السيره النبويه العطره 1️⃣5️⃣

 

#السيرة_النبوية ❤️

👈هجرة المسلمين للحبشة وعوده بعضهم ✋

👈معجزه النبي ﷺ مع عثمان بن مظعون ❤️

👈مكيده قريش بإرسال عمرو بن العاص للنجاشي 👌

💢أتكلمنا المرة اللى فاتت عن التوقيت اللى نزلت فيه سورة مريم .. وكان ده مهم جداً لأن أهل الحبشة كلهم مسيحين فربنا عز وجل لازم يثقف الصحابة بالديانة المسيحية ، فتنزل سورة مريم عشان تعلمهم إزاي يدعو للإسلام هناك ، قال تعالى :

{ وَقَالُوا اتَّخَذَ الرَّحْمَٰنُ وَلَدًا * لَّقَدْ جِئْتُمْ شَيْئًا إِدًّا * تَكَادُ السَّمَاوَاتُ يَتَفَطَّرْنَ مِنْهُ وَتَنشَقُّ الْأَرْضُ وَتَخِرُّ الْجِبَالُ هَدًّا * أن دَعَوْا لِلرَّحْمَٰنِ وَلدا * وَمَا يَنبَغِي لِلرَّحْمَٰنِ أَن يَتَّخِذَ وَلَدًا } ..

ويبدأ الصحابة يستعدوا للهجرة فى سرية تامة وصلوا لحد شط البحر و تعدى سفينة تجارية كأن ربنا بعتهالهم و يركبوها .. أصلها كانت رايحة الحبشة للتجارة ، و فجأة أنتبهت قريش لهجرة الصحابة لكن كانت خلاص السفينة فى عرض البحر ..🤗

💢الحمدلله .. دلوقتى الصحابة وصلوا الحبشة و يستقبلهم النجاشي " ملك الحبشة " بإستقبال جميل و يعيشوا في أمان و قريش تبقى متغاظة ، فتبدأ تضاعف العذاب على الصحابة اللى تحت إيديها فى مكة .. و بعد هجرة الصحابة بأيام .. يخرج سيدنا النبي ﷺ و يروح الحرم و يقرأ سورة النجم فقريش أتلمت حواليه و يبدأ يقرأ :

 { وَالنَّجْمِ إِذَا هَوَى ٰ* مَا ضَلَّ صَاحِبُكُمْ وَمَا غَوَى ٰ* وَمَا يَنطِقُ عَنِ الْهَوَى إِنْ هُوَ إِلَّا وَحْيٌ يُوحَى ٰ* عَلَّمَهُ شَدِيدُ الْقُوَىٰ }

فكل قريش ساكتة و بتسمع لحد ما يوصل عند آخر الآيات و يقول : { أفَمِنْ هَٰذَا الْحَدِيثِ تَعْجَبُون * َوَتَضْحَكُونَ وَلَا تَبْكُون * َوَأَنتُمْ سَامِدُون * َفَاسْجُدُوا لِلَّهِ وَاعْبُدُوا } ..

و هنا في سجدة فيقوم النبي ﷺ ساجد .. و أول ما النبي ﷺ رفع رأسه من السجدة .. عارفين لقى إيه ؟🤔

لقى قريش كلها ساجدة وراه ^_^ ، قريش سجدت من قوة القرآن .. و بسرعة ينتشر فى كل البلاد إن قريش أسلمت .. 

و تنزعج قريش و بسرعة تعمل إجتماع فى دار الندوة ، بيحاولوا يفكروا فى حاجة يقولوها للناس تبرر سجودهم ده ، فقرروا يقولوا أصل محمد قال بيت شعر بيمدح فيه الآلهة بتاعتنا فأحنا قمنا سجدنا للآلهة .. و راحت قريش مألفة بيت شعر يليق على وزن الآيات القرآنية و قالت بيت على الآية والنجم إذا هوى " تلك الغرانيق العلا ، و إن شفاعتهن لترتجى " ( الغرانيق يعنى الآلهة ) ..

💢 بس فى مشكلة كبيرة دلوقتى ، المشكلة هي إن إشاعة إسلام قريش كانت جامدة أوى وللأسف وصلت للحبشة ✋

و قريش ساعدت فى ده عشان الصحابة في الحبشة يطمنوا و يرجعوا لمكة ، و فعلاً الصحابة أفتكروا أن قريش أسلمت والصحابة كانوا متأثرين جداً لفراق النبي ﷺ فمن فرحتهم مابعتوش للنبي ﷺ عشان يتأكدوا من الكلام ده وبسرعة قرروا يرجعوا .. و للأسف لاقوا قريش متربصة لهم على أبواب مكة و من ضمن الناس اللي كانت داخلة صحابى أسمه " عثمان بن مظعون " عثمان شايف كل اللي بيدخل بيتقبض عليه و يتكتف بالحديد ..

فعثمان خاف و أترعب فبدأ يجري بضهره فمسكه " الوليد بن المغيرة " وقال : " يا عثمان لا ترجع .. أدخل إلى بلدك فإنك رجل عزيز و إنك في جواري لا يؤذيك أحد "، وراح الوليد معلى صوته و قايل : " يا معشر قريش عثمان بن مظعون في جواري لا يؤذيه أحد و لا يسبه أحد " ،

يقول عثمان : " فأنطلقت في طرقات مكة فهذا يضرب أمامى و هذا يجلد و هذا يسحل ، فقلت : أيفعل هذا بأصحاب محمد و أنا سليم معافى " ..

