السيره النبويه العطره 36

 

#السيره_النبويه ❤️

👈رحمه النبي ﷺ والصحابه بالأسري وإسلام العباس ❤️

👈موت السيده رقيه بنت رسول الله ﷺ 😢

👈 محاولتين لقتل النبي ﷺ 🤚 

💢انتهت معركه بدر 🤚و المسلمين راجعين المدينه و معاهم اسرى وعلي فكرة الاسلام ما ابتدعش موضوع الأسري .. يعني الاسلام مقلش لما تحاربوا خدوا أسري .. الاسر ده زي قانون دولى.. يعنى كل الدول بتاخد اسرى حروب و الإسلام جه و خلى للأسير حقوق و خلى معامله الاسير لازم يكون فيها إنسانيه لدرجه ان بسبب ده أسري كتير دخلوا في الاسلام ..لان انا كمسلم مش هدفى من الأسر انى اذل الاسير و انتقم منه لانه كان هيقتلنى..لأ

هدفى ان أصد آذاه و كمان بتمنى ان ربنا يهديه للإسلام ..

سيدنا النبي ﷺ بيقول :عجب ربك من قوم يقادون إلي الجنة في سلاسل ..فقالوا ومن هؤلاء ؟🤔

فقال النبي ﷺ : هؤلاء أسري الحروب ..لان الأسير هيدخل المدينة متكتف وبعدين هيدخل الاسلام من حسن معاملة المسلمين و بكده هيدخل الجنه.. فلولا الاسر مكنش زمانه اسلم..صدق رسول الله ﷺ 🤗❤️

طيب هي معامله الاسير فى الإسلام شكلها إيه؟ 🤔

النبى ﷺ وقف و قال: " اسْتَوْصُوا بِالأُسَارَى خَيْرًا".

و الصحابه عملوا كل خير مع الاسرى..و بقوا يتناسوا ان الاسير ده كان يتمنى انه يقتلهم و بقوا بس يفتكروا كلمه رسول الله ﷺ : اسْتَوْصُوا بِالأُسَارَى خَيْرًا"..

👈 فى اسير اسمه أبو عزيز بن عمير، بيقول: "كنت في نفر من الأنصار، فكانوا إذا قدَّموا غداءهم وعشاءهم، أكلوا التمر وأطعموني البُرَّ ( الخبز ) لوصية رسول الله ﷺ إياهم بنا "..

طبعا الخبز احسن من التمر و مع ذلك كان الصحابى يعطيه للأسير و ده اثر على نفسيه الاسير جدا و كمان المعامله الجميله منهم بسبب ده الأسير بيسلم ♡ و على فكره الصحابى ده اخو مصعب ابن عمير ❤️

 ( فاكرين مصعب ؟ ده اول سفير في الإسلام اللى راح المدينه و نشر الاسلام ورجع مع شويه مسلمين من المدينه عشان يبايعوا النبى ﷺ فى مكه على الهجره للمدينه ^_^ ) 

👈طيب في واحد تانى اسمه الوليد بن الوليد بن المغيرة من اسرى بدر، كان بيقول: " كان اصحاب رسول الله يحملوننا ويمشون". يعنى لو المسلمين شافوا اسير جريح أو مريض أو مرهق كانوا يهتموا بيه و يراعوه"..

ده اخو سيدنا خالد بن الوليد 🤗❤️

👈و اسير تاني اسمه ابو العاص بن الربيع كان مشرك و أتأسر و هيسلم بعد كده { ابو العاص كان زوج السيده زينب بنت رسول الله ﷺ و كان مشرك و كان مانع السيده زينب من الهجره مع رسول الله ﷺ للمدينه لانه كان بيحبها جدا و بعدين لما اتأسر بعتت السيده زينب لرسول الله ﷺ عقد أمها السيده خديجه رضى الله عنها..عشان تفادى بيه ابو العاص ✋ وانتو عارفين ان النبى ﷺ كان موصى الصحابه ان محدش يقتله لان النبى ﷺ عارف ان ابو العاص قريش غصبته على الخروج ضد رسول الله ﷺ..

