⃣ انوش ابن شيث عليه السلام
هو قوم سيدنا شيث هيكلموا قوم قابيل ولا هيسمعوا كلام شيث بقي !!؟
سيدنا شيث بعد موت سيدنا آدم فضل يقول للناس إنهم يسمعوا كلام ربنا ويعملوا أي حاجة يقول عليها ربنا،
والناس كانوا بيسمعوا كلام ربنا كله وماكانوش بيعبدوا أي حاجة غير ربنا.
سيدنا شيث كان عنده ولد صالح ومؤمن اسمه "أنوش".
سيدنا شيث قبل ما يموت وصّى أنوش وصية وقال له:
لما أموت علم الناس الخير وابعدهم عن الشر،
وعلمهم الحلال والحرام،
وعلمهم إزاي يسمعوا كلام ربنا.
سيدنا شيث عمل مع أنوش زي ما سيدنا آدم عمل معاه بالظبط.
ومات سيدنا شيث بعدها…
وكان عنده 912 سنة.
بعد ما مات سيدنا شيث، فضلوا الناس يسمعوا كلام أنوش،
وقالوا: محدش هيقرب من قابيل والناس اللي معاه، ولا يكلمهم، زي ما سيدنا شيث وأنوش قالولهم.
هل أنوش كان نبي؟
لأ… مكنش نبي،
أنوش كان بينفّذ وصية أبوه شيث وجده آدم إنه يعلم الناس الصح والغلط،
لحد ما ربنا هو اللي يختار مين النبي اللي هيجي بعده.
أنوش كان عنده أولاد:
"قينان" – "مهلاييل" – "يرد" – "إدريس".
أنوش قبل ما يموت وصّى أولاده بنفس وصية سيدنا شيث وسيدنا آدم.
لحد في يوم من الأيام…
واحد من عند سيدنا شيث سمع صوت احتفالات وزمامير من عند قابيل.
فراح من بعيد يبص عليهم، يشوف فيه إيه،
لقى بنات كتير متجمعين…
وقرب يشوف أكتر…
لقى بنات شكلهم جميل أوي، وبيضحكوا وبيغنّوا، ولابسين هدوم قصيرة، وبيرقصوا.
بنات شكلهم غير اللي في الجبال عند قوم شيث.
رجع الراجل بسرعة للجبال وقال لهم:
الحقوا… الحقوا…
أنا شوفت بنات جميلة أوي عند قوم قابيل، بيرقصوا وبيحتفلوا ولابسين قصير.
واحد منهم الكلام عجبُه…
ونسي كلام سيدنا شيث وأنوش…
وراح هو كمان يشوف البنات اللي هناك.
رجع قال لهم: البنات هناك جميلة أوي… أحلى من البنات اللي عندنا.
البنات عند قابيل كانوا أجمل من البنات عند أنوش،
والرجالة عند أنوش أجمل من الرجالة اللي عند قابيل.
فضلوا كل شوية واحد ورا واحد يروح عند قابيل عشان يتفرج على البنات.
لحد ما البنات هناك شافوهم وهما بيتفرجوا عليهم.
والبنات أعجبوا أوي بالرجالة اللي كل شوية يجوا.
وفي مرة البنات بدأوا يتكلموا مع الرجالة،
والاختلاط حصل،
والناس نسيت كلام سيدنا شيث وأنوش.
فضل الاختلاط يزيد…
لحد ما حصل بينهم "زِنى".
وكانت أول مرة يحصل فيها زنى في تاريخ البشر.
بدأ عدد الناس اللي من عند شيث يقل ويروح عند قابيل.
وانتشر الفساد،
وبقوا يقتلوا بعض،
ويعملوا كل حاجة تعصي ربنا.
بس هل ربنا هيسيبهم كده؟
لأ…
ربنا هيبعتلهم نبي،
يقول لهم الصح والغلط،
ويرجعهم يسمعوا كلام ربنا.
بس يا ترى مين النبي ده؟
تعليقات
إرسال تعليق