السيره النبويه العطره 17

 

#السيرة_النبوية ❤️

👈اشتداد حصار قريش لبنى هاشم (قبيله النبي ﷺ )😔

👈انتهاء الحصار بعد ٣ سنوات بمعجزه إلهيه ✋

💢بعد ما قررت قريش أنها تحاصر بنى هاشم سواء كفار أو مسلمين و كان أصعب حاجة فى الحصار هو أن قريش شلت حركة البيع و الشراء و دا طبعاً معناه إن بنى هاشم معرضة أنهم يموتوا من الجوع رغم أنهم معاهم فلوس و فى منهم أغنياء لكن للأسف البيع و الشراء واقف.. و الحصار عمل مشكلة تانية كمان هي إن الإسلام تجمد لمدة 3 سنوات .. الدعوة واقفة و المسلمين نفس العدد مش بيزيدوا و فوق كل ده معرضين أنهم يموتوا 😢 والإسلام ينتهى ..

بنى هاشم هدفها حماية النبى ﷺ ✋

حماية واحد من قبيلتهم و أتمسكوا بهدفهم ده و فضلوا متحاصرين و كانوا مش بيقدروا يخرجوا أبدآ من الشِعب غير وقت الحج عشان قريش خافت على منظرها قدام القبائل التانية أنه يبان أنها حابسة بنى هاشم و منعاهم من الحج .. و كان النبى ﷺ يطلع وقت الحج يدعو إلى الله و الإسلام لكن محدش كان بيرضى يدخل الإسلام بسهولة ..

وكان يطلع ﷺ يثبت الصحابة و يطمنهم ، ما هو أصل الصحابة اللى مش من بنى هاشم قاعدين بعيد عن النبى ﷺ و معرضين للإضطهاد و المضايقات من قريش ..

و بعد وقت الحج يرجع النبى ﷺ و المسلمين اللى من بنى هاشم للشِعب و حصاره تانى .. و الحصار أشتد و بنى هاشم تعبت و الجو برد جداً ، الصحابة بيقولوا : " والله كنا نأكل ورق الشجر من الجوع حتى تقرحت أفواهنا .. ووالله كان صوت بكاء الصبى من شدة الجوع يصل إلى الحرم " ..

كانت الأم فى الحصار تجيب حصى و تحطه على النار و تعد تقلب .. و توهم الأطفال إن الأكل بيجهز لحد ما يناموا و زوجها كان يطلع يحاول يتكلم مع أى تاجر لعل قلبه يحن و يرضى أنه يبيعله أكل .. كان يجرى الصحابى على التاجر و يقوله : " أقسمت عليك أن تبيع لى الطعام بأى ثمن "..

و يرفض التاجر .. فيقول له : " أقسمت عليك .. أما تسمع بكاء الأولاد !! 😢 " ..

فالبائع يتحرك قلبه ولسه هيدى للصحابى أكل ، تقوم تحصل مشكلة .. إيه هي ؟🤔

 قريش لها عين فى كل مكان ... و فى نفس اللحظة أبو لهب يبقى موجود و يقول : " يا هذا .. ماذا تفعل ؟ "..

فيقول التاجر : " لا شئ " ..

فيقول أبو لهب : " أتبيع له ؟!! "... فيقول التاجر : " لا ..لا "

فيقول أبو لهب : " أياك أياك .. أنسيت الصحيفة ؟ " ( يقصد الورقة المختومة اللى متعلقة على الكعبة ) ..

فيقول التاجر : " لا أنساها " ، ويوصيه أبو لهب أنه ميبعش أبدآ لبنى هاشم و يوعده بإنه هيديله أضعاف أضعاف المال اللى كان هياخده لو باع ..

فيقول البائع للصحابى : " أعزرنى لا أستطيع أن أبيع لك " ..

فيمشى الصحابى و يرجع أيده فاضية و يدخل و هو بيبكى ، فتقول الزوجة القوية : " لا عليك .. لا عليك ".. و تهدى الأطفال لحد ما يناموا .. و يستحمل الصحابة و رغم العذاب ده ، مفيش حد مسلم أو كافر من بنى هاشم أتخلى عن النبى ﷺ .. الصحابى متمسك بالدين و الكافر متمسك بالحمية القبيلية .. ✋✋

💢طيب فين سيدتنا خديجة بنت خويلد رضي الله عنها دلوقتى ( زوجة النبى ﷺ ) ؟

خديجة معاهم فى الحصار .. و عمرها 63 سنة .. فرجال قريش يبعتوا حد يقولها : " يا خديجة أنت من شرفاء مكة لا تبقى فى الشِعب أبقى على دينك الإسلام ولكن لا تبقى معهم ".. فتقول : " لا و الله إنى مع المسلمين " و تفضل مستحملة العذاب .. 

و مرة تانية بعتولها صينية أكل و يقولوا لها : " يا خديجة إذا أردتى أن تبقى معهم فلكى ما أردتى ولكن سنبعث لكى طعام كل ليلة " ، فتقول خديجة رضى الله عنها : " لا و الله لا نريد منكم شئ ".. و طبعاً هي بتتصرف كده عشان قريش متحسش أنهم كسروا النبى ﷺ و المسلمين.