المهم .. وصل العقد لرسول الله فيضم النبى ﷺ العقد لصدره و يبكى شوقآ للسيده خديجه و يقف النبى ﷺ علي المنبر ومعه قلادة خديجة و يقول : ايها الناس اذا رأيتم ان تردوا لزينب القلادة وتطلقوا لها اسيرها فأفعلوا .. وان لم تروا ذلك فخذوا القلادة ..فالصحابه قالوا :نطلقه يا رسول الله.. و ترجع لزينب القلادة 🥺✋

و يطلق النبي ﷺ سراح ابو العاص لكن بشرط انه يسيب زينب تهاجر من مكه للمدينه و ميمنعهاش ..

فقال ابو العاص: لك ذلك يارسول الله ، والله لا اخادعك ابدا .. النبي ﷺ بعد الموقف ده بمده بقى دايما بيثني علي ابو العاص و يمدحه و يقول: وعدني ابو العاص ووفي وعده .. و يرجع ابو العاص مكة و يدخل علي السيده زينب ويقولها يا زينب لو عايزه تهاجرى مع المسلمين هاجرى.. فتفرح زينب وتنسي جوزها وتنسي الدنيا وتركب علي الناقة بتاعتها ..و ابو العاص هيدخل الاسلام بعد كده..

المهم هاجرت السيده زينب وكانت حامل في الشهور الأخيره.. و تبدأ تمشي في طريق الهجرة ..و فى الطريق هيمنعها هبار بن الاسود "قبل إسلامه" وهيوقعها من على الناقه و هتنزف جامد زى ما حكينا قبل كده 👌 ..

👈 طيب ابو العاص و هو اسير كان الصحابه بيعاملوه ازاى ؟🤔

ابو العاص بيقول : الصحابه كانوا يطعمونني الخبز وهو معهم يومئذ قليل و يأكلون هم التمر و كانوا يحسنون الينا طاعة لوصية رسول الله ﷺ..و بيقول ان كان واحد من الصحابه معاه حته خبز و يدوب لسه هياكلها فيبص لحد مننا فينزلها من على فمه ويطعمنا الخبز طاعة لرسول الله ﷺ.

فكانت النتيجة انا عدد كبير من أسرى بدر أسلموا..يعنى يا صحابه رسول الله دي اخلاقكم مع اعدائكم .. طيب امال أخلاقكم مع بعض عاملة ازاي؟! 🤗❤️

فينزل قول الله تعالي يمدح الصحابة :" 

(وَيُطْعِمُونَ الطَّعَامَ عَلَىٰ حُبِّهِ مِسْكِينًا وَيَتِيمًا وَأَسِيرًا* إنَّمَا نُطْعِمُكُمْ لِوَجْهِ اللَّهِ لَا نُرِيدُ مِنكُمْ جَزَاءً وَلَا شُكُورًا* إِنَّا نَخَافُ مِن رَّبِّنَا يَوْمًا عَبُوسًا قَمْطَرِيرًا* فوَقَاهُمُ اللَّهُ شَرَّ ذَٰلِكَ الْيَوْمِ وَلَقَّاهُمْ نَضْرَةً وَسُرُورًا) سوره الإنسان ❤️

وعلى فكره كمان الفداء مش لازم يكون بالمال يعنى مثلا النبي ﷺ شاف أن بعض الأسرى بيعرفوا القراءة والكتابة، و المسلمين كتير منهم ميعرفوش يقروا و يكتبوا، فالنبى ﷺ شاف ان الاسرى ممكن يفادوا نفسهم بإنهم يعلموا المسلمين..

 و فى اسير تانى اسمه سهيل بن عمر وكان سهيل بن عمرو من قادة قريش، وكان أسيرً في بدر، و كان من اشطر الناس فى حسن البيان والخطابة، وكان بيحمِّس المشركين على قتال النبى ﷺ و المسلمين .. 

ولما أتأسر كان رأى سيدنا عمر بن الخطاب أن تُنزع ثَنِيَّة -الأسنان الأمامية- عشان ميقدرش يخطب فى الناس مره تانيه..لكن النبى ﷺ رفض و قال : "عَسَى أَنْ يَقُومَ مَقَامًا لاَ تَذُمُّهُ".يعنى لعله مره يخطب و يكون فيه خير و فعلا هيتحقق اللى قاله رسول الله ﷺ ❤️❤️

بعد وفاه النبى ﷺ هيرتد العرب و هيرجعوا كفار لكن هيقف سهيل وهيخطب في الناس و هيثبَّتهم على الإسلام في مكة المكرمة تصديقا لقول رسول الله ﷺ ..

