السيره النبويه العطره 32
#السيره_النبويه ❤️
👈اول سريه في الإسلام و تحصل مشكله كبيره! 🤚
👈دعوه النبي ﷺ للصحابه للخروج لقافله ابو سفيان 🤚
👈اشتعال الأمور وخروج قريش لحرب المسلمين عند بدر
(تمهيد لغزوه بدر الكبرى 💪)
💢وقفنا المرة اللى فاتت و قريش متغاظة جداً و هتتجن إن النبى ﷺ و الصحابة هاجروا من مكة و أستقروا فى المدينة و بعتوا جواب تهديد شديد لرسول الله ﷺ فى المدينة و قالوا : " لا يغرنكم أنكم أفلتمونا إلى يثرب .. سنأتيكم فنستأصلكم و نبيد خضرائكم فى عقر داركم "
و يرد رسول الله ﷺ عليهم و يقول : " ما أريد إلا أن تخلوا بينى و بين الناس " ( سيبونى أمشى أنشر الدعوة ✋ ) ..
فيردوا عليه و يقولوا : " كلا والله لن نترككم أبدآ " ..
فيكون رسول الله ﷺ سرية أتسمت بسرية " النخلة " و يأمرها بالخروج و كانت بقيادة " عبد الله بن جحش " و معاه 8 من الصحابة و يعطى النبى ﷺ جواب لعبد الله ..
و يطلب منه أنه ميفتحش الجواب إلا بعد مسيرة يومين فى الطريق .. و بعد يومين يفتح عبد الله الجواب فيجد الرسول ﷺ بيطلب منه أن يذهب إلى نخلة كذا بين مكة و الطائف ودى كانت قريبة جداً من مكه ..
و بيقول النبى ﷺ فى الجواب : " أأتونى بأدق التفاصيل و الأخبار عن قريش ( بس ما يحاربوش) طيب إيه الدليل ؟
الدليل أن الرسول ﷺ باعتهم في الأشهر الحرم " التى حرم الله فيها القتال " عشان يضمن عدم القتال.
لكن فى الطريق تاه من الصحابة 2 واحد أسمه "عتبان بن غزوان" و "سعد بن أبي وقاص" عشان النوق بتاعتهم أتحركت بعيد عنهم و راحوا وراها و للأسف أسرتهم قريش .. فلما عرف عبد الله غضب جدا 😡 و لاقى قافلة من قريش معديه ..فقرر عبد الله أنه يأسر 2 من القافلة ✋
ولكن واحد من الصحابة قاله إن رسول الله منعنا من القتال في الشهر الحرام ، و خرج واحد تانى يقول إن دى آخر ليلة في الشهر الحرام .. و أختلف الصحابة ( بس العامل النفسى و غدر قريش كان شديد عليهم و كام مرة قريش عذبت الصحابة عند البيت الحرام نفسه و فى الشهر الحرام كمان ) ..
فأسر الصحابة 2 من القافلة اللى تبع قريش و حصل شد بينهم فأتقتل واحد من مشركى قريش ..و سقط ميتاً و طبعاً أتفزع الصحابة أنهم قتلوا حد في الأشهر الحرم 😮 ..
و ترجع السرية إلى رسول الله ﷺ و يسألهم إيه الأخبار ؟
فيحكوا للنبى ﷺ اللى حصل فيغضب النبى ﷺ غضب شديد و يقول : " ما أمرتكم بالقتال " ( ده الأشهر اللى حرم الله فيها القتال ) .. و يرفض النبى ﷺ دخول الأسرى للمدينة و يزعل من الصحابة و يمشى .. فينزل القرآن و يحل الموضوع بتوازن شديد و يقول رب العزة :
{ يَسْأَلُونَكَ عَنِ الشَّهْرِ الْحَرَامِ قِتَالٍ فِيهِ قُلْ قِتَالٌ فِيهِ كَبِيرٌ وَصَدٌّ عَن سَبِيلِ اللَّهِ وَكُفْرٌ بِهِ وَالْمَسْجِدِ الْحَرَامِ وَإِخْرَاجُ أَهْلِهِ مِنْهُ أَكْبَرُ عِندَ اللَّهِ }
( يعنى آه مكنش صح يا أصحاب رسول الله إن حد يتقتل فى الأشهر الحرم ، لكن بردوا اللى عملته قريش أكبر عند ربنا من اللى حصل منكم لأنهم أجبروكم على الخروج من مكة و غربوكم و عذبوكم ) .. فيهدى الصحابة و يعفو عنهم رسول الله ﷺ و يحصل تبادل أسرى بين قريش 👌🤗
طيب و القافلة القرشية حصل إيه لما رجعت لمكة ؟🤔
راحوا يجروا يقولوا : " إن محمد الذي يدعو لمكارم الأخلاق يقتل في الأشهر الحرم "
( و كأن بقى للأشهر الحرم حساب عند كفار قريش .. رغم كل اللي عملوه في المسلمين قبل كده ✋) ..
