السيره النبويه العطره 39

 

#السيره_النبويه ❤️

👈اشتداد القتال بغزوه " أحد" 💪

👈انتصار ساحق للمسلمين ولكن تحدث مفاجأه 😮✋

👈إشاعه قتل النبي ﷺ و إرتباك جيش المسلمين 😔

💢شفنا جيش قريش فى طريقه للإعتداء على المسلمين و شفنا رسول الله ﷺ و هو بيحط الخطه لرد العدوان و قولنا ان كل الاماكن اتأمنت ما عدا جبل صغير .. ده محتمل ان جيش قريش يلف من وراه و يجى يحاصر جيش المسلمين.. فهتعمل ايه يا رسول الله ﷺ ؟🤔

بدأ رسول الله ﷺ يخلى على الجبل ده ٥٠ مقاتل من أمهر الرماه.. و كان الامير بتاعهم الصحابى الجليل عبد الله بن الجُبير ..و كل اللى مطلوب منهم أنهم يوقفوا ماسكين نِبال و سهام و يبقوا متربصين لأى حد من قريش يفكر يلف من ورا الجبل و بكده جيش قريش مش هيقدر يحاصر المسلمين و الجبل بقى اسمه جبل الرُماة 👌

طيب دلوقتى أبو سُفيان جه بجيش قريش ،

وكانت ميمنه الجيش من ٣٠٠ فارس مقاتل بقيادة خالد بن الوليد "قبل اسلامه" و الميسرة بقيادة عكرمة بن أبى جهل و معاه ٧٠٠ مقاتل وأبو سُفيان معاه فى النص ٢٠٠٠ مقاتل وكانت خطة أبو سُفيان أن خالد و ال٣٠٠ فارس اللى معاه يحاصروا المسلمين عند جبل الرُماة و عكرمة يحاصرهم من الناحيه التانيه و أبو سُفيان يدخل من النص و بكده هيخلصوا المعركة فى دقايق ..

لكن لما وصل أبو سُفيان أتفاجئ من مواقع جيش المسلمين .. لأن النبى ﷺ كان فاهم ابو سفيان و قاريه كويس 👌 ،فجه خالد يلف من حوالين جبل الرُماة ..

فمعرفش يلف.. لأنه معاه خيول والخيول بتخاف من السهام وكمان الرُماة فوق الجبل فالسيطره قويه من فوق ، فهيضربوهم بالسهام ويقضوا عليهم فى دقايق فلقى خالد نفسه واقف مش عارف يعمل حاجة..

و كمان عكرمة لقى نفسه برده واقف مش قادر يعمل حاجة فبقى أبو سُفيان وال ٢٠٠٠ جندى اللى معاه بس هما اللى هيواجهوا الرسول (الله على تخطيط النبي ﷺ ❤️❤️) ..

طيب مين حامل اللواء عند المشركين؟🤔

اللواء ده زى العلم كده يبيقى مرفوع و بمجرد سقوطه بتبقى إعلان للهزيمه و علامه نصر و بالتالى لو سقطت بتعمل إحباط رهيب يعنى تقريبا خلاص بتبقى المعركه انتهت واتحسمت ،

عشان كده قريش هتخلى اللى يحمل اللواء بتاعها ٩ أشخاص من قبيلة من قبائل قريش اسمها بنى عبد الدار.. طب ليه ٩ ؟ عشان لو مات الاول يشيله التانى ولو مات التانى يشيله التالت و هكذا 🤚

 ( ياااا 9 !!.. شايفين قريش خايفين من المسلمين إزاى!)

طيب يا رسول الله ﷺ مين حامل اللواء عندك ؟🤔

مُصعب بن عمير ❤️ أول سفير فى الإسلام . فاكرينه ؟🤗

سفير لانه سافر يدعوا اهل المدينه للإسلام قبل هجره الرسول ليها 🤗 ..

طيب القائد الأعلى للجيش كله هو النبى ﷺ والقائد اللى تحتيه على طول هو حمزة بن عبد المطلب أسدُ الله و رسوله ، و كان هو قائد العمليات القتالية اللى جوا الجيش.. و دراعه اليمين علىّ بن أبى طالب والزُبير بن العوام..