👈 من ضمن اسري بدر كان سيدنا العباس ابن عبد المطلب.. عم النبي ﷺ ❤️

النبي ﷺ كان قايل : من رأي العباس بن عبد المطلب فلا يقتله لانه النبى ﷺ عارف ان العباس خرج بدر مغصوب..و العباس ما رفعش سيفه فى المعركه فأتأسر العباس فوقف قدام رسول الله و قال : يا رسول الله اني اشهد انه لا اله الا الله وانك رسول الله ..

اصل العباس كان كاتم إسلامه هو كان عايز يسلم من وهو في مكة بس كان خايف من قومه.. فلما لاقى نفسه في المدينة زال الخوف فأسلم ✋..

فالنبي ﷺ يطلب منه انه يرجع مكه عشان كده هيفيد الإسلام أكتر.. و تفضل كاتم إسلامك عشان يبقى العباس كأنه المخابرات بتاعت المسلمين جوة مكة 👌

وفعلا يوافق العباس رضي الله عنه ويكون هو المخابرات الاسلامية السرية داخل مكة .. علشان كده اختلط علي بعض الناس ان العباس اسلم يوم فتح مكة .. لكن الحقيقه ان العباس اسلم يوم بدر واشهر اسلامه يوم فتح مكة بعد ما مهمته انتهت ❤️

❤️❤️❤️❤️❤️صلوا على النبى ❤️❤️❤️❤️❤️

💢 المسلمين و هما راجعين للمدينه من غزوه بدر كانوا فرحانين اوووى و كانوا عايزين يفرحوا أهل المدينه ..اصل اهل المدينة قلقانين عايزين يطمنوا علي النبي ﷺ وعلي الصحابة .. مش بياكلوا ولا يشربوا ..قاعدين علي باب المدينة محدش عاوز يرجع بيته 😮 فالنبي ﷺ هيبعت اتنين من الصحابة يبشروا أهل المدينة ..

هتبعت مين يا رسول الله ؟ 🤔

عبد الله بن رواحة و زيد بن حارثة فراحوا يبشروا أهل المدينة .. فضجت المدينة بالتكبير .. الله اكبر الله اكبر.. ربنا نصر المسلمين .. ده اول نصر للإسلام ✌🏼✌🏼

ربنا قال ان يوم غزوة بدر هو يوم الفرقان لأن فيها فرق الله في بدر بين الحق والباطل .. الدنيا أتغيرت بعد بدر 👌.. نظرة الكفار للمسلمين اتغيرت ..احنا بقينا كيان و دولة و جيش ..هتعترف قريش رسمياً بوجود المدينة بعد بدر 💪.

طيب وصل رسول الله ﷺ مع الصحابه للمدينه ..

بس للأسف يا رسول الله فى شئ هيحزنك :'( ايه هو؟ 🥺

النبى ﷺ و هو داخل المدينه في نفس اللحظة كانوا الصحابة بيساووا القبر علي السيده رقية بنت النبي ﷺ .. فدخل النبي ﷺ و لقي الصحابة وشهم متغير ..فعرف ان في اللحظة اللي هو داخل فيها كانوا بيقفلوا القبر.. اصل قبل غزوه بدر السيده رقية كانت مريضة جدا و كان النبي ﷺ قلقان كان حاسس انها بتموت ..فالنبي ﷺ قال لسيدنا عثمان بن عفان زوجها .. متجيش معانا بدر خليك في المدينة علشان لو رقية ماتت تلاقي حد من محارمها معاها .. 

فسيدنا عثمان مراحش بدر ليه ؟ بأمر من رسول الله 🤚🤚

(فييجي بعد كدة الروافض و الشيعه و اعداء الاسلام يقولوا عثمان تخلف عن غزوه بدر و يُتهم عثمان بالباطل ..لكن ده كان امر رسول الله و كمان رسول الله بعد المعركة اعطي لعثمان نصيبه من الغنائم كأنه كان موجود) ..

