السيره النبويه العطره 31

 

#السيره_النبويه ❤️

👈الحياه في مدينه رسول الله ﷺ ما أجملها 🤗❤️

👈موقف من صحابي أضحك الله جل جلاله ❤️☝️

👈تواضع النبي ﷺ ومعاملته للفقراء ودروس أخلاقيه ❤️

💢طبعاً أنتو عارفين إن النبى ﷺ بيته أتبنى جنب أخواله " بنى النجار " و شفنا اللى حصل و إزاى الناقة حددت مكان البيت .. والبيت أتبنى و جنبه المسجد النبوى وأنتقل النبى ﷺ لبيته ❤ .. و كان بيت سيدنا النبى ﷺ بسيط أوى .. أصل النبى ﷺ كان متواضع و قريب من الناس و بتحكى السيده عائشة و بتقول : " والله ما راي رسول الله خبز القمح بعينيه قط و لم يشبع من خبز الشعير قط " ..

( يعنى دايماً الأكل مش كتير .. و خبز الشعير جاف جداً و لونه غامق أوى .. تخيلوا و كمان مش بيكفيه عشان يشبع .. الحمد لله على النعم اللى أحنا فيها ) ..

 تخيلوا ده كان أكل رسول الله ﷺ ..قال تعالى :

{ تَبَارَكَ الَّذِي إِن شَاءَ جَعَلَ لَكَ خَيْرًا مِّن ذَٰلِكَ جَنَّاتٍ تَجْرِي مِن تَحْتِهَا الْأَنْهَارُ وَيَجْعَل لَّكَ قُصُورًا }

اللهم صل على صاحب المقام المحمود الحبيب المصطفى

عارفين كمان بتقول السيدة عائشة رضي الله عنها : " كان يمر علينا هلال تلو الهلال تلو الهلال و لا يوقد في بيت رسول الله نار " ( تقصد شهر ورا شهر مش بيطبخوا ) فيرد عليها عبد الله بن الزبير بن العوام ( تبقى خالته السيدة عائشة ) و يقول : " يا خالة .. و ما كان يعيشكم ؟ " ( كنتوا بتاكلوا إيه ؟ ) .. قالت : " الأسودان .. التمر و الماء " ( يااا .. أختار النبى ﷺ الهجرة و العيشة الصعبة دى فى سبيل تبليغ الدعوة لدين الله ) ..

💢و من مواقف تواضع النبي ﷺ أن مرة جه راجل من أهل المدينة و سأل : " أين رسول الله .. أين رسول الله " ..

كان الراجل مستنيه و عايز يشوفه أوى ♡ فدخل على النبي ﷺ فالراجل أول ما شاف النبى ﷺ أترعش من هيبة رؤية النبي ﷺ و بدأ يبعد .. فلما النبى ﷺ شافه بالشكل ده قام قايله : " يا أخي هون عليك ( يعنى لا تفعل هذا ) .. إنما أنا عبد و ابن أمه كانت تاكل القديد بمكة " و طبطب عليه ♡ ..(ياحبيبي يارسول الله ❤️) 

و كان يقف النبى ﷺ في المسجد النبوي و يمر عليه عابر سبيل و يطلب من النبي ﷺ إن يضيفه و يأكله فيبعت لبيته و يقول :" هل عندنا من طعام ؟ " ..

فيجي له الرد :" والذي بعثك بالحق نبياً ليس عندنا إلا الماء"

فيقف الرسول ﷺ على المنبر و يقول : " أيها الناس من يضيف ضيف رسول الله الليلة ؟ " ..

فيخرج رجل من الصحابة بلهفه و يقول : " أنا يا رسول الله و لكن أرجع لأهل بيتي أخبرهم و بعد ذلك أضيفه " ..

فيجرى الراجل على بيته و يقول لزوجته : " هل عندك من طعام ؟ " .. قالت : " والله ليس عندنا إلا شيء من شعير و قطعة عناق ( حتة لحمة ) و لكنه طعام الأولاد " ..

فرد عليها و قال : " لا تطعمي الأولاد نوميهم و أنا سوف أحضر ضيف رسول الله ﷺ لياكل هو الطعام " ..

فوافقت الزوجة وقالت : " أجل سوف أنوم الصبيان " ..