فيقف النبى ﷺ يبدأ يدى تعليماته للرُماة اللى فوق الجبل : "أيها الرُماة لإن رأيتمونا نُقتل..فلا تنصرونا ..ولا تنزلوا أبدأً حتى أأذن لكم.. وإن رأيتمونا ننتصر ..فلا تنزلوا أبداً" ✋

فيقولوا حاضر يا رسول الله ✋.

بس النبى ﷺ برده قلبه مش مطمن ﷺ يروح ويرجع يكرر نفس الكلام للرماه ✋✋

(النبى ﷺ كان عارف أن دى الثغرة الوحيدة اللى قدام جيش الكفار لأنهم لو لفوا هتنتهى المعركة بإنتصار الكفار ) .. وللمره التالته يكرر عليهم النبي ﷺ نفس الكلام

ويقف النبى ﷺ ويقول " اللهم أنى أُشهدك عليهم ،اللهم أنى أُشهدك عليهم " (كان قلبه حاسس ﷺ ان هيحصل شئ صعب من هنا 🥺🥺) ...

💢 المهم هتبدأ المعركة ويقف النبى ﷺ و هيبقى عايز يحمس الجيش فيمسك سيفه و يقول : من يأخذ سيفى هذا ؟ فكلهم يقولوا : أنا يا رسول الله .. انا يا رسول الله.. فيقول النبى ﷺ : من يأخذه بحقه ؟👌

فقالوا و ما حقه يا رسول الله ؟ 🤔

فقال ﷺ أن يضرب به العدو حتى ينحنى ...

( من جمال سيدنا النبى ﷺ أنه حنين أوى وقت الحنية و بطل و فارس شجاع وقت البطولة والقتال) ،

تعرفوا ان علىّ بن أبى طالب كان عنده ٢٣ سنة والرسول ﷺ ٦١ سنة فكان علىّ يقول: " والله كنا إذا أشتد البأس نتقى خلف رسول الله " يعنى لما القتال يبقى صعب و عنيف كنا نستخبى ورا النبى ﷺ ^_^ ".

فكان النبى ﷺ وقت الفروسية أشجع الفرسان و وقت الرقة بيبقى أرق مخلوق على وجه الأرض ﷺ ..

❤️بأبي انت وأمي يارسول الله ❤️

فيطلع له صحابى جميل أسمه أبو دُجانة فيقول : أنا آخذه بحقه يا رسول الله ..فياخد أبو دُجانة سيف النبى ﷺ وكان معاه عُصابة حمراء.. دى ليها معنى.. ايه هو؟🤔

اللى يربط رباط احمر ده معناه انه خلاص باع الدنيا و عايز يموت، عايز يُستشهد ..فيربط أبو دُجانة الرباط ده و ياخد سيف رسول الله ﷺ ويمشى يقول أبيات من الشعر أنا الذي عاهـدني خليلي ** ونحـن بالسَّفْح لدى النَّخِيل ألا أقوم الدَّهْرَ في الكَيول ** أضْرِبْ بسَيف الله والرسول 💪 ..

ففى صحابى بيقول: فأتبعت أبو دُجانة ( الصحابى عايز يعرف هيعمل أيه بسيف النبى ﷺ فمشى ورا ابو دُجانة)

فبيقول : فرأيته يُقاتل ويُقاتل حتى وقف أمام فارس مُلثم .. فذهب ليضربه فصرخ الفارس (طلعت إمراءة) فكشفت عن وجهها فإذا هى هند بنت عُتبة ( دى زوجه أبو سفيان وهتسلم بعد كده) و كانت طالعة مع جيش الكفار فى المعركه عشان تحمسهم و كانت بتقولهم قوموا اقتلوا محمد ..فعشان كده لفتت نظر أبو دُجانة ،فكان رايح يقتل الفارس اللى بيحمس جيش الكفار..

( هند على فكرة بعد ما تسلم هتفضل بنفس الشخصية القوية دى بس هتبقى بتحمس المسلمين ولله الحمد ♡)

فأبو دُجانة لما راح يقتل الفارس فلاقاه إمرآه فمرضيش يقتلها وحط السيف ورا ضهره ومشى 👌..

