السيره النبويه العطره 41

 

#السيره_النبويه ❤️

👈موت سيد الشهداء وأسد الله ورسوله سيدنا "حمزه" عم النبي ﷺ على يد "وحشي" وحزن رسول الله ﷺ😔

💢بعد محاصره الكفار للنبي ﷺ والصحابه يبدأ سيدنا حمزة " عم رسول الله " يحس ان المعركة بقت غير متكافئة, فبدأ يفكر المسلمين خسروا ليه؟🤔 ..

فيلاقى ان السبب هو نزول الرماة من فوق الجبل ,

فسيدنا حمزه بدأ يفكر انه يرجع يسيطر مرة تانية على جبل الرماة, وساعتها الموازين هترجع فى صالح المسلمين مره تانيه لأن ده جبل إستراتيجى جدا فى المعركه 👌 

فقرر سيدنا حمزة التوجه بمنتهى القوة والشجاعة لجبل الرماة, و فضل يقاتل و يقاتل كالأسد وكان بيحارب بسيفين .. تخيلوا !! ده حاجه صعبه اوى انه يشيل سيفين ويقاتل بيهم, لأن السيف تقيل جدا.. فده بيخلينا نعرف ان بنية سيدنا حمزة الجسمانية كانت عظيمة..

ففضل سيدنا حمزه يقاتل لحد ماوصل تحت جبل الرماة...

فكان فيه راجل من كفار قريش اسمه: "الجبير بن مطعم بن عدى" ( عم الجبير بن مطعم كان اسمه "طعيمة " وده اتقتل يوم غزوة بدر) ..

فالجبير كان عايز ينتقم لمقتل عمه فقام الجبير جايب عبد أسود اسمه "وحشى" وقال له: " يا وحشى, لئن ذهبت الى أحد, وقتلت عم محمد بعمى طعيمة, لك حريتك" فوحشى كل اللى يهمه انه يتعتق و ياخد حريته ، فمش فارق معاه هيقتل مين, فوافق طبعا ✋..

(وكمان هند بنت عتبه كانت وراء تجنيد وحشي لقتل سيدنا حمزه لانه قتل أبوها وأخوها في بدر ) ..

فبيقول وحشى: "فخرجت الى يوم أحد, فرأيت حمزة "عم رسول الله " يقتل قتال الأسود تحت جبل الرماة, وكان يهز الناس بسيفه هزآ, فأختبأت له خلف جبل من الجبال كى لا يرانى وكانت معى حربتى وكنت ماهرا فى الحراب, ما أضرب بحربتى ضربة الا وسقطت مكان ما أريد ..

فبيكمل وحشى كلامه و يقول : فرأيت حمزه يطلع على جبل الرماة, فهززت حربتى, حتى رضيت عنها وكنت فى ظهر حمزة, فأطلقت الحربه.. فسقطت فى ظهر حمزة, فخرجت من بين قدميه😔.

فالتفت لى حمزة, فنظر لى نظرة, عرف منها أننى القاتل, فمن خوفى منه, ما استطعت أن اتحرك وثبت فى مكانى. فظل حمزة يشتد أمامى (بيحاول يقوم و يروح ناحيتى) يريد أن يقتلنى, و انا من خوفى ثبت مكانى .. فما ان وقف حمزة أمامى رافعا سيفه حتى غلبه جرحه, فسقط ميتا" 😢😢

💢 "هند بنت عتبة" كان ليها تار مع سيدنا "حمزة" لانه قتل أبوها وأخوها يوم بدر.. فجريت هند و وصلت لجثة سيدنا حمزة, و الناس حكت و قالت "فجاءت هند, و وقفت عند حمزة تقول شعر : شفيت نفسى, وقضيت نذرى .. شفيت غليل صدرى, فشكر وحشى على عمرى, حتى ترم أعظمى فى قبرى ..ثم جاءت بخنجر, وبقرت بطن حمزة, ثم أخرجت الكبد, وعصرت الكبد, وحاولت تمدغ الكبد, فقد نذرت ان تشرب من دم حمزه ولكنها جزعت فمجت الدم ( لما حطت الكبد فى بقها مقدرتش تبلعه و بصقت الدم 😮)

(على فكره هند هتأسلم ..مستحيل دم شهيد يختلط بدم مشركة.. هتسلم و رسول الله هيعفى عنها وهتشارك فى انتصارات للمسلمين بعد كده ✋) ..