و بقت توهم الولاد إن فيه أكل على النار لحد ما الولاد ناموا ( بس دلوقتى فى حاجة مهمة ..من الذوق و السنة إن يأكل المضيف مع الضيف عشان الضيف ميحسش بإحراج و يرضى ياكل و المشكلة دلوقتى الأكل قليل أوى مش هيكفى .. ده الأكل يدوووب يكفى الضيف بس ) .. 

فزوجها قال لها : " عندما يأتي الضيف أصعدي كأنك تصلحي السراج ثم أطفئيه ليظن الضيف أنه قد فسد السراج ثم أنزلى وضعي أمام الضيف كل الطعام و ضعى أمامي و أمامك صحن فارغ و سنصنع كأننا نأكل " ( هنمثل أننا بناكل ) ..

 فقالت له : " أجل " .. و فعلاً أول ما الضيف جه راحت الزوجة عملت زى ما زوجها قالها بالظبط ^_^

و الضيف أكل و عدى اليوم الحمد لله و نام الزوج و الزوجة و الأولاد من غير ما ياكلوا شئ ..

فلما جه وقت صلاة الفجر و خرج الصحابى للصلاة ..

ففوجئ الصحابى إن النبى ﷺ مستنيه و فاتح ذراعيه و قال له : " أقبل يا هذا .. أقبل .. ما فعلت بضيفي البارحة ^_^ ؟ " فقال : " يا رسول الله ما فعلت شيئآ " ..

فقال له رسول الله : " إن الله قد ضحك من صنيعكما و قد أوجب لكم الجنة بما فعلتم ❤️🤗 "

(سبحان اللطيف الودود ❤️❤️❤️☝️) 

💢طيب فى مشكلة بتواجهه رسول الله ﷺ فى المدينة دلوقتى .. إيه هي؟ أهل الصُّفّة 👌..

دول فقراء و عددهم 100 .. بلا مأوى ولا مطعم و لا ملبس .. و أسكنهم النبى ﷺ في المسجد عشان يتصدق عليهم المسلمين و كلف النبى ﷺ بعض الصحابة عشان يعلموا أهل الصُّفّة النجارة و الحدادة الصبح أما بالليل يعلموهم القرآن و أمور الدين و كانوا 70 صحابى أسمهم " القُرَّاء " و بعد شهور بقوا أصحاب دين و كمان معاهم حرفة بيشتغلوا بيها ..وكان الصحابى الجليل الشهير " أبو هريرة " من أهل الصُّفّة ❤️

و من رحمة النبى ﷺ إن مرة واحد من أهل الصُّفّة جه المسجد و كان لابس يدوب قطعة قماش بتغطي العورة ..

فينظر النبي ﷺ له و يصعب عليه أوى و يحمر وجهه و يغير النبى ﷺ موضوع الخطبة و يطلب من الناس أنهم يتصدقوا فمع إنتهاء الخطبة يكون كل اللى في المسجد تصدق على الفقراء اللى فى المسجد .. فالراجل أكل و شرب و لبس ..

( كل واحد بيسارع على مساعدة الفقير .. لبس .. أكل .. شرب .. يعرف أنه بيرفض إن وجه النبى ﷺ يحمر من الغضب و يعرف أنه بيحب إن ربنا الرقيب يشوفه بيقوم بدوره على الأرض و بيساعد العباد ..

قال تعالى : { إِنِّي جَاعِلٌ فِي الْأَرْضِ خَلِيفَةً } ) 👌.. 

و مرة تانية كان الرسول ﷺ بيخطب فى المسجد فدخل عليه رجل فقير و عزيز النفس .. و النبي ﷺ كان عارفه ..

فأول ما النبى ﷺ شافه قطع الخطبة و ناداه فرد عليه و قال : " لبيك يا رسول الله " ..

فكل اللى فى المسجد بصوا عليه ..

فراح النبى ﷺ قايل له : " هل صليت تحية المسجد ؟ " ..

 فقال : " لا " .. فقال له النبى ﷺ : " صليها " ..

و عاد النبى ﷺ للخطبة ..