فتموت السيده رقية ويبكي النبي ﷺ بكاء شديد صلى الله عليه و سلم .. و بعد موت السيده رقية النبي ﷺ يجوز عثمان لبنته التانية أم كلثوم ❤️ ..

ولما تموت ام كلثوم ، النبي ﷺ يقول له : يا عثمان لو كانت عندي الثالثة لزوجتكها 😊❤️..

النبي ﷺ بيحب عثمان حب غير طبيعي .. فيلقب سيدنا عثمان في التاريخ ب "ذي النورين" علشان اتجوز بنتين من بنات النبي ﷺ رقية و ام كلثوم رضي الله عنهما ❤️

💢بعد غزوة بدر حالة قريش النفسية بقت سيئة جدا ✋ قريش اقسمت انها لازم تنتقم من رسول الله ﷺ .. فيحصل حاجة عجيبة اوي .. واحد اسمه صفوان بن امية مشرك و صحبه عمير بن وهبة الجنحي.. الاتنين كانوا قاعدين في صحن الكعبة .. فيقول صفوان والله وددت لو اني ذهبت إلى المدينه و أقطع راس محمد..

فعمير رد عليه و قال : والله يا صفوان لولا عيال و دين عليا لذهبت إلي محمد فضربت عنقه ..

فصفوان قال له: عيالك عيالي و دينك ديني فلا تنشغل بهم و اذهب و افعل ما قلت. فوافق عمير و قال أجل سأذهب..

فصفوان قال له: خذ سيفي وناقتي..

فراح عمير بن وهبة واخد السيف وركب الناقة بتاعت صفوان وراح المدينة ..فلما وصل المدينه ، الصحابه قالوا عايز ايه ده !! فسيدنا عمر شافه .. فعمر قلق.. قام عمر رايح مكتفه من غير تفاهم ..فعمير قال لعمر : اريد محمد..

فعمر خده و دخل بيه للنبي ﷺ متكتف ✋

فالنبي ﷺ قال له: ماذا يا عمر ؟ 

فعمر قال : يا رسول الله ، هذا عدو الله عمير بن وهب و معه سيف .. 

فالنبي ﷺ ابتسم وقال ارسله يا عمر( يعنى فك قيده) فأرسله عمر .. فقال النبي ﷺ : ادنو يا عمير .. ما الذي جاء بك يا عمير؟ فقال عمير : لا شئ جئت أفدى اسير عندي ..

فقال النبي ﷺ : و إن كنت جئت للأسير فما هذا السيف ؟

فقال عمير : قبحها الله من سيوف وهل اغنت عنا يوم بدر! 

فابتسم النبي ﷺ وقال : لا ياعمير .. بل جلست انت وصفوان في صحن الكعبة .. ثم قال لك صفوان وددت لو اني اقطع رأس محمد .. فقلت انت له: والله لولا دين عليا و عيال لذهبت الي محمد فضربت عنقه .. فقال لك دينك ديني وعيالك عيالي ولكن اذهب فافعل ما قلت .. فأخذت سيفه وركبت ناقته وجئت الي هنا لتقتلني ..ولكن يا عمير الله حائل بيني وبينك 🤚☝️☝️

فقال عمير والله ما كان معنا الا الله وما سمعنا الا الله ..

و ما كان لاحد ان يبلغك بهذا الا الله .. فاشهد ان لا اله الا الله واشهد انك رسول الله .. ففرح النبي ❤️ﷺ☺️

فعمير قال : يا رسول الله اعدك ان اعود الي مكة فاقتلهم كما قاتلت أصحابك في بدر ..

فالنبي ﷺ قال له: لا تفعل .. فقال اذاً ادعوهم الي الله ؟..

فقال النبي ﷺ اجل ..طيب دلوقتى صفوان صاحب عمير بقى من ساعه ما عًمير خد السيف و الناقه و مشي عشان يقتل النبى.. كان صفوان كل يوم الصبح يجمع قريش ويقولهم انا محضر لكم مفاجأة .. استنوا بس لما عمير ييجي .. كل يوم يقولهم نفس الحاجة ..لحد ما عمير جه .. فصفوان مستني عمير عند التنعيم عند باب مكة

فقال له ماذا فعلت ؟ فعمير مابيردش ..