المهم وقف "أبو سفيان" زوج هند يضحك.. مش مصدق نفسه ان حمزه مات , وجه جنود من قريش وكسروا فك حمزة بخنجر, لدرجه ان ضاعت ملامح وجهه 🥺😔..

فشاف المشهد ده واحد من الصحابه , فجرى على النبى ﷺ وقال له: "يا رسول الله, رأيت مقتل حمزة, رأيت مقتل حمزة" فشهق النبى ﷺ شهقة لدرجه ان الصحابى فكروا النبى ﷺ هيموت.. وطلع النبى ﷺ يجرى و وراه الصحابه, لحد ما وصل لجثه حمزه "عمه" , ففضل النبى ﷺ يبكى ويبكى حتى ابتلت لحيته 😢😢 ..

النبى ﷺ بيخسر حبايبه.. النبى ﷺ قلبه موجوع و مقهور..

كل ده عشان ايه؟ عشانك وعشانى, عشان بس نبقى مسلمين.. عشان نعرف الدين الحق ✋

وضاقت صدور الصحابة من بكاء النبى ﷺ 😢,مش قادرين يتحملوا رؤية بكاء النبى ﷺ. ففضل النبى ﷺ يبكى و راح قايل "والله, لن أصاب بمثلك أبدا يا عمى" ( عمرى ما هشوف وجع فى حياتى قد وجعى فى موتك يا عمى ) ..

(ياحبيبي يارسول الله.. بأبي انت وأمي 😢❤️) 

و رغم اللى حصل لسيدنا حمزة, وقف النبى ﷺ فى وسط المعركه وقال للمسلمين : "انى أنهاكم عن المثلة, انى أنهاكم عن المثلة" يعنى ممنوع تمثلوا بجثث الكفار, ودى قمة الرحمة, يعنى بعد اللى النبى ﷺ شافه كان ممكن جدا ينتقم ويعمل ده مع الكفار, ولكن النبى ﷺ رفض و محصلتش من النبى ﷺ ابدآ ✋.

💢 بعد كده هيقول النبى ﷺ للصحابه: "والله رأيت حمزة تغسله الملائكة" مع ان الشهيد لا يغسل, ولكن الاغتسال دة اكراما لسيدنا حمزة ..والنبى ﷺ هيصلى على سيدنا حمزة ٧٠ صلاة, طب ازاى؟🤔

اصل بعد انتهاء المعركة.. بيبدأ النبى ﷺ يصلى على شهداء المعركه واحد ورا التانى .. فكان النبى ﷺ سايب جثة سيدنا حمزة فى مكانه ، و كل شويه يحطوا جنب حمزه واحد من الشهداء.. فالنبى ﷺ يصلى عليه وبعدين يشيلوه ويحطوا جثة شهيد تانى و يصلى عليه و يشيلوا و يجيبوا شهيد تالت, و كل ده وجثة سيدنا حمزة فى مكانها.. فكان شهداء غزوة أحد ٧٠ شهيد , فبكدة النبى ﷺ صلى على سيدنا حمزة ٧٠ صلاة ..رضى الله عنه وأرضاه ..

تعرفوا ان من كتر بكاء النبى ﷺ على سيدنا حمزة, ربنا الجبار سبحانه وتعالى الذى يجبر كسر القلوب, هيجبر النبى ﷺ ويبعت له سيدنا جبريل من فوق سبع سماوات فيقول له: "يا رسول الله, هون عليك .. والله يا رسول الله, فى السماء السابعة رأيت مكتوبا عند الله تبارك وتعالى: "حمزة سيد الشهداء, أسد الله وأسد رسوله" فيهدأ النبى ﷺ ❤️ 

❤️❤️❤️❤️❤️صلوا على النبي ❤️❤️❤️❤️❤️

💢و يندفن سيدنا حمزة فى مكانه فى أرض المعركة, و بعد ٤٠ سنة من غزوة أحد, هيصل سيل فتنجرف طبقة من أرض المدينة, فبسرعه أمر أمير المدينة بنقل جثث شهداء أحد و حطوها فى مكانها اللى مدفونين فيه لحد دلوقتى 👌..

