السيره النبويه العطره 28

 

#السيره_النبويه ❤️

👈معجزات النبي ﷺ في طريق الهجره للمدينه ❤️

👈وصف سيدنا النبي ﷺ كأنك تراه ﷺ 😊❤️

👈هجره سيدنا علي للمدينه وإشاعه موت النبي ﷺ😢

💢كفار قريش قالبين الدنيا على سيدنا النبى ﷺ و بيدورا فى كل حتة و فعلاً أكتشفوا الطريق اللى مشى فيه النبى ﷺ وصاحبه أبو بكر رضى الله عنه .. و وصل الكفار للجبل اللى فيه الغار 😢 .. و طلعوا الجبل و وقفوا قدام الغار بالظبط .. و الغار صغير أوى .. أبو بكر جوه مش مصدق أنهم قدام الغار .. فبدأ يتوتر و بقى مضطرب جداً 😔 ..

أصل سيدنا أبو بكر مش خايف على نفسه .. أبو بكر خايف على النبى ﷺ و على الدعوة لدين الله 😟.. 

فبمنتهى القلق بص للنبى ﷺ و قال : " يَا رَسُولَ اللَّهِ ، لَوْ أَنَّ بَعْضَهُمْ طَأْطَأَ بَصْرَهُ رَآنَا " ( لو حد منهم بس يوطى رأسه كده و يبص تحت .. هيكشفنا ) ، و يرد النبى ﷺ و هو قاعد فى سكينة و يقول : " يَا أَبَا بَكْر ٍ، مَا ظَنُّكَ بِاثْنَيِنْ اللَّهُ ثَالِثُهُمَا " .. و فعلاً الحمد لله ربنا حفظ رسول الله و صاحبه عن الكفار. يقول الله تعالى :

{ إِلَّا تَنصُرُوهُ فَقَدْ نَصَرَهُ اللَّهُ إِذْ أَخْرَجَهُ الَّذِينَ كَفَرُوا ثَانِيَ اثْنَيْنِ إِذْ هُمَا فِي الْغَارِ إِذْ يَقُولُ لِصَاحِبِهِ لَا تَحْزَنْ إِنَّ اللَّهَ مَعَنَا فَأَنزَلَ اللَّهُ سَكِينَتَهُ عَلَيْهِ وَأَيَّدَهُ بِجُنُودٍ لَّمْ تَرَوْهَا } ..

وهنا أتذكر أبو بكر فى القرآن الكريم و أتثبتت صحبته لرسول الله ﷺ من فوق سبع سماوات.. رضي الله عنه ❤️. 

💢طيب الرسول ﷺ هيقعد مع أبو بكر فى الغار لمدة ثلاث أيام و دلوقتى فى أدوار مهمة أوى هيقوم بيها أكتر من شخص منهم إسمه " عامر بن فُهَيرة " رضي الله عنه ده كان مولى ( خادم ) أبو بكر الصديق رضي الله عنه ..

عامر هيرعى الغنم فى الطريق اللى فيه آثار قدم النبى ﷺ الشريفة و أبو بكر الصديق .. عشان يمحى آثار الأقدام وساعتها محدش من الكفار هيقدر يعرف طريقهم ..

أما " أسماء بنت أبي بكر " رضي الله عنها كانت بتاخد الأكل و الشرب و تروح يوميآ الغار لرسول الله ﷺ و أبوها ..

وكان مناسب جداً أنها تمسك المهمة دى عشان محدش هيشك فيها أصل صعب أن إمرأة تمشى المسافة دى فى الصحراء ، و خصوصاً لو فى الشهور الأخيرة لحملها .. وكانت بتربط الأكل و الشرب بحزام حوالين بطنها و عشان كده سماها الرسول " بذات النطاقين " وكانت بتمشى المسافة دى وتطلع الجبل لمدة 3 أيام متواصلة ❤️❤️

و فى واحد أسمه " عبد الله بن أُرَيْقِط " ده هيبقى مع النبى ﷺ و أبو بكر فى تكملة المسيرة للمدينة و هيجيب ناقة تالتة ،و كمان هيكون معاه عامر بن فُهَيرة و هيكملوا معاهم لحد المدينة بإذن الله ✌️ ..

💢خرج الرسول ﷺ مع أبو بكر بالليل من الغار .. و أتجهوا ناحية اليمن و بعدين غرباً ناحية البحر الأحمر و بعدين شمالاً فى طريق صعب أوى كله تعاريج و حفر 😌🤚

و هنا كان سيدنا أبو بكر بيعمل حاجة جمييييلة أوى 😊 ..