💢و تعدى قافلة قرشية تانية راجعة من الشام لمكة بقيادة " أبى سفيان بن حرب " عليها أموال كتييييير جداً ..
منين الأموال دى ؟🤔
دى أموال المسلمين المهاجرين من مكة .. قريش بتاجر بيها و تبيع و تشترى ..( سيدنا أبو بكر سايب تسع محلات و صهيب الرومي فاكرين لما أجبروه يسيب 12 جمل عليها أموال و ذهب من تعبه و شقاه .. كل ده قريش بتبيع و تشترى فيه ) ..فترصد المخابرات اللى تبع المسلمين إن القافلة دى هتعدى و فيها أموال المسلمين ..
فيقول رسول الله ﷺ للصحابة:
" أخرجوا إلي القافلة و أستردوا حقوقكم " ..
( إسترداد الحقوق فرض على كل مسلم و المسلم مينفعش يبقى عاجز و ضعيف .. مرة كان فى مشكلة بين أتنين فواحد منهم أتهاون فى إسترداد حقه و قال حسبى الله و نعم الوكيل .. فلما النبى ﷺ وصلت له الحكاية دى فقال : " أطلب حَقَّكَ حَتَّى تَعْجِزَ ، فَإِذَا عَجَزْتَ فَقُلْ : حَسْبِيَ اللَّهُ وَنِعْمَ الْوَكِيلُ ، فَإِنَّمَا يُقْضَى بَيْنَكُمْ عَلَى حُجَّتِكُمْ " ) ..
👈 اتعلموا من سيدنا النبي ﷺ
و دلوقتى المسلمين خارجين يرجعوا حقوقهم و بس يعنى مش مجهزين لقتال و كان من الطبيعى إن العربى بيخرج الصحرا بسلاح لأنه معاه ناقة لو جاع هيدبح ..
و مثلاً معرض أنه يقابل حرامية أو حيوانات مفترسة فلازم يبقى معاه سلاح لده و بس .. مش أكتر ..✋
💢أبو سفيان ( قبل إسلامه ) وصله اخبار عن خروج المسلمين لقافلته فخرج بسرعة للإستطلاع بنفسه فسأل راجل عجوز في الطريق إذا كان شاف حد تبع رسول الله ﷺ
فرد الراجل و قال : " نعم لقد رأيت أناس كثيرون مروا من هنا " ، فسأله أبو سفيان عن المكان اللى أستقروا فيه ..
و يروح أبو سفيان على المكان و يلاقى بذر تمر فيفهم أن كان سيدنا محمد ﷺ و أصحابه فى المكان عشان ده تمر المدينة ..
فيبعت أبو سفيان واحد أسمه " ضمضم بن عمرو " عشان يبلغ قريش و يبعتوا له مدد ( ناس أكتر ) .. لكنه عمل فعل خبيث جداً .. راح جرح الناقة بتاعته و خد من دمها و لطخ وشه و لبسه بالدم ، و يدخل مكة و هو بيصرخ و يقول : " اللطيمة .. اللطيمة .. الغوث الغوث " 😱..
فيقولوا له : " مالك يا ضمضم " ..
فيقولهم : " أجتمعوا عند الحرم "
و بعدين يحكى و يقول : " هجم علينا محمد و أصحابه عند بئر بدر و أخذوا الأموال و قتلوا الناس و ضربونا " ..