وقالوا انهم لما فتحوا على سيدنا حمزة قبره, لاقوه بينزف ودمه زى ماهو .. الجرح ينزف دمآ, كأنه لسه مقتول حالا..

َومات سيدنا حمزه <3 ويسيب فى قلب النبى ﷺ جرح لن يلتئم الا بلقاء حمزة فى الجنة.. و هيقول النبى ﷺ يوم أحد: "دم وحشى هدر" قصاص طبعا ..

ففى يوم خرج وحشي من مكة ودخل المدينة متلثم و فاجئ النبى ﷺ و وقف قدامه , وكشف الغطاء عن وجهه وقال: "أشهد أن لا إله إلا الله, وأنك رسول الله"

فقال النبى ﷺ : "من؟" قال: "وحشى"

فقال النبى ﷺ : "أنت وحشى؟"

قال: " نعم يا رسول الله, و جئتك مسلما"

قال النبى ﷺ: "قتلت حمزة يا وحشى!"

فقال: "نعم يا رسول الله"

فقال النبى ﷺ : "يا وحشى ،هل تستطيع أن تغيب وجهك عنى :'( .. فيبكى وحشى ويقول: "أجل يا رسول الله" ..

و يقول وحشى : "فكنت أبتعد عن الطرقات التى يسير فيها النبى ﷺ , حتى لا أؤذيه ( اضايقه بأنه يفتكر اللى حصل لحمزه )"

و تمر الأيام و يروح وحشى للنبى ﷺ تانى ويقول له: "السلام عليك يا رسول الله" فيرد النبى ﷺ ..و وحشى ساكت. فيسأله النبى ﷺ : "أنت وحشى؟" قال: " اجل يا رسول الله" فيقول النبى ﷺ : "قتلت حمزة يا وحشى!"

فيقول: "أجل يا رسول الله"

فيقول النبى ﷺ : "يا وحشى, هل تستطيع أن تغيب وجهك عنى" فيبكى وحشى ويقول: "أجل يا رسول الله" ...

( النبى ﷺ مستنكر.. مش مصدق ..ازاى قدرت يا وحشى تقتل حمزه.. ماشى وحشى أسلم.. و خلاص محدش هيقتله و لا هيقتص منه.. بس النبى ﷺ مش قادر ) ..

قلبه رقيق صلى الله عليه وسلم ❤️ 😢

وحشى حالته صعبه جدا, تخيلوا انه اسلم والنبى ﷺ هيبقى قدامه, بس مش هيعرف يتمتع بالنبى ﷺ !! يعنى عايش مع النبى ﷺ بس محروم منه ..والله الموت أهون من وضع سيدنا وحشى ✋..

تخيلوا ان ده هيبقى حال بعض الناس يوم القيامة يقولَ النَّبِيُّ ﷺ : "إِنِّي فَرَطُكُمْ عَلَى الْحَوْضِ ،مَنْ مَرَّ عَلَيَّ شَرِبَ ، وَمَنْ شَرِبَ لَمْ يَظْمَأْ أَبَدًا ،لَيَرِدَنَّ عَلَيَّ أَقْوَامٌ أَعْرِفُهُمْ وَيَعْرِفُونِي ، ثُمَّ يُحَالُ بَيْنِي وَبَيْنَهُمْ ، فَأَقُولُ : إِنَّهُمْ مِنِّي ،

فَيُقَالُ : إِنَّكَ لَا تَدْرِي مَا أَحْدَثُوا بَعْدَكَ ، فَأَقُولُ : سُحْقًا ، سُحْقًا ، لِمَنْ غَيَّرَ بَعْدى" ..🥺🥺

