السيره النبويه العطره 34

 

#السيره_النبويه ❤️

👈معجزات غزوه "بدر الكبرى" ☺️

👈قصص رائعه لبطولات الصحابه في المعركه 💪

👈مقتل فرعون الأمه" أبو جهل" عدو الله ✌🏼

💢شفنا إمبارح النبى ﷺ لما عرف إن قريش جهزت جيش فجهز جيش المسلمين وحط الخطة و كان الصحابة تعبانين جداً لطول المسافة لحد بئر بدر ..عارفين مع كل التعب اللى الصحابة فيه محدش منهم كان قادر ينام 😞.

فتحصل أول معجزة ☺️☺️

ربنا عز وجل بيقول في كتابه الكريم :

 { إِذْ يُغَشِّيكُمُ النُّعَاسَ أَمَنَةً مِّنْهُ وَيُنَزِّلُ عَلَيْكُم مِّنَ السَّمَاءِ مَاءً لِّيُطَهِّرَكُم بِهِ وَيُذْهِبَ عَنكُمْ رِجْزَ الشَّيْطَانِ وَلِيَرْبِطَ عَلَىٰ قُلُوبِكُمْ وَيُثَبِّتَ بِهِ الْأَقْدَام }

أصل الصحابة محتاجين يرتاحوا عشان يقدروا يحاربوا ..

فربنا سبحانه وتعالي يلقي عليهم النوم ..

فالصحابة كلهم يناموا .. لدرجة إن بيقول بعض الصحابة :

" والله كان يسمع بعضنا لبعض غطيط " ( يعنى شخير من كتر النوم العميق ) ..

و صحابى بيقول : " أنه كان النبى ﷺ يوقفني حراسة وكان معى سيف فوالله سقط السيف من يدي ٩ مرات وأنا لا أدري كيف يسقط وكيف أنام فلما نزلت الآية عرفت إن الذي ألقي علينا النوم هو رب العالمين " .. 

طيب و بقيت الآية إيه ؟ :

{ وَيُنَزِّلُ عَلَيْكُم مِّنَ السَّمَاءِ مَاءً لِّيُطَهِّرَكُم بِهِ وَيُذْهِبَ عَنكُمْ رِجْزَ الشَّيْطَانِ وَلِيَرْبِطَ عَلَىٰ قُلُوبِكُمْ وَيُثَبِّتَ بِهِ الْأَقْدَام } ..

طيب إيه فايدة المطر اللى ربنا أنزله ؟🤔

أصل العدوة الدنيا اللي معسكر فيها المسلمين دي أرض صخرية ، فلما ينزل مطر كتير علي الأرض الصخرية فهتزداد صلابة .. ولما المطر ينزل على العدوة القصوي اللى معسكر فيها كفار قريش .. دي أرض طينية .. فلما ينزل المطر علي الأرض الطينية فهتزداد طينا .. فيبقي جيش المسلمين الأرض تحته زي الحديد وجيش الكفار الأرض تحته طرية جداً و بتزحلق و محدش يعرف يتحرك ويجري بسهولة فيها ، دى معجزة من رب العالمين ..☺️💖

طيب دلوقتى الجيش نايم إلا رسول الله ❤

 فضل سهران يدعى و يدعى و يدعى و يقول :

" اللهم أنصرنا .. اللهم نصرك الذي وعدتنا " ..

 و بعد شوية ينام النبى ﷺ دقائق بسيطة فيشوف رؤية ..

 قال تعالى : { إِذْ يُرِيكَهُمُ اللَّهُ فِي مَنَامِكَ قَلِيلًا وَلَوْ أَرَاكَهُمْ كَثِيرًا لَّفَشِلْتُمْ وَلَتَنَازَعْتُمْ فِي الْأَمْرِ } ..

فربنا يخلى النبي ﷺ يشوف فى المنام إن جيش المشركين عددهم قليل .. فالنبي ﷺ يصحي معنوياته مرتفعة ☺️

💢و يطلع النهار والمعركة هتبدأ ..فالنبي ﷺ يبدأ يعلي الروح المعنوية و يشجع الجيش ، ويقول للصحابة : " قوموا إلى جنة عرضها السموات والأرض " ،

فيقف صحابي جميل أسمه " عمير " ويقول :" بَخٍ بَخٍ يا رسول الله " ( يعني الله الله ❤ )

 فالنبي ﷺ يقول له : " لما تقول بخ بخ ياعمير ؟ " ..

 فقال عمير : " يا رسول الله .. جنة عرضها السموات والأرض ♡ ؟ " ، فقال النبى ﷺ : " أجل يا عمير " ..

