شيث عليه السلام
سيدنا آدم هيحزن جدًا ويزعل أوي هو وستنا حواء على موت هابيل…
سيدنا آدم كان بيحب هابيل لأنه كان ابن صالح ومؤمن، وبيسمع كلامه وكلام ربنا، وبيعمل كل اللي سيدنا آدم علمهوله.
فضل سيدنا آدم زعلان أوي على موت هابيل…
لحد ما في يوم من الأيام حواء حملت وجابت ولد وبنت في بطن واحدة.
سيدنا آدم قال إن ربنا هيعوضه عن هابيل، وهيبعتله ولد يكون صالح ومؤمن…
فسمّى الولد "شيث".
شيث يعني "هبة الله"… عوض جميل من ربنا.
شيث كان بيسمع كلام سيدنا آدم وحواء.
وسيدنا آدم فضل يعلم شيث كل أوامر ربنا، وكل اللي ربنا علمه لآدم…
وعلّمه الأسماء اللي ربنا علمها له.
وكان بيعلمه ليه؟
عشان يعلم كل الناس اللي هتتولد من بعده.
عاش آدم سنين كتيييير…
وشاف أولاده وأولاد أولاده وأولاد أولادهم.
عاش حوالي ألف سنة.
كبر سيدنا آدم جدًا…
وقرب يموت، فوصّى شيث:
إنه يعلم الناس الخير، ويبعدهم عن الشر…
ويعلمهم يحبوا ربنا ويعبدوه، ويبعدوا عن الشيطان وميسمعوش كلامه.
لكن سيدنا آدم حذر شيث من حاجة…
ميقولش لقابيل إنه هيعلّم الناس الخير.
عشان قابيل كان حسود… وهيقول: "ليه هو؟ مش أنا؟"
وفي يوم… سيدنا آدم تعب جدًا،
وقال لأولاده إنه نفسه في فاكهة من الجنة.
راح أولاده يطلبوا فاكهة الجنة…
فقابلتهم الملائكة وسألتهم:
أنتم عايزين إيه؟
فقالوا: "أبونا تعبان ونفسه في فاكهة الجنة."
فالملائكة راحت لسيدنا آدم، وقعدت حواليه…
لحد ما مات سيدنا آدم.
﴿ثُمَّ اجْتَبَاهُ رَبُّهُ فَتَابَ عَلَيْهِ وَهَدَى﴾ طه 122
(ذكر توبة آدم واصطفاؤه)
والملايكة هي اللي دفنته.
فربنا جعل شيث نبي بعد آدم،
وكان يعلم الناس الخير وطاعة ربنا،
ويعلمهم الصح والغلط، والحلال والحرام.
وبعد سنة من موت سيدنا آدم… ماتت حواء.
شيث بنى الكعبة بالحجارة والطين، وفضل يعمل حج وعُمرة كتير في مكة.
(مع العلم أن بناء الكعبة في هذا الزمن مختلف فيه بين العلماء)( في خلاف بين العلماء عن مين اول من بني الكعبه منهم من قال الملائكه واخرين قالوا سيدنا آدم وسيدنا شيث وقول غير راجح انه سيدنا إبراهيم والله أعلم)
كان شيث وقومه ساكنين في الجبال…
وقابيل وقومه ساكنين في السهول.
وشيث قال لقومه:
ميختلطوش بقوم قابيل… ولا يقربوا منهم.
بس يا ترى هيسمعوا كلام شيث… ولا لأ؟
تعليقات
إرسال تعليق