فيقف أبو جهل و يقول : " والله لا يبيتن رجل منكم إلا فى بدر " .. هتعمل أيه يا أبو جهل بقى ؟🤔
هيجمع أبو جهل جيش بسرعة غير طبيعية .. جيش ما بين 950 ل 1000 جندى .. أنتو متخيلين العدد .. و مش بس كده ب 1000 ناقة و 200 فرس ..
يعنى كل الجيش راكب و مرتاح و محدش هيمشى و معاهم أسلحة و جمال هتدبح هياكلوها فى الطريق و معاهم كل المعدات .. أبو جهل جهز الجيش بسرعة غير عادية ..
طيب النبى ﷺ فين دلوقتى ؟🤔
💢دلوقتي سيدنا النبى ﷺ لسه موصلش لقافله أبو سفيان طيب هو النبي ﷺ معاه كام صحابي ؟
معاه حوالي ٣٠٠ صحابي ومن ٧٠ ل ١٠٠ ناقة يعنى كل ٣ أفراد هيركبوا على ناقة واحدة بالتناوب و هيمشوا باقى السكة ..
طيب هي المسافة من المدينة لبئر بدر كام كيلو ؟
من ٣٠٠ أو ٣٥٠ كيلو ..يعنى لو كل ٣ هيبدلوا بينهم و بين بعض على ناقة واحدة .. يبقى الواحد هيركب ١٠٠ أو ١٥٠ كيلو .. يعنى يركب تلت المسافة ويمشى التلتين ..
يعنى هيمشى حوالى ٢٠٠ كيلو على رجله .. ما هما مش عاملين حسابهم على حرب فعادى إن مجهودهم يروح فى المشى .. أنتو متخيلين المشقة 😞
❤️❤️❤️❤️❤️صلوا على النبي ❤️❤️❤️❤️❤️
💢 النبى ﷺ هيناوب مع 2 من الصحابه على بعير واحد ✋ الاثنين هما " أبو لبابة " و " سيدنا على بن أبى طالب " رضى الله عنهم و هما التلاتة بيبدلوا مع بعض على ناقة واحدة ..
و يركب أبو لبابة شوية و على بن أبى طالب شوية فأبو لبابة أتضايق و قال لعلى رضي الله عنه : " يا على .. يركب النبى ﷺ و نمشى أنا و أنت ؟ " ..
فقال على : " أجل يا أبو لبابة " و قالوا ده للنبى ﷺ بأن مينفعش تمشى .. فأركب و أحنا هنمشى يا رسول الله ..
فيرفض رسول الله ﷺ يقول : " لا والله ما أنتما بأقدر على المشى منى و ما أنا بأغنى عن الثواب منكما " ..
فيرفض النبى ﷺ .. (ياحبيبي يارسول الله ❤️)
💢طيب أبو سفيان عمل إيه بعد ما بعت ضمضم ؟ ..
أبو سفيان سلك طريق تانى .. عرف يلاقى سكة مش ممكن يكون النبى ﷺ هيعدى منها .. و مشى منها و قام باعت جواب لقريش و يقولهم : " يا معشر قريش لا تخرجوا نجت العير ( القافلة ) " ..( تلاحظوا يا جماعة من الموضوع ده أن أبو سفيان مش بيسعى لحرب ولا بتاع مشاكل يمكن عشان كده ربنا أكرمه بالإسلام .. و أبو سفيان هيسلم بعد كده و هيبقى صحابى ♡ ) ..
المهم بعد ما أبو سفيان ما قالهم أنا عديت خلاص .. متخرجوش .. فيقوم أبو جهل ميوافقش ، و يقول : " لا .. والله لنخرجن إلي محمد الليلة لنصل إلى بدر ولنبيتن ببدر هذه الليلة ونشرب الخمر ونذبح الجمال وناكل و نطعم و ترقص المغنيات حتى تعلم العرب أننا لا نقاتل " ..
فيطلع واحد أسمه " عتبة بن ربيعة " و يقولهم : " يا معشر قريش نجت القافلة لا تخرجوا .. ما يريد محمد إلا أن نخلوا بينه وبين سائر العرب " .. ( يبقى عتبة فاهم قضية النبى ﷺ كويس و هي تبليغ الدعوة للإسلام ) ..