فقال عمير : " يا رسول الله أدعوا الله أن أكون من أهلها" 

فقال : " أنت من أهلها " ..

فعمير أتخض و فرح و قال : " أنا من أهلها يا رسول الله !" فقال : " أجل والله " ..

فلما هتبدأ المعركة زى ما هنشوف هيكون عمير في أيده تلات تمرات بياكلهم قبل المعركة فراح عمير باصص للتمرات و قال : " يا عمير ليس بينك وبين الجنة إلا هذه التمرات والله إنها لحياة طويلة " 😊..

و رمى التمرات .. و دخل المعركة فقاتل لحد ما أتقتل و أستشهد وكان أول شهداء المعركة ♡ ..

💢صحابي تاني أسمه " حارثة " .. حارثة شاب صغير ،

مرة زمان قبل غزوة بدر كان حارثة ماشي في طرقات المدينة فقابل النبي ﷺ ..

فالنبي ﷺ بيقوله : " كيف أصبحت يا حارثة ؟ "

فحارثة قال : " أصبحت مؤمنا حقا يا رسول الله " ..

فقال النبي ﷺ : " يا حارثة لكل قول حقيقة فما حقيقة إيمانك؟ "

قال : " يا رسول الله أصبحت وكأني أري عرش ربي بارزآ و أرى أهل الجنة يتنعمون في الجنة ، وأري أهل النار يصرخون في النار .. فأظمأت يومي و أيقظت ليلي بالقيام ". فرد النبي ﷺ عليه وقال : " إذن عرفت فألزم يا حارثة " 💖(الله على الجمال.. ده كده وصل لمقام إلاحسان أعلى مقامات الإسلام .. وهو ان يعبد الله كأنه يراه .. اللهم ارزقنا مقام الإحسان والإرتقاء في منازل الإيمان 🤲) 

و فعلاً لزم حارثة و ثبت على عبادة الله عز وجل و في يوم المعركة ، وقف حارثة في الصفوف الأولي للجيش ..

و قبل ما المعركة تبدأ ففجأة يجى سهم فيقع في صدر حارثة ، فيقع حارثة و يموت 😔

تخيلوا !! كان لسة أحاديث الجهاد النبي ﷺ ماقالهاش .. ولسة الصحابة مش عارفين هل لو مات قبل ما يحارب يبقي شهيد ولا كان لازم يموت فى المعركة عشان يبقى شهيد ؟

فجت أم حارثة تبكي وتقول : " يا رسول الله مات حارثة قبل المعركة .. يا رسول الله أحارثة في الجنه فأصبر ؟ أم هو فى النار فأبكى " و قعدت تعيط جامد أوى 😢 .. 

فرد النبى ﷺ و قال : " يا أم حارثة إن ابنك ليس في الجنة .. إنما هو في جنان فإنه قد أصاب الفردوس الأعلى ❤ " ففرحت الأم جداً جداً و فرح الصحابة ..حارثة يا جماعة كان يدوب عنده ١٨ سنة ، رضى الله عن حارثة ❤️❤️ ..

❤️❤️❤️❤️❤️ صلوا على النبى ❤️❤️❤️❤️❤️

💢اصطف جيش رسول الله ﷺ و تبدأ المعركة بمبارزة بين أشخاص و بعدها الجيشين هيحاربوا بعض ..

هتبدا بالمبارزة و يطلع تلاتة من قريش واحد اسمه "عتبة بن ربيعة" و "شيبة بن ربيعة" و " الوليد بن عتبة" يعنى ( اخو عتبة و عتبه و ابنه ) فقالوا: يا محمد اخرج لنا ثلاثة نبارزهم..

فخرج ثلاثه ملثمين.. فقال عتبة : من انتم ؟

فقالوا : نحن من الأنصار ..فقال عتبة: لا ..بل نريد اكفاءنا ( احنا مش عايزينكم احنا عايزين القرشيين اللي هاجروا من مكه).. يا محمد اخرج إلينا اكفاءنا..

فالنبي ﷺ يقول : قُم يا حمزة بن عبد المطلب ..

قُم يا علي بن ابي طالب.. 

قُم يا ابو عبيدة بن الحارث بن عبد المطلب..

شايفين النبي ﷺ يوم ما قرر يضحي مش هيضحي بالغريب و يخاف على نفسه و أهله ..لأ ✋

النبى ﷺ هيضحي بأسرته و اهله ﷺ ..

فيطلعوا التلاته يبارزوا و قدامهم التلاته القرشيين .. فطبعاً سيدنا حمزة" أسد الاسلام" هيبارز الوليد و يقتله 💪..