فالصحابى اللى ماشى ورا ابو دُجانة قال : هذا هو سيف رسول الله ❤️.. لأن النبى ﷺ عمره ما ضرب امرأه و ابو دُجانة فعلا استخدم سيف النبى ﷺ صح ..

وعلى فكرة أبو دُجانة كان بيمشى وسط الكفار يتبختر (بيتمنظر عليهم و متحمس يقتل يمين و شمال بسيف رسول الله )..

فالنبى ﷺ قال له : يا أبا دُجانة إن الله يكره هذه المِشية إلا فى هذا الموضع ( ربنا بيحب العِزة وقت القتال فقط )👌

💢طيب سيدنا حمزة كان بيعمل ايه فى الوقت ده ؟🤔

سيدنا حمزة كان بيحارب بسيفين وكان رابط ريشة على راسه بيتمنظر علي الكفار ^_^ ( عارفين لما الناس تلاقى حد مبسوط من نفسه كده..قيقولوا عليه ده حاطط على راسه ريشه.. اهو كان حمزه حاطط ريشه .. و على فكره ده ماينفعش يتعمل فى العادى بس احنا فى حرب و دى حرب نفسية و ده ذكاء من الصحابه رضوان الله عليهم ) ..

تعرفوا ان راجل من الكفار بعد المعركة هيقول من ذلك الذى كان على رأسه ريشة ؟ فيقولوا ده حمزة ... فيرد عليهم و يقول : ذاك الرجل .. فعل بنا الأفاعيل 😊

حمزة بقى فى المعركه كان بيعمل حاجة عجيبة جداً ..

كان واخد سيفه و راكب على فرسه و بيجرى بيه بسرعة كبيرة و يخترق جيش الكفار و يقاتل و يقاتل و يوصل لأخر الجيش و يلف من الناحية التانية ويفضل يقاتل ويقاتل ويلف بفرسه ويرجع تانى يخترق الجيش ... رايح جاى ..😊

كان بيستفزهم و نفسية الكفار كانت بتتحطم و تنزل ، فسيدنا علىّ شاف اللى بيعمله سيدنا حمزه ..

فكأنه قال أشمعنى انت يا حمزة.. فقام علىّ يخترق الجيش ويفضل يقاتل و يقاتل لحد ما يوصل لأخر الجيش ويخرج من الناحية التانية ويلف ويرجع ..

فيشوفهم سيدنا الزُبير بن العوام فيقلدهم ^_^ (كل ده واحنا لسه فى أول نص ساعة من المعركه..تخيلوا !!) 👌

❤️❤️❤️❤️❤️صلوا على النبي ❤️❤️❤️❤️❤️

💢 يقف سيدنا حمزة و يقول: أيها الناس إن قتلنا حامل الراية أنتهت المعركة (حامل رايه الكفار)..طيب بس قريش عامله حسابها و خلت اللى هيحمل الرايه ٩ ✋

فهيطلع أسد الله حمزة على حامل الرايه ، أول واحد من بنى عبد الدار فقتله فحملها الثانى فقتله فحملها الثالث فقتله فحملها الرابع فقتله فحملها الخامس فقتله ..

حمزه أسدُ الله ^_^ (وعلى فكرة حامل الراية مش بيكون واقف لوحده فى حتة فاضية ..لأ .. ده بيبقى فى ناس حواليه بتحميه ) ..

فحمل السادس الراية فلسه سيدنا حمزة داخل عليه ،

فقام سيدنا علىّ قال له : توقف !! (كأنه بيقوله أشمعنى أنت يا حمزه ^_^ ) فقتل علىّ السادس و قتل السابع ..

فشافهم الزُبير فقال: توقفوا ^_^ فدخل الزُبير فقتل الثامن والتاسع فانهارت قُريش .. خلاص بشائر النصر✌🏼

سقطت راية جيش الكفار ويبدأ أبو سُفيان يلاقى ان خلاص مافيش فايدة وأنه مُنهزم فيصرخ أيها الناس عودوا عودوا إنسحبوا .. فالصحابة يسمعوا كلمة إنسحبوا فيقولوا خلاص خلصت المعركة ... وأبو سُفيان كان فعلاً ماشى و أدالهم ضهره وراجع على مكة ✋ ...

