يوسف عليه السلام 3

 1️⃣9️⃣

هو سيدنا يوسف كان جميل فعلاً!؟🤔😍

= لأ..

دة كان آية في الجمال ❤

وكان شبه مين 🤔

= جدته ،، السيدة سارة زوجة سيدنا إبراهيم ..

السيدة سارة كانت اجمل بنات حواء ❤

وكان سيدنا يوسف جميل زيها بالظبط ❤

كان اجمل شاب في زمانه❤ .

والبنات كانت بتعجب بيه ❤🤔

= كل الناس كانت بتعجب بيه وبجمال شكله وأخلاقه ❤

امال ايه اللي حصله في بيت عزيز مصر 🤔

زوجة العزيز الي أكرمه ورباه وعاش في بيته كل السنين دي ،، عجبها سيدنا يوسف 😊

عجبها جماله وكمال انسانيته خلتها تحاول تفتنه وتبقى عايزاه في الحرام 😠

حاولت كتيييير اوي تلمحله أنها معجبه بيه ..😠

بس سيدنا يوسف كان بيهرب منها ويتجاهل تلميحاتها الجريئة..

لحد ما زهقت من التلميحات ،، وبدأ الشيطان يلعب في دماغها !!

وقالت بدل ما هتلمحله هتصرحله " يعني هتتكلم بكل صراحة "

 فالصراحة دي وصلت معاها لقمة البجاحة وصارحته بحبها وحاولت تغريه بالقرب منها ..

قال يعني المرادي مايهربش 😠

وفي يوم من الايام قفلت الباب عليهم هما الاتنين وقالتله مش هتهرب مني المرادي !!!

 (وَرَاوَدَتْهُ الَّتِي هُوَ فِي بَيْتِهَا عَن نَّفْسِهِ وَغَلَّقَتِ الْأَبْوَابَ وَقَالَتْ هَيْتَ لَكَ)

سيدنا يوسف قالها :

أستعيذ بالله مينفعش أخون الراجل الي رباني ونجّاني من العبودية وأحسن تربيتي وحطني في احسن مكانة..

قَالَ مَعَاذَ اللَّهِ ۖ إِنَّهُ رَبِّي أَحْسَنَ مَثْوَايَ ۖ إِنَّهُ لَا يُفْلِحُ الظَّالِمُونَ)

مسمعتش كلامه وزادت برضو في الإغراء وقربت منه وحاولت تنفذ الي هي عايزاه😱

 (وَلَقَدْ هَمَّتْ بِهِ وَهَمَّ بِهَا لَوْلا أَن رَّأَى بُرْهَانَ رَبِّهِ) 

العلماء اختلفوا على إنها همّت بالمعصية, وإختلفوا على هو هـمّ بإيه ؟

فيه قال إنه همّ بيها يعني حاول يضربها

وفيه قال إنه همّ بالمعصية بس ماعملهاش , همّ بالمعصية "يعني مجرد نية" لأنه راجل مكتمل الرجولة وزيه زي أي راجل بتتحرك مشاعره لإغراء عظيم زي ده , لكنه ماعملهاش لأنه حط ربنا قدام عينه وإفتكر إنه بكده هيكون عمل ذنب كبير يتسببله في غضب ربنا عليه

وفيه قال إنه لولا انه عرف وأيقن ساعتها إن ده ابتلاء من ربنا كان ممكن يهمّ بيها بالمعصية .. 

وطبعا دة المقصود بـ( أن رأى برهان ربه) يعني عرف انه في ابتلاء ..

وطبعا اكتر اتفاق للعلماء و الأكثر منطقية ,,

ان ربنا بيقول لإبليس (إِنَّ عِبَادِي لَيْسَ لَكَ عَلَيْهِمْ سُلْطَانٌ) . 

وإبليس نفسه معترف (إلا عبادك منهم المخلَصين) 

وسيدنا يوسف كان من المخلَصين! .❤

 (كَذَلِكَ لِنَصْرِفَ عَنْهُ السُّوءَ وَالْفَحْشَاء إِنَّهُ مِنْ عِبَادِنَا الْمُخْلَصِينَ) 

يعني الشيطان أصلا مايقدرش يغوي يوسف ويقنعه بالمعصية ..

 بس مش معنى كدا ان سيدنا يوسف معندوش مشاعر رجولة ممكن تميل لإغراء زي دا

بالعكس ..دا إتعرّض لإغراء طويل بتلميحات وتصريحات من واحدة منصبها عالي وجمال وقاوم كل في سنين كتير ،،

 ده وكان كل شوية يغلب نفسه ويوثّق اليقين جوا قلبه ويصبّر نفسه بإن ده إبتلاء من ربنا ولازم يصبر ويبعد عن أي حاجة تغضب الله .❤❤

وكان سيدنا يوسف مخلص ومخانش ربنا أبدا وفضل على نهج أبائه وجدوده سيدنا يعقوب وإسحاق وإسماعيل وإبراهيم ..