فصفوان قال له انت شكلك متغير ليه ؟🤔

قال يا صفوان اشهد ان لا اله الا الله واشهد ان محمدا رسول الله

فقال : صفوان ما لهذا بعثتك ، قبحك الله ..وحلف صفوان انه عمره ما هيكلمه تاني .

طبعا شكله وحش اوي قدام قريش .. و سبحان الله اللي هيكون سبب في اسلام صفوان بعد كدة هو عمير بن وهب وهو اللي هيقف جنبه 👌

💢طيب يحصل ايه بعد كده..يحصل شويه غزوات ييجي بني سليم يغزو المدينة.. فالصحابه يلحقوهم لحد نصف المسافة فيحصل مناوشات ويطلعوا يجروا ..

و فى غزوة اسمها غزوة السويق .. خرج فيها ابو سفيان بنفسه مع ٢٠٠ مشرك .. و دخل المدينة في نص الليل .. ابوسفيان كان عاوز ينتقم .. حرق و هدم كام بيت ، و قتل ٢ صحابة و طلع الجيش القرشى يجرى .. و الصحابه للأسف ملحقهومش.. طب ليه اسمها غزوة السويق؟🤔

ابو سفيان كان معاه حاجة اسمها السويق و السويق ده عبارة عن دقيق ممزوج بالعسل والسمن .. علشان كان الجيش ياكلها ويتقوي بها قي الطريق فيشبع .. فمن خوف الكفار من المسلمين قاموا شالوا السويق من جيوبهم و راموه في الارض علشان يجروا اسرع بسبب خوفهم من المسلمين .. فالصحابة لما ملحقوهمش بدأو يلموا السويق ..فرجع الصحابة بكمية ضخمة جدا من السويق و اتسمت بغزوه السويق .. 😊❤️

💢طيب فى غزوة تانية اسمها غزوة" ذي أمر " بردوا قبيلتين جم يحاربوا النبي ﷺ فالنبي ﷺ طلعلهم فبردوا خافوا وطلعوا يجروا من المسلمين ✋ ..

بس سيد القبيلة دي اسمه" دعثور بن الحارث" .. فدعثور لما لقي النبي ﷺ و الصحابه جايين قام كل جيشه هرب ، لكن دعثور مرضيش يهرب ..و قال لنفسه ازاي اهرب! انا مش جبان، فثبت دعثور مكانه و استخبى ورا جبل .. وقال اول لما النبي ﷺ يكون مش واخد باله هطلع عليه اقتله .. في نص السكة بقى النبي ﷺ مروح و الصحابه مروحين.. فالدنيا ليلت ومطرت شوية فهدوم النبي ﷺ اتبلت .. فقلع عبايته و علقها علي شجرة .. و خلع سيفه و نام تحت الشجرة .. والجيش نام ..

كان دعثور مستخبي .. فخرج و سحب سيف النبي ﷺ وحط السيف على رقبت النبى ﷺ.. فالنبي ﷺ صحي .. فقال يا محمد من يمنعك مني ؟ ..

فقال النبي ﷺ : الله ..🤚🤚

فسقط السيف من يد دعثور ✋✋..سقط ازاي ؟😳

دعثور هيحكي لسه.. المهم فالنبي ﷺ اخد السيف وحطه على رقبه دعثور.. وقال : و انت من يمنعك مني ؟ ..

فقال : لا أحد إلا عفوك يا محمد ..

فقال النبي ﷺ : عفوت عنك .. فقال دعثور وانا اشهد ان لا إله الا الله وانك رسول الله ..

اسلم ليه دعثور بالسرعة دي ؟ لما قومه سألوه بعد كدة

 قال : والله رأيت رجلا عظيما ابيض دفعني في صدري .. وليس بإنس .. وعلمت انه ملاك ..فسقط السيف من يدى ..

صلى الله على محمد صلى الله عليه وسلم ❤️ 

 

 هنكمل بكرة إن شاء الله ❤ 

#كن_محمديا

👈لاتنسى الإعجاب بالصفحه ليصلك الحلقات الجديده 👍