🛑ولكن تحدث لحظات فارقه 🥺🤚

المسلمين الرُماة اللى فوق الجبل قالوا : ننزل خلاص بقى.. خلصت المعركة .. فوقف الأمير بتاعهم اللى اسمه عبد الله بن الجُبير و قال: أيها الناس أتعصون أمر نبيكم ؟

ألم يقل لكم رسول الله ﷺ لا تنزلوا أرض المعركة؟!

فقالوا له : ولكن أنتهت المعركة. 

فقال عبد الله بن الجبير: "لا والله ، قال لنا رسول الله إن رأيتمونا ننتصر فلا تنزلوا أبدآ" 👌

هو إيه اللى خلى المسلمين يتسرعوا فى النزول؟🤔

كفار قريش من كتر رعبهم و خوفهم و هما بينسحبوا بقوا يهربوا و يجروا بسرعه و يرموا اسلحتهم عشان مش عايزين حاجة تعطلهم فكانوا بيرموا سيوفهم و دروعهم والخوذ بتاعتهم ،فالأرض كلها غنائم فالمعركه شكلها انتهت فعلا

فقالوا : لم يقصد ذلك النبى ﷺ ، بل يقصد ان نتأكد من النصر و قد انسحب جيش قريش بالفعل..

فيرد عبد الله بن الجبير و يقول : لا تنزلوا !! ...

فمسمعوش الكلام ونزلوا 😢

ويقف بن الجُبير ويقول: أما انا فلا أعصى أمر رسول الله أبداً و يثبت ويثبت معاه ١٠ بس من الخمسين جندى والأربعين ينزلوا 🫣🥺 ..

💢طيب سيدنا خالد بن الوليد"قبل إسلامه" فين دلوقتى ؟

خالد كان ماشى و كان فى منتهى اليأس ..

أصل خالد عمره ما أنهزم ..فكان الإنسحاب و الهزيمه أمر صعب اوى عليه (على فكرة خالد عمره ما أنهزم لا فى ايام الكفر و لا بعد الإسلام) فخالد متضايق جداً .. بس و هو ماشى كان بيبص على الجبل بحسرة فلقى الرُماة بينزلوا ..

فوقف خالد يبص و هو مش مصدق نفسه !! 😮

لقاهم بينزلوا فعلاً فخالد أتأكد أن العشرة اللى لسه واقفين فوق الجبل ..أكيد مش هيقدروا على ال ٣٠٠ اللى معاه ..

وبسرعه البرق هيلف خالد بن الوليد من ورا جبل الرماه و هيطلع على الجبل و يقتل عبد الله بن الجُبير.. و يقتل العشرة اللى مع الجبير 😢 ..

و يقف على الجبل و ينادى على ابو سُفيان و باقى الجيش فيقول أعلُ هُبل ، أعلُ هُبل (هُبل ده الاله بتاعهم ..معناها زى الإله أكبر) .. فالمسلمين يرتبكوا (ازاى سامعين أعلُ هُبل واحنا منتصرين ؟ )

فأبو سُفيان يسمع فميصدقش نفسه و يبص وراه يلاقى راية الكفر على جبل الرُماة فيجرى أبو سُفيان بمنتهى السرعة ويجرى عكرمة بمنتهى السرعة... ويحصل اللى النبى ﷺ كان خايف منه 🥺✋✋

🛑مش بس كده ده الموضوع هيزداد سوء 😢😢

إزاى؟🥺 ..هييجى واحد مشرك مجرم اسمه عبد الله بن قمِئة ده كان خارج للمعركة و كل هدفه أنه يقتل النبى ﷺ فيلاقى شاب جميل ماسك راية الإسلام اسمه مُصعب بن عمير، فأبن قمِئة يفتكر ان مصعب هو النبى ﷺ من شدة جمال مُصعب لأنه كان سامع أن النبى ﷺ جميل جداً ، فهجم بن قمِئة على مُصعب فقطع ذراعه الأيمن فسقطت الراية .. و مُصعب مش هيصرخ على دراعه اللى اتقطع ولا هيلتفت لها.. مصعب هيلحق الراية بدراعه التانى ،

أصل راية الإسلام ماينفعش تنزل ✋..