سيدنا يوسف حَب يخلص من الموقف قبل ما يتطور أكتر ،،

فجري ناحية الباب و بيحاول يهرب منها ومن اغرائتها

لكنها ماسكتتش !

مسكت قميصه وحاولت تشده ناحيتها تاني فإتقطع القميص في ايديها من كتر هول الموقف والشد من الطرفين😱

وَاسْتَبَقَا الْبَابَ وَقَدَّتْ قَمِيصَهُ مِن دُبُرٍ وَأَلْفَيَا سَيِّدَهَا لَدَى الْبَابِ)

في اللحظة دي دخل العزيز! 😱

كيد النساء خلاها تبعد عن نفسها التهمة فوراً وتلزقها في سيدنا يوسف😠

قالت لجوزها تعمل إيه في اللي يحاول ينتهك حرمة بيتك ويتعدى على زوجتك! 

فإقترحت فوراً العقاب السريع الي يبعده عن القتل عشان خافت علي سيدنا يوسف 

المهم بس يربيه ويخليه ماينطقش بكلمة من الي حصل..

قالت لازم تسجنه أو تعذبه عشان يبقى عبرة لغيره 😠

 (قَالَتْ مَا جَزَاءُ مَنْ أَرَادَ بِأَهْلِكَ سُوءًا إِلَّا أَن يُسْجَنَ أَوْ عَذَابٌ أَلِيمٌ) 

سيدنا يوسف ما سكتش , ودافع عن نفسه وحاول يقول الي حصل , قال هي الي راودتني عن نفسي وحاولت تغويني

 (قَالَ هِيَ رَاوَدَتْنِي عَن نَّفْسِي)

 فوقف عزيز مصر مش عارف يصدق مين ولا يكذب مين !!

 يصدق زوجته الجميلة الحسناء ولا يصدق يوسف لي مشافش منه غير كل خير 🤔

فشهدوا واحد من أهل البيت 👌

[ فيه علماء قالوا انه راجل عجوز على الأرجح وعلماء تانيين قالوا طفل رضيع] 

قالهم إحنا نشوف قميصه إتقطع من فين , لو كان إتقطع من قدام يبقى هي الي كانت بتحاول تبعده عنها ،، معنى كدا ان كلامها هي الي صح وهو الي إعتدى عليها!

إنما لو كان إتقطع من ورا يبقى هي الي كانت بتشده من ظهره وإتقطع ومعنى كدا انه كان بيحاول يبعد ناحية الباب وفي الحالة دي يبقى كلامه هو الي صح

 (وَشَهِدَ شَاهِدٌ مِّنْ أَهْلِهَا إِن كَانَ قَمِيصُهُ قُدَّ مِن قُبُلٍ فَصَدَقَتْ وَهُوَ مِنَ الْكَاذِبِينَ * وَإِن كَانَ قَمِيصُهُ قُدَّ مِن دُبُرٍ فَكَذَبَتْ وَهُوَ مِنَ الصَّادِقِينَ )

فقعد العزيز يبص علي قميص يوسف لقاه مقطوع من الضهر😁 فتأكد أنها كدابة ويوسف هو اللي صااادق،،

 وظهر الحق وربنا أثبت برائته عن طريق حد من أهلها هي!

وإتأكد الزوج من خيانة زوجته , لكنه ما اتعصبش ولا اتنرفز ولا ضرب , ماعملش أي حاجة 😒

 أصل عادات وقيَم الطبقة الراقية الي هو كان من ضمنها ( بما إنه كان وزير) أجبرته على الإلتزام بالسكوت عشان الموضوع يعدّي وماتبقاش فضيحة !!

 فأخد الموضوع بلباقة لدرجة انه اتهم كيد النساء -عموماً- إن هو السبب في كل دا , وإكتفى بإنه قالها استغفري لذنبك!!

(فَلَمَّا رَأَى قَمِيصَهُ قُدَّ مِن دُبُرٍ قَالَ إِنَّهُ مِن كَيْدِكُنَّ إِنَّ كَيْدَكُنَّ عَظِيمٌ) وَاسْتَغْفِرِي لِذَنبِكِ ۖ إِنَّكِ كُنتِ مِنَ الْخَاطِئِينَ)

وبص ليوسف وقاله سيبك من الموضوع دا كأنه ماحصلش!!

 (يُوسُفُ أَعْرِضْ عَنْ هَذَا) 

عادي كدة !!!!!!!!

 اه ماهو دي اهتماماتهم في الطبقة دي , المحافظة على الظواهر ويهملوا الحاجات البسيطة دي ماتاخدش في بالك !