( هو النبى ﷺ عمل إيه) ؟ النبى ﷺ عايز الناس تهتم بالراجل ده .. بس الراجل ده عزيز النفس مش هينفع حد يقدمله صدقة بصورة مباشرة .. فالنبى ﷺ سلم عليه و كلمه قدام الناس عشان الناس تفكره راجل تبع النبى ﷺ فساعتها يهتموا بيه ) .. و فعلاً بمجرد أن الخطبة أنتهت كانوا الصحابة راحوا للراجل و عاملوه أحسن معاملة و أكلوه و لبسوه و خد كمان أكل لأهله ^_^ 

 

❤️❤️❤️❤️❤️ صلوا على النبى❤️❤️❤️❤️❤️

💢و فى المدينة فضل النبى ﷺ يعلم المسلمين الأخلاق و يقول :" أيها الناس ليس المسلم بالطعان و لا اللعان ولا الفاحش ولا البذيء ... المسلم من سلم المسلمون من لسانه و يده .... لا يدخل الجنة من لا يأمن جاره بوائقه ....

 لا يؤمن أحدكم حتى يحب لأخيه ما يحب لنفسه ... الراحمون يرحمهم الله ... سباب المسلم فسوق و قتاله كفر" ...

و يزداد حب الصحابة للنبى ﷺ و من كتر حب الصحابة للنبى ﷺ بقوا يقلدوه فى كل شئ مشيته .. تسريحه شعره .. لبسه .. وفي كل أحواله .. و أخلاقه ♡ ..

👈 طيب أتبقى مشكلة واحدة .. إزاى نجمع المسلمين فى الصلوات الخمس ؟( أصل مكنش لسه فيه آذان ) ..

فواحد أقترح إستخدام البوق .. بس النبى ﷺ معجبتهوش الفكرة لأن اليهود بيستخدموه .. فقام واحد تانى أقترح يستخدموا الناقوس ( الأجراس ) و بردوا النبى ﷺ رفضها لأن يستخدمها النصارى .. فجه واحد من الصحابة أسمه " عبد الله بن زيد " كان مهموم لأنه لاقى النبى ﷺ بيفكر و مهموم .. فبقى عبد الله عمال يفكر فى طريقة عشان يحل المشكلة دى و يرتاح رسول الله و ينبسط ..

فعبد الله نام و شاف رؤية فى المنام ❤️ ❤️ ❤️ 

عبد الله بن زيد حلم بإنه ماشي في طرقات المدينة و قابل راجل شايل ناقوس فطلب عبد الله أنه يديله الناقوس ده فرفض الرجل و قال لعبد الله : " هل أدلك على خير من هذا ؟ " ، فقال عبد الله : " أجل " ..

فرد الرجل و قال له : " قل .. الله أكبر .. الله أكبر .. الله أكبر .. الله أكبر أشهد أن لا إله إلا الله أشهد أن محمد رسول الله إلى آخر الآذان .. و أنتهى الحلم " .. 

و يصحى عبد الله و يجرى على النبى ﷺ فى المسجد و يحكيله على الرؤية .. فيرد النبى ﷺ و يقول له : " إنها لرؤية حق إن شاء الله فقم يا عبد الله و ألْقِ على بلال ما رأيت فإنه أندى صوتاً منك " ( يعنى عبد الله بن زيد مش بقى المؤذن لأن صوت بلال أحلى ♡ .. يعنى من النهارده بالنسبه لصوت المؤذنين المزعج اللى أغلبنا بيسمعه يوميآ .. أعرف إن ده ملوش علاقة بدين الإسلام و لا برسول الله .. لأن الرسول لو كان بينا كان مش هيخلى غير اللى صوته جميل هو اللى يأذن ^_^ ) ..

المهم قام عبد الله و قال لبلال رضى الله عنه على الآذان و وقف بلال يؤذن فبمجرد ما سمع عمر بن الخطاب رضي الله عنه صوت الآذان وهو في بيته خرج يجرّ رداءه ( بيجرى بسرعة ) للمسجد النبوى و قال : " يا رسول الله والذي بعثك بالحق لقد رأيت مثل سمعت الآن " ..