أبو بكر كان يمشى على يمين النبى ﷺ شويه و بعدين يلف و يمشى على شماله شويه كمان و يلف و يمشى قدامه شويه ، و بعدين يلف يمشى ورا النبى ﷺ شويه ^_^❤️..

فالنبى ﷺ خد باله فسأل أبو بكر و قال : " ما بك يا أبا بكر ؟" فرد أبو بكر و قال : " يَا رَسُولَ اللَّهِ أَذْكُرُ الطَّلَبَ ( إن حد يجيلك من وراك ) فَأَمْشِي خَلْفَكَ ، ثُمَّ أَذْكُرُ الرَّصَدَ ( إن حد يجيلك من أمامك ) فَأَمْشِي بَيْنَ يَدَيْك .. ثم أذكر الميمنة و أذكر الميسرة " ..

شايفين أبو بكر بيحمى النبى ﷺ أزاى !! كان أبو بكر بيقول للنبى : " إِنْ قُتِلْتُ أَنَا فَإِنَّمَا أَنَا رَجُلٌ وَاحِد ٌ، وَإِنْ قُتِلْتَ أَنْتَ هَلَكَتِ الْأُمَّةُ " ❤️ (مفيش أجمل من إيمان سيدنا أبو بكر اللي لو اتوزن بإيمان الأمه لرجح ❤️❤️) 

💢طيب دلوقتى قريش هتتجنن و بتحاول تحفز الناس كلها بالمكافأت أنه يدورا على النبى ﷺ و كانت المكافأة 100 ناقة يعنى ثروة كبيرة جداً .. وكله كان مموت نفسه و بيجتهد عشان يلاقى النبى ﷺ عشان ياخد المكافأة لكن كلهم فشلوا إلا واحد بس وهو أسمه " سُرَاقَةُ بن مالك " ✋..

سُرَاقَةُ شاف النبى ﷺ و أبو بكر فبسرعة خد فرسه و سلاحه لحد ما قرب من النبى ﷺ و أبو بكر ، و أبو بكر شاف سُرَاقَةُ بيقرب منهم أكتر 🙆

بس الحمد لله حصلت معجزة .. إيه هي ؟

رجل الفرس اللى راكبه سراقة عماله تغرس جوه الرمل .. مرة و أتنين و تلاتة فسُرَاقَةُ فهم إن فى شئ مانعه عن الرسول و أبو بكر فقام قايل : " يا محمد أسألك الأمان " .. 

و فعلاً قرب من النبى ﷺ و قال : " إن قريش قد وعدت بديه لمن يمسك بكم وإنى أريدها ..

فقال رسول الله ﷺ : " يا سُرَاقَةُ أَخْفِ عَنَّا " ..

و بعدين قال له كلام عجيب أوى قال ﷺ : " كَأَنِّي بِكَ يَا سُرَاقَةُ تَلْبَسُ سُوَارَيْ كِسْرَى "

( النبى بيقوله هيجى اليوم اللى هتاخد فيه الأساور الذهب اللى كِسْرَى ملك الفرس بيلبسهم فى إيده ) ،

فسراقة بقى مذهول .. مش مصدق إن ممكن ده يحصل فى يوم من الأيام فقال للنبى ﷺ : " أكتب لى ورقة ( أمضى لى على ورقة ) أن لو أنتصرتوا على الفرس ستعطونى أساور كِسْرَى " ..

فأمر رسول الله ﷺ عامر بن فُهَيرة أنه يكتب لسراقة الكلام ده فى ورقة كضمان 😌 و مشى سراقة و بدأ يضلل الناس عشان يبعدوا عن طريق النبى ﷺ و يقول لهم : " أرجعوا لقد بحثت فى هذا الطريق جيداً ولم أجد محمد " ..

سبحان الله ربنا سخر سراقة لرسول الله قال تعالى : { وَمَا يَعْلَمُ جُنُودَ رَبِّكَ إِلَّا هُو َ} 👌

على فكرة هتمر الأيام و هنشوف بعد كده بعد فتح مكة و سراقة هيسلم و بعد وفاة رسول الله ﷺ و بعد ما هتتفتح بلاد الفرس على أيد أمير المؤمنين الخليفة عمر هيكون فى غنائم للمسلمين و فيها أساور كِسْرَى ملك الفرس ..