هتبقى صعبة أوى ان النبى ﷺ يبقى قدامك بس مش عارف تبوس ايده 😔 فاللهم لا تحرمنا بذنوبنا و اهدنا الصراط المستقيم 🤲🥺

💢 طيب وحشى هيفوت ٤ ايام ويرجع تانى للنبى ﷺ , فالمره دى النبى ﷺ يقول له : "يا وحشى, اجلس" فيفرح وحشى. ويجلس, فيقول له النبى ﷺ :" يا وحشى, حدثنى, كيف قتلت حمزة؟"

فيبدأ يوصف للنبى ﷺ بالظبط مقتل سيدنا حمزة,

والنبى ﷺ ماكنش يعرف كل التفاصيل دى,

فبكى النبى ﷺ وقال له:" أقسمت عليك, غيب وجهك عنى" فبكى وحشي .. و يغيب ايام و يرجع تانى .. 

خايف يموت قبل ما النبى ﷺ يرضى عنه ..

و قبل وفاة النبى ﷺ, يروح له وحشى..

فالنبى ﷺ يقول له أنت وحشى!" فقال اجل يا رسول الله.. فيقول النبى ﷺ : قتلت حمزة يا وحشى!"

فقال وحشى: "اجل يا رسول الله, الحمد لله الذى أكرمه على يدى, ولم يهنى على يديه" .. ( ربنا اكرمه بالشهاده على ايدى ) فأقتنع النبى ﷺ وسكت ونظر الى الأرض ثم رفع رأسه وخبط على كتف وحشى وقال: " يا وحشى, اذهب, فقاتل فى سبيل الله, كما قاتلت فى الصد عن سبيل الله"

وابتسم النبى ﷺ له, ففرح وحشى جدا 🤗..

(ياحبيبي يارسول الله ❤️ رحمه العالمين)

وتلف الأيام و هنشوف ان بعد ما وفاه رسول الله صلى الله عليه و سلم. هيطلع واحد كافر اسمه "مسيلمة الكذاب" الراجل ده ادعى انه نبى بعد سيدنا محمد.. فهيتربص له وحشى فى معركة اليمامة ويقول: "والله أنا قاتله" ويدخل المعركة ويعمل مع مسيلمة نفس اللى عمله بالظبط مع سيدنا حمزة وبنفس الحربة اللى قتل بيها سيدنا حمزة. يقف وحشى على هضبة فى أرض المعركة و ينشن على مسيلمه و يقتله ..يقوم يبكى ويقول: "والله, قتلت بحربتى هذه خير الناس, وقتلت بها شر الناس, قتلت مسيلمة لأكافئ به حمزة يوم القيامة" .. 👌

💢و وسط احداث غزوه احد ، بدأ القرآن ينزل أثناء الأحداث دى كلها, و كان ده ملائم جدا لنفسية الصحابة, الصحابة كانوا تعبانين جدا لانهم حسوا ان همه السبب فى كل اللى حصل, بالذات ال٤٠ رامى اللى كانوا واقفين على جبل الرماة, و دة فعلا حقيقى. فتبدأ الآيات تنزل فى سورة آل عمران :

"وَلاَ تَهِنُوا وَلاَ تَحْزَنُوا وَأَنتُمُ الأَعْلَوْنَ إِن كُنتُم مُّؤْمِنِينَ, إِن يَمْسَسْكُمْ قَرْحٌ فَقَدْ مَسَّ الْقَوْمَ قَرْحٌ مِّثْلُهُ وَتِلْكَ الأَيَّامُ نُدَاوِلُهَا بَيْنَ النَّاسِ وَلِيَعْلَمَ اللَّهُ الَّذِينَ آمَنُواْ وَيَتَّخِذَ مِنكُمْ شُهَدَاء وَاللَّهُ لاَ يُحِبُّ الظَّالِمِين َ"

وتنزل الآيات تهدى الصحابة, وربنا يقول لهم :