قفّل العزيز على الموضوع وطلب منهم انهم ينسوه من غير حتى ما يفصل بين زوجته وبين يوسف وإتهيأله إن كدا الموضوع هيموت ويتنسي ولا من شاف ولا من دِري 😒

لكن كان الوضع أصعب من كدا بكتير , ماهو قصر مليان خدم وخادمات ومستشارين!

إبتدا الخبر ينتشر , وفضل يتنقل بين الخدم لحد ماوصل للقصور اللي جنبهم ،فكان فضيحة مُسلية لستات الطبقة الراقية ،,

 ابتدوا يتكلموا عن زوجة العزيز ويقولوا شوفتي الي حصل! دي مفتونة بيه لدرجة انها عرضت نفسها عليه ! 😱

 (وَقَالَ نِسْوَةٌ فِي الْمَدِينَةِ امْرَأَتُ الْعَزِيزِ تُرَاوِدُ فَتَاهَا عَن نَّفْسِهِ ۖ قَدْ شَغَفَهَا حُبًّا ۖ إِنَّا لَنَرَاهَا فِي ضَلَالٍ مُّبِينٍ) .

الكلام كِتر وانتشر لحد ما وصل لزوجة العزيز إن الستات في المدينة بيتكلموا عنها كدا ماسكتتش !!

 ابتدا كيد النساء يشتغل تاني وقالت هخليهم يندموا على الي قالوه وأثبتلهم اني معذورة في حب يوسف😠

أمرت بتجهيز عزومة كبيــرة وفخمة ،،

 جهزت المكان ووضبت القعدة وحطت جنب كل مقعد سكينة حادة وتفاحة!!!

 (فَلَمَّا سَمِعَتْ بِمَكْرِهِنَّ أَرْسَلَتْ إِلَيْهِنَّ وَأَعْتَدَتْ لَهُنَّ مُتَّكَأً * وَآتَتْ كُلَّ وَاحِدَةٍ مِّنْهُنَّ سِكِّينًا)

عزمت كل الستات الي اتكلموا عليها و في عز ماهما مشغولين بتقطيع تفاحة ،،

 نادت سيدنا يوسف وقالتله أدخل عليهم !

ودخل سيدنا يوسف فأول ما شافوه إندهشوا من وسامته😊

 فمن غير ماياخدوا بالهم جرحوا ايديهم بالسكاكين الي ماسكينها 😱 قالوا إستحالة يكون دا إنسان دا أكيد ملك مكرّم..

 (وَقَالَتِ اخْرُجْ عَلَيْهِنَّ ۖ فَلَمَّا رَأَيْنَهُ أَكْبَرْنَهُ وَقَطَّعْنَ أَيْدِيَهُنَّ وَقُلْنَ حَاشَ لِلَّهِ مَا هَٰذَا بَشَرًا إِنْ هَٰذَا إِلَّا مَلَكٌ كَرِيمٌ) 

 

زوجة العزيز حست بالإنتصار والتشّفي فيهم بعد رد فعلهم دة!!! 

 فإبتدت تتكلم من غير اي كسوف قدام ستات زيها 

و تتفاخر قدامهم إنها هي الي يوسف في بيتها و قالتلهم هو ده بقى اللى أنتوا لمتونى إنى حاولت اعمل معاه الفاحشة !!! 

صحيح إنه رفضها في المرة الأولى لكن دا مايمنعش انها هتحاول تاني وتالت .😠. يا إما يوافق يا إما هتتسبب في سجنه 😠

 (قَالَتْ فَذَٰلِكُنَّ الَّذِي لُمْتُنَّنِي فِيهِ،، وَلَقَدْ رَاوَدتُّهُ عَن نَّفْسِهِ فَاسْتَعْصَمَ وَلَئِن لَّمْ يَفْعَلْ مَا آمُرُهُ لَيُسْجَنَنَّ وَلَيَكُونًا مِّنَ الصَّاغِرِينَ) 

الستات دول ماوقفوش عند الانبهار والانفتان بيه وبس !!

لا دول بقوا عايزين يغووه هما كمان 😱

.......... يتبع ان شاء الله ❤️ 

💥 ملحوظة ؛:

العلماء وضحوا اغلب الظن ان الست دي لما يوسف جه البيت وهو لسه صغير كانت هي في العشرينات وهو حوالي 12 سنة مثلا.. فلما كبر وابتدت تبان شخصيته وابتدا يكتمل جماله ووسامته بقت هي في التلاتينات وهو في العشرينات، فبقى هو في عز شبابه وهي في عز نضجها .. طبعاً الأرقام دي تقديرية،، والله أعلي وأعلم ❤

والجزء دة بالأخص من القصة فيه اختلافات واقاويل كتير من العلماء ،،

#سيدنا_يوسف ٣

#قصص_الأنبياء_بالعامية