و سيدنا علي بن ابي طالب "فارس شجاع" هيقتل عتبة بن ربيعة بعد دقايق من المبارزة 💪..

و يتبقى شيبة بن ربيعة و" الصحابى الجليل" أبو عبيدة بن الحارث بن عبد المطلب و يفضلوا يبارزوا بعض فطعنوا بعض و قام شيبه بن ربيعة رفع سيفه و بتر ساق ابو عبيدة رضى الله عنه فلما حمزة شاف المنظر ده غلي الدم في عروقه وأخذ سيفه و قتل شيبة بن ربيعة.

 و بدأ ابو عبيدة ينزف وينزف كتييير .. فالصحابة شالوه وحطوه على الارض قدام النبي ﷺ ، فقام النبى ﷺ قايل لا تضعوا رأسه علي الارض ولكن ضعوه في حجري 😔❤️

(حنين اوى صلى الله عليه و سلم ❤️) 

و بعدين نزل النبي ﷺ على ركبه و حضن أبو عبيدة و ابو عبيده غائب عن الوعي بسبب الدم الكتير اللى فقده..

بس اول ما النبي ﷺ حضنه صحي و بص للنبي ﷺ و قاله : يارسول الله ، أراضٍ عني؟

فبكي النبي ﷺ ورفع كفه الي السماء وقال : اللهم اني أُشهدك أني راضٍ عن أبو عبيدة بن الحارث فأرضى عنه .. ويكررها النبي ﷺ ..

(ياحبيبي يارسول الله ❤️) 

فيفتح ابو عبيدة عينيه ويبص للنبي ﷺ ويبتسم اخر ابتسامة في عمره .. وتفارق روحه بدنه ويستشهد ابو عبيدة بن الحارث .. وينزل كلام رب العزه :

{ هَٰذَانِ خَصْمَانِ اخْتَصَمُوا فِي رَبِّهِمْ فَالَّذِينَ كَفَرُوا قُطِّعَتْ لَهُمْ ثِيَابٌ مِّن نَّارٍ يُصَبُّ مِن فَوْقِ رُءُوسِهِمُ الْحَمِيم يُصْهَرُ بِهِ مَا فِي بُطُونِهِمْ وَ الْجُلُودُ } ..

💢 و بعد إنتهاء المبارزه هيلتحم الجيشين ✋

اى جيش بينقسم إلي ميمنة و ميسرة ومقدمة ومؤخرة وقلب .. النبي ﷺ قال للجيش كلمة السر علشان بعد المبارزة نبدا الالتحام.. إيه هي الكلمه ؟ "شُدوا " ✋

و بعد ما بدأ الإلتحام فى صحابى اسمه عبد الرحمن بن عوف المهاجري كان أمير الميمنه " ميمنه الجيش"

فعبد الرحمن بيحكي قصة عظيمة اوى و بيقول :

كانت معي الميمنة فنظرت فيها فإذا هى بضعة عشر رجلاً يعني حواليه من ١٥ الي ٢٠ رجل بس و طبعا ده قليل أوي .. فعبد الرحمن بيقول: فقلت في نفسي ، انظر لعل معي رجال أشداء، فنظرت عن يميني فإذا بغلام لم يبلغ الحلم (طفل يدوب 9 سنين)

فلما عبد الرحمن شاف ده قام قايل : فقلت قد علمت مكاني اليوم :( ، فوجدت احد يشدني من ثيابي ، فنظرت عن يميني فقلت ما تريد يا غلام ؟

فقال: ياعم، أين ابي جهل ؟

فقلت: وما تريد انت من ابي جهل؟!!

فقال الغلام : سمعت انه يسب رسول الله،و والله لا يفارق سوادي سواده (عيونه) حتي يموت الأعجل منا ✋

و بعدين قال: يا عم اخفض صوتك حتي لا يسمع ابن عمي فيسبقني إلى ابو جهل (اصل بن عمه غلام تانى واقف على شمال عبد الرحمن :)

اصلهم بيتسابقوا على نصره رسول الله ❤️

(احنا كمان لازم ننصر رسول الله زي الشباب ده 🤚

نصره دين الله و رسوله هتثبتك، قال تعالى :{ يَا أَيُّهَا الَّذِينَ آمَنُوا إِن تَنصُرُوا اللَّهَ يَنصُرْكُمْ وَيُثَبِّتْ أَقْدَامَكُم } ..