💢واحد من الصحابة بيقول : " خرجت فى يوم أتبول فسمعت طأطأة لبولى على شئ فى الأرض ففرحت و قلت أنها تؤكل ( أفتكرها حاجة تتاكل وواقعة على الأرض ) " .. فيقول : " فتيممتها فإذا هى شحم بعير " ( عشان الدنيا ضلمة فمد أيده وحاول يدور عليها ع الأرض فلاقاها حتة دهنة أتبقت من أكلة جمل ) ، فبيقول : " فأمسكتها و غسلتها ووضعتها فى النار لأطهرها حتى أصبحت رماد , فجعلت أسفها " ( بيحاول ياكلها مكنتش بتتبلع ) .. و بيقول : " فشربت عليها الماء و بقيت عليها 3 أيام " ..

قد ايه الصحابه كانوا بيستحملوا و ياكلوا ورق الشجر وثبتوا على دينهم ( ده أحنا لو الأكل مش عاجبنا فى يوم أو 

لو مفيش فى الثلاجة اﻷكل اللى بنحبه بنزعل و نتقمص ^_^ .. و أحنا مش مطلوب مننا نتعب و لا نستحمل ناكل ورق شجر ..كل اللى مطلوب مننا أننا نثبت على صلاة الفجر و أننا نصبر على أهلنا و نبرهم .. الكافر من بنى هاشم تعب و أستحمل الحصار و ثبت عشان الرسول ﷺ و أحنا مش قادرين نثبت على الحجاب أو الصلاة رغم أننا مؤمنين أنها حق ربنا علينا 😞 ) ..

💢الحصار شديد ✋😔.. طيب ليه ربنا ساب النبى ﷺ والصحابة فى المحنة دى! 

ليه هتستمر المعاناة فى الحصار 3 سنين !؟

بصوا ربنا فى الآخر هيخلى الحصار يتفك ،بس ربنا أراد إن النبى ﷺ و الصحابة يتعبوا شوية عشانى و عشانك عشان نحس و نشوف أد أيه الرسول ﷺ و الصحابة تعبوا عشان الدين يوصل لنا ... و عشان لما نشوف معاناة النبى ﷺ والصحابة ، ننط من على السرير و نقوم نصلى الفجر و نقول تعبك و شقاك مرحش هدر يا رسول الله 👌❤️ ) .

المهم فين أبو طالب عم رسول الله ﷺ دلوقتى ؟

أبو طالب عنده حوالى 80 سنة و بياكل ورق شجر و كل ليلة يروح للنبى ﷺ في عز نومه يصحيه و يقول له : " قم معى يا محمد " فياخده و يوديه خيمة تانية و ياخد الراجل اللى فى الخيمة يوديه مكان النبى ﷺ ..

والنبى ﷺ ينام و بعد شوية يقوم أبو طالب جى تانى ويقوله : " قم معى يا محمد " و ياخده و يبدل مكان النبى ﷺ بمكان الراجل التانى .. طيب ليه أبو طالب بيعمل كده ؟

أصل أبو طالب خايف جداً على النبى ﷺ فخايف حد يحدد مكان النبي ﷺ ويخطط يقتله والناس نايمة .. فكان الكل ينام إلا أبو طالب ✋ ..

❤️❤️❤️❤️❤️صلوا على النبي ❤️❤️❤️❤️❤️

💢المهم هيفضل الحصار لمدة 3 سنين .. قريش زهقت و المسلمين مش بيستسلموا .. و أبو جهل كان بيحاول يخلى قريش تثبت على موقفها من بنى هاشم و الإسلام .. ويستمر الحصار لحد ما ربنا سبحانه و تعالى يسخر للمسلمين بنى آدم أسمه " هشام بن عمرو " ده واحد من الكفار بس مكنش قادر يتحمل بكاء الأطفال أكثر من كدة ..

هشام بن عمرو كان ياخد الجمل بتاعه ويحط عليه غطا و أكل و شرب كتيييير و يروح بالليل و الناس نايمة عند الشعب المحاصر و يقف بالجمل قدام الشعب و يزق الجمل ، فالجمل يجرى و يدخل لوحده جو الشعب و بنى هاشم و الصحابة يفرحوا أوووى و ياكلوا و يشربوا .. و يعدى يومين تلاتة و يعمل هشام بن عمرو نفس الحاجة و بنى هاشم مش عارفين مين اللى بيبعت الجمل بالأكل ..

و بعد مرة و الثانية و الثالثة ، قريش رصدت الموضوع و مسكوا هشام بن عمرو ؟ و قالوا له : " يا هشام أأسلمت ".. فيقول : " لا و الله "..

فيقول أبو لهب : " تبآ لك .. فلما تفعل هذا ؟ "

فيرد هشام و يقول : " و الله لا أحتمل سماع بكاء الصبيان .. فلا أصيب طعام " ( مش قادر أحط لقمة فى بقى و أنا سامع أطفال بتصرخ من الجوع ) ،

ويقول : " صبيان بنو هاشم يموتون جوعاً يا معشر قريش رحمآ " ( ما هما فى الآخر قرشيين ومننا ) ..