"إِن تَكُونُوا تَأْلَمُونَ فَإِنَّهُمْ يَأْلَمُونَ كَمَا تَأْلَمُونَ وَتَرْجونَ مِنَ اللَّهِ مَا لا يَرْجونَ وَكَانَ اللَّهُ عَلِيماً حَكِيماً "

و النبى ﷺ زعلان من ال ٤٠ رامى اللى نزلوا ومسمعوش كلامه ..فيبدأ القرآن يطيب خاطر النبى ﷺ فيقول له :

"فَبِمَا رَحْمَةٍ مِّنَ اللَّهِ لِنتَ لَهُمْ وَلَوْ كُنتَ فَظًّا غَلِيظَ الْقَلْبِ لَانفَضُّوا مِنْ حَوْلِكَ فَاعْفُ عَنْهُمْ وَاسْتَغْفِرْ لَهُمْ "

شايفين حنان ربنا مع النبى ﷺ , بيقول له سامحهم يا رسول الله, واعف عنهم , لان ببساطة دين الاسلام هو دين السماحة و الرحمة و العفو.. وتنزل آية تلم شمل الجيش كله, وتبين قيمة سيدنا محمد و مكانته فى قلوب الصحابة وهى :" لَقَدْ جَاءَكُمْ رَسُولٌ مِّنْ أَنفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُم بِالْمُؤْمِنِينَ رَءُوفٌ رَّحِيمٌ " ..

💢احنا دلوقتى فى أرض المعركة, سيدنا حمزة ميت, وأخته اسمها "صفية بنت عبد المطلب" سمعت خبر مقتل سيدنا حمزة, فجريت على أرض المعركة و معاها كفنين,

فرآها النبى ﷺ وكان واقف جنبه "الزبير بن العوام"

فالنبى ﷺ قال له: "يا زبير! المرأة المرأة", النبى ﷺ عارف اسمها, بس النبى ﷺ كان مفزوع جدا ومش عايزها تشوف منظر أخوها سيدنا حمزة فبيقول للزبير إلحق بسرعه متخليهاش تقدر تشوف حمزه..

فأنتبه الزبير فراح لها ووقف قدامها وقال: "يا صفية! ارجعى"

فقالت: "اليك عنى" , فقال لها: "ارجعى",

فقالت: "اليك عنى, لا أرضى لك" , وضربته ضربة فى صدره عشان يبعد عنها وجعت الزبير ..

الزبير بيحكى عن صفيه و قال : "كانت امرأة جلدة" ( يعنى امرأة قوية .. اخت سيدنا حمزه يا جماعه ^_^♡ ) ..

المهم فقال لها الزبير: "رسول الله يعزم عليكى"

(يعنى النبى ﷺ بيحلفك ان بلاش تشوفى حمزه)

فبيحكى الزبير و يقول : "فلما قلت هذا ..سكتت"

وقالت: "أجل, الطاعة لله ولرسوله"

ثم قالت: "جئت بهذا الكفن, خذه!"

وفعلا أخذ سيدنا الزبير الكفن و مشيت السيدة صفية. وصف سيدنا الزبير الكفنين بأنهم كانوا طوال جدا, فالزبير شاف ان الأحسن انه يقسم الكفنين بين سيدنا حمزة و الأموات التانيين و فعلا كفنوا سيدنا حمزة بكفن طويل,

والكفن التانى كفنوا بيه ٢ من الأنصار بجانب سيدنا حمزة, وبكده خير سيدنا حمزة امتد على اللى حواليه حتى بعد موته, رضى الله عنه وأرضاه سيدنا حمزه أسد الله ❤️❤️ 

💢 طيب المعركه لسه مازالت غير متكافئة, و المسلمين تعبانين جدا, فالنبى ﷺ كان عايز المعركة تقف, و بعدين ينسحب المسلمين و تنتهى المعركه على كده..

ياترى سيدنا النبي ﷺ هيعمل ايه؟ ✋

نكمل بكرة إن شاء الله ❤ 

#كن_محمديا

👈لاتنسى الإعجاب بالصفحه ليصلك الحلقات الجديده 👍