا النبي؟🤔

قال : اذب بها الامم عن الحوض حتي تأتوا أنتم أولا فتشربون فإذا شربتم فارتويتم.. سمحت لباقي الامم ان يشربوا. تخيلوا !! كل الامم عاوزه تشرب من حوض سيدنا محمد،، بس النبى ﷺ عايز يشربنا احنا الاول ..

حتى فى الاخره همك هو احنا يا رسول الله و شاغل نفسك بينا ومش هترتاح غير لما امتك تشرب وترتوي..

طيب شكل اللى هتشربه من حوض النبي ﷺ ايه؟🤔

ابيض من اللبن واحلي من العسل من شرب منه شربه هنيئه لا يظما بعدها ابدا 🤗

مره سيدنا انس راح للنبي ﷺ وقال : يا رسول الله يوم القيامه أين أتيك؟

( ألاقيك فين يوم القيامه؟ شايفين ازاى واثق انه هيشوفه هناك.. شايفين اليقين و الإيمان بالله واليوم الاخر)

 فالنبى ﷺ رد عليه و قال له: عند الصراط ،

 فقال أنس ارايت ان جئت ولم اجدك ؟

فقال النبى ﷺ : أأتنى عند الميزان ،،

قال ارايت ان جئت ولم اجدك؟

فقال النبي ﷺ : أأتنى عند الحوض .. فأنا لا اغادر هذه الثلاث.. (اللهم تقبلنا مرافقين للنبي ﷺ في الجنه وارزقنا شربه بيده لانظمأ بعدها أبدًا 🤲🤲)

❤️❤️❤️❤️❤️ صلوا على النبى ❤️❤️❤️❤️❤️

💢 بدأت القبائل تحاول محاولات خبيثه.. محاولات غدر..

قبيلتى عضل و قارة .. ناس منهم راحت للنبى ﷺ و قالوا عاوزين نتعلم الدين فأبعت معانا من اصحابك ناس يعلمونا و يكونوا من العلماء ..

طب اشمعنا طلبوا كده ؟ 🤔

لان الأمه بتتهد بموت علمائها ✋

فالمهم هيبعت النبي ﷺ سته من احب الصحابه لقلبه و جعل عليهم قائد اسمه عاصم بن ثابت ..ومن ضمن الصحابه السته صحابى اسمه مرثد بن ابي مرثد الغنوي..

👈ونحكي قصه لمرثد قبل إسلامه 😊..

كان مرثد له علاقه بإمرآه ( علاقه فاحشه) و كان المرأه دى اسمها عناق .. و لما اسلم سابها ..

و النبى ﷺ كلفه مهمه صعبه اوى و هي انه يحمل الضعفاء المسلمين من مكه للمدينه عشان يقدروا يهاجروا ..

و فى يوم شافت عناق مرثد قالت له : يا مرثد تعال بت عندنا الليله ، فرفض مرثد و قال : يا عناق ان الله قد حرم الزنا فقالت : اذن افشي سرك ،و بصوت عالى راحت قايله : "يا معشر قريش ادركوا مرثد يحمل أسراكم " اصل مرثد ساعتها كان معاه واحد شايله ..فجري بيه لحد ما لقى كهف فأستخبى فيه مع الرجل و بعد ايام حمل الرجل و كمل فى طريقه فى الهجره للمدينه ..

و لما وصل مرثد المدينه حكي للنبى ﷺ اللى حصل

و قال له : يا رسول الله أأتزوج عناق ؟🤔

فالنبي ﷺ مردش و أدار وجهه .. فقام مرثد جى من الناحيه التانيه و كرر السؤال .. أأتزوج عناق يا رسول الله؟..

فالنبى ﷺ يسكت و يكرر مرثد نفس السؤال ..

و تنزل الآيه القرآنيه ✋

قال تعالى : "الزَّانِي لَا يَنكِحُ إِلَّا زَانِيَةً أَوْ مُشْرِكَةً وَالزَّانِيَةُ لَا يَنكِحُهَا إِلَّا زَانٍ أَوْ مُشْرِكٌ وَحُرِّمَ ذَٰلِكَ عَلَى الْمُؤْمِنِين"،

فالنبي ﷺ قال له : يا مرثد لا تفعل ان الله حرم عليك ذلك.. ( طبعا حرام عشان هي لسه زانيه.. لكن لو تابت خلاص..لأن التائب من الذنب كمن لا ذنب له) ..

💢المهم مرثد مع الصحابه السته في الطريق مع القبائل عند منطقه بئر ماء اسمه الرجيع هيحصل حاجه غريبه.. هيحصل غدر 😔 ✋✋

هيبدأ الأشخاص اللى تبع عضل و قاره ينادوا على بعض فيتجمع ١٠٠ من المشركين و يحيطوا بالصحابه، و يقولوا هناخد الصحابه أسرى و نبعهم لقريش تقتلهم،

فالصحابه أتخضوا و قالوا : أليس بينكم وبين الرسول عهد!! فقالوا: لا عهد بعد غزوه أحد..

فالقائد اللى مع الصحابه "سيدنا عاصم بن ثابت" قال: أما أنا فلا أنزل على ذمه كافر، فوقف عاصم يقاتلهم و يحاربهم..بس قتلوه :'( ..

و بعدين قالوا : لقد ندرت سلافه بنت سعد ان من قتل عاصم بن ثابت و يقطع راسه فستعطيه مئه ناقه ✋

( اصل سلافه كان عندها ولدين و عاصم قتلهم فى احد ودي كانت حرب،، فقالت اللي يجيب راس عاصم، حهعطي له مائه ناقه و هفرغ راس عاصم من المخ وكل حاجه وأملأها خمره واشرب) ..