فيقولوا له : " يا هشام لإن عدت إلى هذا لنقاتلنك "..

فيقول هشام : " لن أعد ".. و يعدى يومين ثلاثة و يعمل هشام نفس الحاجة ^_^ فيتقبض عليه ويروح قايل لهم : " سامحونى لن أعد .. لن أعد "..

و يكرر هشام نفس الحاجة و يتقبض عليه لكن هينضرب المرة دى ضرب عنيف جداً لدرجة أنه هيقع و يغمى عليه ..

و بعد ما فاق راح لواحد صاحبه أسمه " زهير بن أمية " فيقول له : " يا زهير أيرضيك أننا ناكل و نشرب و تموت بنى هاشم من الجوع ؟ ".. فقاله : " لا يرضينى " ..

فقال هشام : " إذا فلماذا نحن صامتون " ..

فقال زهير : " وماذا نفعل فأبو جهل والوثيقة ".

فقال هشام : " نعترض "..

فزهير قال : " لأ .. إننا أثنين لابد أن نصبح جمع ".

فرد هشام و قال : " سأفعل " ..و يروح يخبط على واحد تانى أسمه " زمعة بن الأسود " يفتح زمعة .. وهشام يقوله نفس الكلام فيوافق زمعة و يقوله لازم نكون مجموعة .. فيخرج هشام و يروح لواحد أسمه " المطعم بن عدى " .. ويوافق .. ويروح لواحد خامس أسمه " أبو البخترى بن هشام " و يوافق و يقول لهشام بس أحنا أتنين ..

فيرد هشام يقوله لأ أحنا خمسة .. و بعد ما " هشام بن عمرو " جمع 4 أشخاص تانى يوم الصبح راحوا كلهم عند الحرم وأتفقوا يوقفوا متفرقين يعنى كل واحد فى ناحية عشان يبان أنهم مش سوا ..

و فجأة وقف هشام بن عمرو وقال : " أيها الناس هذه صحيفة ظالمة إلى متى نأكل و نشرب و تموت بنى هاشم .. أليسوا من أمتنا ؟ "..

فيرد عليه واحد من ال 4 واقف على اليمين و يقول : " صدقت " ، و يرد الثانى يقول : " بلى من أمتنا "..

و التالي يقول : " صدقت " .. هما بيعملوا أيه ^_^ ؟

هما بيعملوا رأى عام ، كأن كذا حد رافض الوثيقة الظالمة ..

فيبص لهم أبو جهل و يقول : " والله هذا أمر سويتموه بالأمس " ( هو حس إن دول ناس متفقين بس خلاص الناس أجتمعوا و بدأت تقول هذه الوثيقة ظالمة .. ظالمة )

وفى وسط الحصار ينزل سيدنا جبريل على النبى ﷺ و يقول : " يا محمد إن الله قد سلط الأردة ( يعنى الدودة ) على الصحيفة فأكلت كل البغى ( الظلم ) الذى فيها إلا كلمة " بأسمك اللهم " ..

و يقول النبى ﷺ الكلام ده لعمه أبو طالب ..فيروح أبو طالب و يقول : " يا معشر قريش إن ابن أخى أخبرنى أن ربه قد سلط " الأردة " ( الدودة ) على الصحيفة فأكلت كل البغى الذى فيها إلا كلمة " بأسمك اللهم " و يا معشر قريش أفتحوا الكعبة و أنظروا إلى الصحيفة فإن كان محمد صادقآ فأنتهوا عن المقاطعة و الحصار وإن كان كاذبآ نسلمكم " محمد " .. فقالت قريش : " صدقت يا أبا طالب " ..

و وافقوا و فعلاً راحوا يفتحوا الكعبة و يبصوا على الصحيفة فيلاقوا الدود بياكل فى الصحيفة و يمشى و يمشى لحد ما يجى عند كلمة " بأسمك اللهم " يقوم سايبها .. و لافف حولها و يكمل و يأكل و يوصل عندها تانى فيعديها تانى ..

فقريش أتصدمت و قالت : " هذا من سحر محمد ".. فقال أبو طالب : " صدق ابن أخى .. فلتنتهى هذه المقاطعة !!! "

و تخلص المقاطعة و ينفك الحصار ..

قال تعالى : { وَمَا يَعْلَمُ جُنُودَ رَبِّكَ إِلَّا هُوَ } .. سبحان الله كأن ربنا رايد يقول لنا أنا أقدر بدودة أعمل اللى جيش كبير مايقدرش يعمله ،

و بعد ما أتفك الحصار الحمدلله .. حصل شئ لا عالبال ولا عالخاطر 😞 .. حصل إيه ؟ ..

هنعرف بكره ان شاء الله

#كن_محمديا

👈لاتنسى الإعجاب بالصفحه ليصلك الحلقات الجديده 👍

#سيرة_النبيﷺ

💢💢💢💢💢💢💢💢💢

لمتابعه باقي الأجزاء