فسراقة هيكون عجوز و هيدى لسيدنا عمر الورقة اللى أتكتب له ضمان من النبى ﷺ أنه له سُوَارَيْ كِسْرَى ،

فهيدى سيدنا عمر رضي الله عنه سُوَارَيْ كِسْرَى لسراقة تنفيذاً لوعد رسول الله ﷺ قال تعالى : { وَ مَا يَنْطِقُ عَنِ الْهَوَى * إِنْ هُوَ إِلَّا وَحْيٌ يُوحَى } ٰو يبكى سراقة و يبكى سيدنا عمر .. صدقت يا رسول الله 😊❤️ .

❤️❤️❤️❤️❤️صلوا على النبى ❤️❤️❤️❤️❤️

💢دلوقتى النبى ﷺ فى طريقه للمدينة طريق طويل و صعب أوى وطبعاً ده عشان يقدر يهاجر من غير ما قريش تمسكه و تمنعه من الهجرة ..

ابن أريقط مولى ( خادم ) أبو بكر مشى معاهم شوية وآدى خدمته و دلوقتى سابهم ( وعلى فكرة مش وارد فى السيرة إذا كان أسلم ولا لأ ) .. و النبى ﷺ و أبو بكر و عامر فى الطريق حسوا أنهم جعانين و عطشانين أوى ..

فمروا على خيمة فيها إمرأة أسمها " أم مَعْبد " و طلبوا منها تمر و لبن عشان يشتروا منها و لكن ملاقوش عندها أكل فالنبى ﷺ بيبص كده فلاقى معزة صغيرة

فقال : " ما هذه الشاه ؟ " ..

قالت : " شاه خلفها الجهد عن الغنم " ( يعنى ضعيفة ) ، فقال : " هل بها من لبن ؟ " ،

قالت : " هي أجهد من ذلك " ،

قال : " أتأذنين إلي أن أحلبها ؟ " ..

قالت : " نعم .. إن رأيت بها حلبا فأحلبها " ،

فالنبى ﷺ قال : " أحضروا الشاه " ..

فبدأ النبى ﷺ يمسح بأيده الشريفة على ضرع الشاه و يدعى ، فالضرع بقى فيه لبن فقال : " أحضروا إناء " ..

و فضل النبى ﷺ يحلب المعزة دى لحد ما الطبق أتملأ على آخره .. فشربوا كلهم و شبعوا و فضل كمان لبن لأم معبد و مشيوا ..و بعد شوية زوج أم معبد جه فلما شاف أبو معبد اللبن أستغرب جداً جداً وقال : " من أين لك بهذا اللبن يا أم معبد والشاه عازب .. ولا حلوبة في البيت ؟ " ،

فقالت : " مر بنا رجل مبارك من حاله كذا وكذا " ،

فقال : " صفيه لي يا أم معبد " .. ( ركزوا بقى معايا عشان أم معبد وصفت النبى بدقة رهيبة ^_^❤️😊 ) ..

فقالت أم مَعْبد : " رأيت رجلاً ظاهر الوضاءة ، أبلَجَ الوجهِ ( وشه منور ) ، لم تَعِبه نُحلَة ( جسمه مش رفيع الرفع الوحش ) ولم تُزرِ به صُقلَة ( و مش تخين ) ، وسيمٌ قسيم ( جميل و وضيء ) ، في عينيه دَعَج ( يعنى سواد ) ..

وفي أشفاره وَطَف ( رموشه جميلة طويلة ) ، وفي صوته صحَل ( بحَّة و حُسن و جمال ) ، و في عنقه سَطع ( طول ) ، وفي لحيته كثاثة ( كثرة شعر ) ، أزَجُّ ( حواجبه طويلة و مقوسة ) ، إن صَمَتَ فعليه الوقار ، و إن تَكلم سما و علاهُ البهاء ، أجمل الناس و أبهاهم من بعيد ، و أحلاهم و أحسنهم من قريب ، حلوُ المنطق ( فصيح و حروفه واضحة ) ، فصل لا تذْر ولا هذَر ( كلامه فى النص لا بالقليل ولا بالكثير ) ، كأنَّ منطقه خرزات نظم يتحَدَّرن ( كلامه مسترسل و تحب تسمعه ) .. 