فيجيله عبد الله بن قمِئة فيضربه بالسيف فيقطع دراع مصعب التانى إلا من موضع العضُد (الدراع من فوق ) فتسقط الراية فيبكى مُصعب و ينحنى و يمسك الراية بعضُديه و يبكى و يبكى لأنه مش عايز راية الإسلام تنزل أبداً

ويقول الله أكبر الله أكبر ✋....

فيجيله ابن قمِئة ويضربه على مفرق رأسه بالسيف ويموت مصعب شهيد رضى الله تعالى عنه وأرضاه ...😔

فابن قمِئة صرخ و قال قتلتُ محمد ، قتلتُ محمد🤚

وبعض الروايات قالت إن اللى صرخ كان الشيطان و قال قُتل محمد .. (فاكرين يوم بيعه العقبه لما النبى ﷺ كان فى مكه و ناس من أهل المدينه بايعته على الإسلام من غير ما قريش تحس و يومها فى صوت صرخ وقال: ادركوا محمد و أصحابه فقريش أنتبهت، فالنبى ﷺ قال :هذا الشيطان ) ..

💢المهم جيش المسلمين أول ما سمع كلمه قُتل محمد ..

ارتبك جدا.. و معروف ان اى جيش فى الدنيا اول ما يسمع بموت القائد بتاعه بيحبط جدا جدا 🥺..

المسلمين شايفين ان رايه الكفار اترفعت.. روحهم المعنويه بتتحطم..و الكفار حاصروهم..فأنتشر الجيش فى كل أرض المعركة .. قمه التوتر.. محدش عارف يتحرك فين و للا منين و أغلب المسلمين اتحركوا فى اتجاه المدينه بسرعه.. وكلهم لابسين حديد و يتفرق الجيش 😔....

وبقى النبى ﷺ وحيد فى ارض المعركة، واقف لوحده ، فيضطر يعمل حاجة فى منتهى الشجاعة ان قائد جيش يعملها ،يبدا يعلن عن نفسه وعن مكانه اللى هو واقف فيه عشان يعرفوا انه لسة عايش و دى مخاطره لأن كده الكفار هيقدروا يحددوا مكان النبى ﷺ .. 😟

بس رغم كده وقف النبى ﷺ و نادى و قال : إِلَيَّ عباد الله انا رسول الله ✋✋✋

فجرى عليه كعب بن مالك وعرف ان النبي ﷺ مماتش.. فبيقول كعب: عرفت انه هو من حسن عينيه ، تظهران تحت المغفر (الخوذة ) ..(شايفين من حب الصحابة فى النبى ﷺ كانوا يتغزلوا فى جماله حتى لو كانوا فى وسط الحرب ❤️)

فراح كعب يجرى عليه ﷺ و قال له فداك ابى وامى يا رسول الله وقعد يصرخ كعب فى الناس و يقول رسول الله حى، رسول الله حى ، فيتلم ابو بكر و عمر و على و طلحة و سعد بن ابى وقاص و ابو دجانة وست اسمها ام عمارة لحد ما وصلوا ل٢٠ صحابى والتفوا حوله وحاوطوه 💪💪 ....

الكفار شافوهم فأستغربوا و قعدوا يقولوا : مين دول؟!

ومين الراجل ده اللى محوطين عليه ؟!

هو مش احنا قتلنا محمد !! و يبدأ ناس من جيش الكفار يقربوا من الصحابه و رسول الله و عدد الكفار بيزيد و يزيد وصل ل١٥٠.. طيب و الصحابه هيواجهوا ده ازاى !! 😮

نكمل بكرة إن شاء الله ❤ 

#كن_محمديا

👈لاتنسى الإعجاب بالصفحه ليصلك الحلقات الجديده 👍