و راح عتبة مكمل كلامه و قايل : " لئن أصابته العرب .. إذن فهذا ما أردتم ولئن أنتصر فعزه عزكم وملكه ملككم "
فيرد أبو جهل و يقول : " كلا والله لن نتركه أبدآ " ..
و يبدأ أبو جهل يجهز الجيش .. الجيش خارج من مكة والجيش قرب يطلع خلاص .. و فى ناس خافت و مردتش تطلع .. ليه ؟🤔
لأنهم كلهم عارفيين إن النبى ﷺ هو نبى الله حقآ و أن ربنا هيقف جنبه ...
💢طيب فى واحد محدش يتصور أنه مش راضى يطلع يحارب لأنه قوى و شجاع .. مين هو ؟ 🤔
فاكريين الراجل اللى كان بيعذب بلال ؟ كان أمية بن خلف ..أمية كان راجل ضخم جداً و قوى جداً فى منتهى الشجاعة .. لكن مكنش راضى يطلع مع الجيش و رجع بيته و تربس على نفسه باب بيته و أستخبى جوة ..
طيب ليه كل ده .. هو إيه اللى مخوفه كده ؟🤔
أصل أمية بن خلف من فترة بعد ما النبى ﷺ هاجر للمدينة قام " سعد بن معاذ " سيد و رئيس المدينة رايح يعمل عمرة و يطوف حوالين الكعبة .. فسعد دخل الحرم فأول ما دخل سعد و لسه بيطوف حوالين الكعبة لقى فى وشه أبو جهل .. فقام أبو جهل وقف و مسك سعد من هدومه وقال : " آويتم محمدآ !! والله لننتقمن منكم " ..
( طيب ينفع يمسك أبو جهل سعد بالشكل ده .. و سعد يسكت ؟!! لأ )
يقوم سعد زاقق أبو جهل فيقع أبو جهل على الأرض ويقوم سعد قايل : " يا أبا الحكم لا ترفع صوتك هكذا " ..
فيفضلوا يتخانقوا مع بعض .. فجه مين ؟🤔
أمية بن خلف و أمية كان صديق قديم لسعد بن معاذ فمسك أمية سعد و قال له : " يا سعد لا ترفع صوتك هكذا على أبا الحكم " ..
فقام سعد رادد عليه و قال : " إليك عنى يا أمية .. و الله يا أمية لقد حدثنا رسول الله أننا قاتلوك "
فأمية راح قايل : " أحقآ يا سعد ؟ " ..
فقال : " نعم والله " ..
فيقوم قايل له : " يا سعد سأقتل خارج مكة أم فى مكة ؟ ". فقال سعد : " لا أدرى " ..
( هو أمية ماله ؟ أمية مصدق كلام النبى ﷺ جداً و عارف إن مدام النبى ﷺ قال إن أمية هيموت يبقى أكيد كلام رسول الله حق .. شايفين إزاى الكفار كانوا عارفين إن سيدنا محمد ﷺ نبى لكن الكبر و العند هوه اللى أخرهم عند طاعة رسول الله لحد ما ماتوا على الكفر ) ..
المهم من الوقت ده و أمية بقى مرعوب و مستنى لحظة موته .. فلما جت غزوة بدر فقال أمية : " لن أخرج فى هذه المعركة " و راح تربس و قفل على نفسه بابه ..
فمراته أتخضت فقال لها كلام سعد بن معاذ و قال لها : " و أرى أننى إن خرجت فإننى مقتول " ..
فقامت مراته قالت : " إذن لا تخرج " .. بس يجيله واحد صاحبه أسمه " عقبة بن أبي معيط " ( ده المجرم اللى مرة بصق فى وجه النبى الشريف صلى الله عليه و سلم ) ، فيفضل عقبة يخبط .. بس أمية ميفتحش لأنه خايف .. فيفضل عقبة يخبط يخبط ..
فأمية يفتح الباب و يقول له : " ما تريد ؟ " ..