فيقول النبى ﷺ : " فلله الحمد ♡ " ..( قال ﷺ : " الرؤيا الصالحة جزء من ستة وأربعين جزءاً من النبوة ) ..❤️❤️

💢بدأ مجتمع المنافقين في الظهور ..ودول ناس بيبينوا أنهم مسلمين لكن يبطنوا الكفر جواهم .. بيكسبوا ود رسول الله ﷺ و أصحابه عشان تستمر مصالحهم في المدينة بنفاقهم وكمان يكسبوا ود اليهود في نفس الوقت ... كان على رأس المنافقين واحد أسمه " عبد الله بن أبي بن سلول " ..

طيب ليه بيحقد على الإسلام و رسول الله بالشكل ده ؟

 أصل يوم وصول النبى ﷺ للمدينة .. كان عبد الله بن أبي بن سلول بيتم تتويجه سيدآ فى المدينة ..و لما وصل الرسول ﷺ للمدينة .. الناس سابت تتويج عبد الله و جريت لرؤية النبى ﷺ.. فأتغاظ عبد الله جداً و أتملى قلبه بالحقد .. و يفضل عبد الله زى ما هنشوف بعد كده يؤذي المسلمين لحد ما يموت ..

👈 طيب قريش .. أخبارها إيه بعد هجرة الرسول و الصحابة من مكة ؟ 🤔

قريش هتموت من الغيظ ^_^ هتتجنن ..

و يتبعت جواب من سيد قريش إلى محمد ابن عبد الله :

" أظننتم أنكم قد أفلتم منا ! لا والله لنبعثن إليكم في كل عام جيش حتى نستأصل شأفتكم ( جزوركم ) ..

والله لنقاتلنكم حتى نتفانى " .. شايفين تهديد قريش ! 

فالنبى ﷺ فى المدينة ممكن يتقتل فى أى لحظة لدرجة إن النبى ﷺ مكنش بيقدر ينام كويس ، قلقان من غدر قريش و فى يوم تعب أوى من السهر ،فَقَال َ: " لَيْتَ رَجُلاً صَالِحًا مِنْ أَصْحَابِي يَحْرُسُنِي اللَّيْلَة َ" .. 

فسمع خَشْخَشَةَ سِلاَحٍ فَقَال َ: " مَنْ هَذَا ؟ " ..

فقال َ: " سَعْدُ بْنُ أَبِي وَقَّاصٍ " ..

فَقَالَ لَهُ رَسُولُ اللَّهِ : " مَا الذى جَاءَ بِكَ ؟ " ..

قَال َ: " وَقَعَ فِي نَفْسِي خَوْفٌ عَلَيك يا رَسُولِ اللَّهِ ، فَجِئْتُ " .. فنام النبى ﷺ ..

( كان الصحابه بيقولي على النبي ﷺ يأخذ بالأسباب حتى نقول أنه لا يتوكل على الله و كان يتوكل على الله حتى نقول لا يأخذ بالأسباب .. يعنى آه يا سعد أنت بتحرص رسول الله بس الرسول نام وهو عارف أن لن يصيبنا إلا ما كتب الله لنا .. و على فكرة سيدنا النبى ﷺ مش خايف على نفسه ، هو خايف على الرسالة و الدعوة ، و مش هيرتاح إلا بعد نزول الآية دى ✋

قال تعالى : { وَاللَّهُ يَعْصِمُكَ مِنَ النَّاسِ } فساعتها هيفهم أنه مش هيتقتل و هيبقى مطمن على حياته لأجل الدعوة لدين الله الحق ♡ ..

💢طيب وصل تهديد قريش للنبى ﷺ بأنهم هيحاربوهم 🤚 فيبدأ النبى ﷺ في تكوين سرايا من الصحابة

( سرية : مجموعة جنود بيخرجوا بس من غير رسول الله ﷺ .. سواء يحاربوا أو لأ ) ..

و زاد تهديد قريش لدرجة أنها أرسلت سرية قتالية بقيادة " كرز بن جابر الفهري " و دخلوا المدينة في نص الليل

و حرقوا النخل و هدموا مناطق حيوية ، لكن مقتلوش حد و هربوا و مقدرش الرسول و الصحابة أنهم يمسكوهم ..

طيب هتعمل إيه يا رسول الله ؟

هنعرف المرة الجاية إن شاء الله ❤

#كن_محمديا