نصره النبى ﷺ بنشر السيرة و اخلاقه الحميده و رحمته الواسعه سيد الخلق اللى ربنا جعله على خلق عظيم.. واتباع سنته ﷺ مش نقول تاني ده سنه يعني مش مهم 😞)

فبيقول عبد الرحمن فتعجبت ، و رفعت رأسي فإذا بغلام اخر على يسارى يغمزني فنظرت فإذا هو في نفس عمر وطول الغلام الاول .. ( دول ولاد عم واحد اسمه معاذ بن عمرو و التانى معاذ بن عفراء )

فقال عبد الرحمن: ماذا تريد ؟ قال : ياعم.. اين ابو جهل ؟ 

فقال : ما تريد انت من أبي جهل ؟ 🤗

قال: يا عم والله قالت لى أمي إن لم تقتل ابي جهل فلا تعود فإنه يسب رسول الله ، والله لا اتركه حتى اقتله و لكن يا عم اخفض صوتك حتي لا يسبقني إليه ابن عمي ..

فعبد الرحمن بيقول : فنظرت إليهما فهما لم يتجاوزا العشر سنوات ( متنسوش ان جو الصحراء و التربيه الشديده كانت بتخلى الاطفال عندهم نضج كويس فى السن ده ) 💪

و بيقول عبد الرحمن : من شدة لين عظام الغلامين فكانا قد رابطا الأسياف علي ذراعيهما ( ميعرفش يشيل السيف فرابط السيف علي دراعه)..

و ليه ده كله ؟✋

عشان سمعت انه يسب رسول الله ❤️ ..

فيقول سيدنا عبد الرحمن بن عوف : فلما نظرت اليهما أرتفعت نفسي ..و بعد مرور بعض الوقت رأيت ابي جهل فقلت لهم ها هو صاحبكم ها هو من أردتموه 💪

فأنطلق الغلامين كالسهمين يجريان ..يتسابقان إلي ابي جهل ..فنظرا إليه فقال احدهما للأخر : إن ابا جهل ضخم.. كيف نقتله؟🤔

فرد التانى و قال: لا عليك فلنضع خطة ، أنت تضرب رجلين الفرس حتى يقع ،و حينها أنا أقتله ،فقال: اتفقنا ..

فقام الاول ضارب الحصان بالسيف في رجله فالحصان وقع علي الارض .. فابو جهل وقع من فوق الحصان..

فقام الغلام التانى ضارب ابو جهل فى رقبته 💪

فشافهم مين ؟ عكرمة بن ابي جهل ✋..

فطلع بسرعه يجري وراهم و لحق عكرمه واحد منهم و ضربه بالسيف على كتفه فنزف كتير بس كمل جرى عشان خاف ابن عمه يسبقه الي النبي ﷺ فيفوز برضا النبي ﷺ قبله :). 

فييجى الغلام و يقول : فوصلنا إلي رسول الله ﷺ فوقفنا أمامه و قلنا: قتلنا ابو جهل..قتلنا ابو جهل ..

فقال النبي ﷺ : آلله الذي لا إله غيره ؟ 

فقلنا والله يا رسول الله ..وبعدين بدأ الغلامين يزقوا بعض .. واحد يقول انا اللي قتلته و التانى يقول لأ أنا اللي قتلته، فقال النبي ﷺ : اسكنوا.. أهدأوا ..

فقال : هل مسحتما سيفيكما ؟ فقالا : لا ..

قال النبى ﷺ : أروني سيفيكما ..

فالنبى ﷺ شاف الدم علي السيفين .. فقال كلاكما قتله 🤗

بس النبي ﷺ لسه مش مصدق ☺️

فجاب الصحابي الجليل عبد الله بن مسعود فقال له : يا بن مسعود اذهب و تأكد ان كانوا قتلوه أم لا.. 

فقال بن مسعود: سأفعل يا رسول الله ..

فبيقول عبد الله : فجريت إليه ( ابو جهل) ..فرأيته في الرمق الاخير ( روحه بتطلع خلاص) ..فوضع بن مسعود قدمه علي صدر ابو جهل .. فقال ابو جهل: لم يبقي الا انت يا عبد تضع قدمك علي صدري !!!.. ثم قال من انتصر اليوم ؟

فقال بن مسعود : الله ورسوله يا عدو الله ..

فضغط عبد الله ابن مسعود عليه بالسيف فقضى عليه ..

و بيقول عبد الله : فجعلت اجري الي رسول الله ابشره وكانت الارض لا تحملني من الفرح فقلت : أبشر يا رسول الله .. مات ابو جهل .. فرد النبى ﷺ و قال : مات فرعون هذه الامة 🤚

هنكمل بكرة إن شاء الله ❤ 

#كن_محمديا