رَبعة لا يأس من طول ، ولا تقتَحِمُه عين من قِصر ( لا طويل و لا قصير ) ، غُصن بين غصين ( هو و أصحابه فيهم حسن و جمال ) ، فهو أنضَرُ الثلاثة منظراً ، وأحسنهم قَدرا ً، له رُفَقاء يَحُفون به ( له صحاب دايما حواليه .. يعنى فيه هيبة ) ،

إن قال أنصَتوا لقوله ، وإن أمَرَ تبادروا لأمره ، محشود محفود ( لو بس قال كلمة أطاعوه فورآ ) ، لا عابس ولا مُفَنَّد ( وشه مش مكشر ، وكلامه خالٍ من الخُرافة يعنى معقول فيه حكمة ) " ..

الله الله ❤ يا جمال سيدنا النبى ❤️

اللهم صل على أكمل و أجمل خلقك ..

اللهم نسألك رؤية النبى فى المنام 😢❤️🤲

 

و بعد ما سمع أبو مَعْبد الوصف ده راح قايل : " هو والله صاحب قريش الذي ذكر لنا من أمره ما ذكر بمكة ولقد هممت أن أصحبه ، ولأفعلن إن وجدت إلى ذلك سبيلاً

( ده هو ده اللى قريش بتتكلم عنه والله أنا كنت ناوى أروح معاه و أتبعه و والله نويت أتبعه ♡ ) ..

💢 النبى ﷺ بدأ يقترب من المدينة و يحصل شئ عظيم ربنا قدره شوفوا معايا حكمة ربنا عز وجل الرحيم الكريم ..

إيه اللى حصل ؟ 🤔

الزبير بن العوام يبقى راجع بقافلته من الشام إلى مكة فيقابل النبى ﷺ فى الطريق .. صدفة ♡ .. طبعاً مفيش صدف كل شئ مدبر بحكمة الله الحكيم ..

فيبدأ النبى ﷺ يحكى للزبير عن الهجرة من مكة للمدينة لأن الزبير مكنش يعرف شئ عن الهجرة ففرح الزبير جداً و يقدر ربنا أن نوع التجارة اللى راجع بيها الزبير تكون ملابس .. وكأن ربنا عز وجل لا يرضى لنبيه ﷺ أنه يدخل المدينة بلبس حالته بقت صعبة بسبب الرمال والسفر ، لإن الرسول ﷺ هاجر من مكة للمدينة فى 14 يوم فأراد الله أن النبى ﷺ يدخل على أهل المدينة ( الأنصار ) فى هيئة جميلة ❤️🤗

فيروح الزبير و يجيب ثلاث عبايات بيض جداد ولبسوا الهدوم و كملوا فى طريقهم للمدينة 😊..

💢 طيب إيه أخبار الصحابة اللى أتحركوا قبل النبى ﷺ للهجرة من مكة للمدينة ؟

الصحابة تعبانين مش بيناموا و لا قادرين ياكلوا و لا يشربوا من شدة القلق على النبى ﷺ لأن الطريق من مكة للمدينة ياخد أربع أيام بس لكن دلوقتى عدى 14 يوم والنبى ﷺ مجاش 😟✋

وكل يوم يقفوا يستنوا النبى ﷺ على باب المدينة لحد اليوم العاشر لحد ما جه سيدنا عليّ بن أبى طالب .. تخيلوا !!😔

سيدنا عليّ هاجر بعد النبى ﷺ

و هاجر أزاى عليّ ؟🤔

هاجر ماشى على رجله .. أصل كفار قريش أخدوا الناقة بتاعته و مرضيش يرجع لمكة .. لأنه خاف يتأخر عن رسول الله ﷺ ♡ ..كل اللى مسيطر عليه دلوقتى هو أنه يشوف النبى ﷺ بعينيه ❤️ فيقول عليّ رضي الله عنه :

" واصلت الليل بالنهار فكنت أركض وأجرى وأسقط وأنام وأقوم وأجرى وأسقط حتى وصلت إلى المدينة ، فقلت أين رسول الله " ، فقالوا : " لا ندرى " .. فبدأت الناس والنساء يبكوا ويقولوا : " مات رسول الله .. قتل رسول الله "

❤️صلى الله عليك ياخير خلق الله ❤️ 

نكمل بكرة إن شاء الله ❤

#كن_محمديا

👈لاتنسى الإعجاب بالصفحه ليصلك الحلقات الجديده 👍

#سيرة_النبيﷺ

💢💢💢💢💢💢💢💢💢💢💢💢

لمتابعه باقي الأجزاء