فيقول عقبة : " يا أمية هلم معنا " ،
فيقول أمية : " لا لن أخرج " و يصر ..
فعقبة يمشى و يرجع لأمية تانى و هو جايب معاه "المجمرة"
( دى حاجة بيبخروا بيها ) .. فيخبط عقبة فيفتح أمية فيدخل عقبة و يشعل المجمرة ويلف حوالين أمية و يقوله :
" أستجمر يا أمية فإنما أنت من النساء .. أستجمر .. فإنما أنت من النساء " ( مدام مش عايز تطلع معانا يبقى أنت من النساء ) شايفين الصديق السوء !! ..
المهم رد عليه أمية و قال : " ويحك ما أراك تأخذنى إلا لمقتلى " .. فيرد عقبة و يقول : " أنت من النساء " ..
فيضايق أمية و يقول له : " ويحك بئس ما جئت به !! " ..
بس أمية هيسمع كلام صاحبه وهيخاف على سمعته فيقول أمية : " إنى خارج " ✋ ..
فتجرى عليه زوجته و تقوله : " يا أمية أنسيت ما قاله لك سعد !! " ..
فقال : " لا تخافى سأشترى أسرع فرس فى مكة " ( عشان أى حاجة تحصل يطلع يجرى ) ،
و فعلاً راح أمية و أشترى أسرع فرس فى مكة .. بس ده هينفعه ؟🤔
لأ ..لأن أمية فعلاً هيموت زى ما النبى ﷺ قال 👌
💢وفى واحد تانى مش راضى يطلع برضوا...مين هو؟🤔
أبو لهب .. أصله مصدق النبى ﷺ جداً فهو واثق إن النبى ﷺ هينتصر .. عشان كده الله عز وجل سماهم الكفار
( لأن كفر فى اللغة يعنى ستر و غطى و ليها نفس نطق بالإنجليزى cover يعنى غطى .. و كفر فى كتاب الله معناها : ستر الحق و هما فعلاً عرفوا الحق و ستروه و خبوه و كذبوه ) ..
المهم أبو لهب مكنش راضى يطلع بس عيب أوى قدام العرب أنه ميطلعش .. فيمثل أنه عيان و يأجر شاب يطلع مكانه و يقوله خد سيفى وخد الفرس بتاعى أصل أنا مريض و تعبان .. ويطلع الولد فعلاً والجيش كله يخرج ..
طيب أبو لهب كده أرتاح ؟ لأ ..
هيفضل أبو لهب فى مكة لا عارف ينام ولا ياكل ولا يشرب .. هيتجنن عايز يعرف إيه الأخبار .. و مش قادر يصبر ..
فبعد كام يوم هيروح أبو لهب على بيت العباس عم رسول الله طيب هو أصلاً العباس موجود فى مكة ؟🤔
لأ طبعاً العباس خرج مع الجيش .. طيب إزاى ده العباس رغم كفره كان واقف يوم بيعة العقبة و بيوصى أهل المدينة على النبى ﷺ أنهم يحموه .. و كان حابب ياخد دور أخوه أبو طالب فى حمايته للنبى ﷺ بعد وفاته ؟
أصل عشان كده العباس هيخرج مضطر .. غصب عنه و مش هيرفع سيفه فى المعركة .. بس أبو لهب من شدة قلقه راح على بيت العباس .. يعنى عنده أمل أن يمكن العباس يكون بعت أى أخبار لزوجته " أم الفضل " ..
فتفتح أم الفضل فتقول له : " ما بك ؟ " ..
فيقول : " هل عندك من أخبار ؟ " ..
فقالت : " لا .. ليس عندى من أخبار " ..
فيمشى أبو لهب بس يفضل قاعد قدام بيت العباس .. مستنى أى أخبار ..
فيعدى واحد أسمه " أبو سفيان بن الحارث " ده كان جاى من عند بئر بدر فأبو لهب شافه و سأله : " ما يحدث ببدر ؟ " ياترى قاله أيه ؟! 😊
هنعرف بكرة إن شاء الله ❤
#كن_محمديا
👈لاتنسى الإعجاب بالصفحه ليصلك الحلقات الجديده 👍
تعليقات
إرسال تعليق