فبعد ما الكفار قتلوا عاصم..قرروا يقطعوا راسه لكن عاصم قبل ما يتوفي قال : "اللهم اني حميت دينك اول النهار فأحمي بدني آخره" 

أصل عاصم كان سامع اللي عايزين يعملوه ✋

فبقى يدعى ان ربنا ميخليكش الكفار يعملوا فيه كده..

و فعلا ربنا مش هيسيبه..

قال تعالى : إِنَّ اللَّهَ يُدَافِعُ عَنِ الَّذِينَ آمَنُوا ..

فربنا يبعت دبابير تحوم حوالين جثه عاصم ..

فيجي الكفار عايزين يفصلوا راسه عن جسمه فالدبابير تلسع ايديهم و وشوهم .. فيقولوا : " دعوا جثه عاصم لليل ".. فربنا عزوجل يبعت شتا جامد جدآ فالمايه تشيل جثه عاصم و محدش يقدر يلاقى جثه عاصم أبدآ..

قال تعالى : " وَمَا يَعْلَمُ جُنُودَ رَبِّكَ إِلَّا هُوَ " ..

ولما وصل لسيدنا عمر اللى حصل لعاصم قام قايل : يحفظ الله العبد المؤمن فى وفاته كما يحفظه فى حياته ✋🤗

💢طيب بعد ما الكفار قتلوا عاصم 😔 حصل ايه ؟🤔

اتفزع الصحابه و رفعوا اسلحتهم عشان يدافعوا عن نفسهم فأتقتل أتنين كمان غير عاصم ..

اصل عدد الكفار كبير كان ١٠٠ و أتأسر خبيب و زيد و عبد الله بن طارق و اتكتفوا بالحديد ، فعبدالله بن طارق حاول انه يفلت منهم فقتلوه، و بكده مات اربعه من الصحابه و اتبقى اتنين ..خبيب و زيد ..

فالكفار خدوا خبيب عشان يبيعوه لبني حارث لان خبيب قتل حد منهم فى غزوه احد.. فبنى حارث خدوه لكن مقتلهوش.. طب ليه؟ 🤔

لانهم كانوا فى الاشهر الحرم و الكفار فى منهم ناس كانوا بيعظموا الأشهر الحرم زى تعظيمهم للكعبه رغم كفرهم..( شايفين !! ..الكافر عنده مبدأ و رساله.. أه رساله سيئه.. بس عنده حاجه عايش ليها.. و رغم كده فى مسلمين كل اللى بيعملوه فى حياتهم أنهم ياكلوا و يشربوا و يناموا.. عايشين بلا هدف و بلا رساله) .

المهم بنى حارث حبسوا خبيب و كان فى بنت منهم مسئوله انها تحط لخبيب الأكل و الشرب ، البنت دى قالت : والله ما رايت ف حياتي أسيرآ خيرآ من خبيب،،

وبتقول:" والله كنت ادخل عليه بالطعام.. فأراه يأكل قطف من عنب وما فى مكه حب من عنب فعلمت ان هذا العنب رزق من الله لخبيب"..

سبحان الله ❤ 

فلما قرب موعد قتل خبيب.. طلب من البنت دى انها تعطى له موس .. طب ليه؟ 🤔

( خبيب عايز يقص أظافر إيديه و يهذب الشارب بتاعه ..عايز يقابل ربنا و هو نضيف )..

فبتحكى البنت و بتقول : فجئت بالموس و اخذه ..و غفلت ..فذهب ابني إليه و كان يحبه ♡ و خبيب فى إيده الموس ..فأستيقظت فوجدت ابني فى حجره والموس فى يد خبيب،، فشهقت شهقه فهمها خبيب ( هي خايفه خبيب يقتل ابنها بالموس ) فقال لها خبيب : أتخافين ان اقتله؟..

فمردتش من الرعب، فقام قايل لها : ما كان لي أن أفعل هذا و أنا من أصحاب رسول الله ..

فيكمل كلامه و يقول : قم يا بني و أذهب إلى أمك ..❤️

( على فكره خبيب كان يقدر ياخد الولد رهن عشان تفكه و يهرب، بس اصحاب النبي ﷺ ميجوش جنب الاطفال ♡)

المهم عدت الأشهر الحرم و بنى حارث اخدوا خبيب .. فييجى ابو سفيان و يقول لخبيب : أتريد شئ قبل ان تموت؟ ( ودي أول مره كانت تتسال لواحد قبل ما يموت.. و بقت تتطبق لحد دلوقتى ) ✋

فقال خبيب : أجل ، دعني اصلي ركعتين.. فصلي خبيب و راح قايل والله لولا ان تقولوا ان ما بي جزع من القتل لأطلت فى الركعتين ما شاء لله لي ان أطيل ولكني اشتقت الي لقاء ربي ..

فيسأله ابو سفيان و يقول له : يا خبيب.. أيسرك و يسعدك ان يكون محمد عندنا بدلآ منك و نضرب عنقه و تكون أنت فى اهلك ؟

فقال خبيب: لا والله ما يسرني ان اكون فى اهلي و أن يكون رسول الله فى مكانه الذي هو فيه و تصيبه شوكه تؤذيه ❤ فيتصلب خبيب و يأمر ابو سفيان انه يضربه الرجال بالسهام فى رجله و ايده عشان عايز خبيب يموت بالبطئ .. فيدعى خبيب عليهم بكل قوه و يقول دعاء قوى جداااا جدااا

✋😢🤲

نكمل بكرة إن شاء الله ❤ 

#كن_محمديا