فراح للوليد بن المغيرة و قال له : " يا أبا عمارة رددت عليك جوارك " فقال الوليد : " يا بني هل أذاك أحد ! " ،

قال : " لا " ، قال : " هل سبك أحد "، قال : " لا "

فقال الوليد : " فلما ترد علي جواري ؟ " ..

فقال عثمان : " وجدت جوار من هو أعز منك ". 

فقال : " من ؟ " ، قال عثمان : " جوار الله عز و جل ". فضحك الوليد و قال : " يا بن أخي سنرى ما سيحدث لك ". 

فراح عثمان عند الحرم لقى أهل قريش قاعدين و بيسمعوا لشاعر أسمه " لبيب " و واقف يقول أبيات شعر .. والعرب عندهم لما الشاعر يتكلم عيب أن حد يقاطعه ،

فيقول لبيب : " ألا كل شئ ما خلا الله باطل " ،

فراح عثمان قايل : " صدقت " ..

فبصله لبيب و كمل و قال : " و كل نعيم لا محال زائل " .. فراح عثمان مقاطعه و قايل : " كذبت بل نعيم الجنة لا ينفذ أبدآ "..

فقال لبيب : " يا معشر قريش منذ متى يهان الشعراء في دياركم ؟ " ، فقالوا : " هو في جوار الوليد " ،

فقال عثمان : " رددت علي الوليد جواره " فراحوا قايمين عليه و ضربوه ضرب جامد أوى لحد ما فقعوا عينه اليمين .. فمر الوليد و راح قايل : " أرأيت يا بن أخي جوارك ! كنت في جوار عزيز " ،

فقال عثمان : " كذبت يا عدو الله بل أنا في جوار الله عز و جل و إن عيني السليمة مشتاقة لما حدث لأختها " ..

فالنبي ﷺ توصله الأخبار دى فيسأل و يقول : " أين عثمان بن مظعون ؟ " ..

فيحملوه الصحابة و يوصل عثمان لرسول الله ﷺ. 

فبيحكى عثمان و يقول : " فوضع النبى ﷺ رأسي في حجره الشريف و ظل يمسح على رأسي و تمنيت ألا أبرأ حتى لا أقوم من حجره ( أتمنى يفضل تعبان ♡ ) ،

فجعل النبى ﷺ يتفل ( ذرات مايه من فمه الشريف ) و يمسح على عيني و يقول : اللهم أشفي عثمان .. فبيقول عثمان : و الله قمت بعدها ، لا أدري أيتهما كانت المصابة "..

أحسنت الجوار يا عثمان جوار الله عز وجل ❤️❤️

(يابختك ياسيدنا عثمان. واحنا عملنا ايه للدين علشان نقابل بيه رسول الله صلى الله عليه 😢)

 ❤️❤️❤️❤️❤️صلوا على النبي ❤️❤️❤️❤️❤️

💢 قريش بتعذب المسلمين و مش سيباهم .. الصحابة لازم يهاجروا تانى .. بس المرة دي 82 صحابي هيهاجروا ونزود عليهم الصحابة ال 18 اللى هاجروا الهجرة الأولانية يبقى عددهم كلهم 100 صحابى هيبقوا فى الحبشة ..

و من تاني و في نص الليل هيهاجروا و قريش هتنتبه لهم المرة دى ولكن من رحمة ربنا ، قريش مقدرتش تلحقهم .. و الحمد لله دلوقتى الصحابة وصلوا الحبشة و " النجاشي " ملك الحبشة عاملهم أحسن معاملة 🤗

لكن قريش مش هتسكت .. قريش فكرت فى مكيدة .. قريش بعتت " عمرو بن العاص " ( قبل إسلامه ^_^ ) للحبشة لإنه صديق مقرب للنجاشي و خد معاه هدايا و فلوس كتيرة و هوه داخل الحبشة فضل يوزع الهدايا و الفلوس على حاشية الملك .. لحد ما وصل للملك و طبعاً الملك له هدية كبيرة جداً .. طيب و ليه كل ده ؟ ..

عشان يخلي الملك يقبل يسلم المسلمين و يرجعوا لمكة و لأيد قريش مرة تانية .. فيروح عمرو بن العاص و خد معاه " عبد الله بن أبي ربيعة " و دخلوا القصر فيرحب بيهم النجاشى ( ملك الحبشة )..

فعمرو يقول : " أيها الملك جاء إليك غلمان من عندنا سفهاء فارقوا دينهم و تركوا أبائهم و سبوا آلهتنا و عابوا ديننا و لم يدخلوا في دينك و تركوا أبائهم يبكون عليهم و جاءوا إليك .. و بعثني إليك أبائهم و أعمامهم لتردهم إليهم ، فردهم معي أيها الملك " ،

فيقول النجاشي : " لا يا عمرو حتى أسمع منهم " ✋

فيستدعى النجاشى الصحابة ..

فالصحابة بيقولوا أن لما وصل لهم الإستدعاء خافوا لكن رغم كده أتفقوا أنهم مش هيقولوا غير الصدق و بيحكى الصحابة و بيقولوا : " فذهبنا للقصر فلما وجدنا عمرو بن العاص بجانب النجاشى قلنا هلكنا و رب الكعبة 😢 " ..

و أول ما شفهم النجاشى سألهم : " أيها الناس جئتم إلى بلادي و تركتم دين قومكم و لم تدخلوا في ديني ، فما الذي جاء بكم و ما تريدون و ما هذا الدين الذي أتبعتموه ؟ ..

💢طيب دلوقتي الصحابة مخضوضين و مش محضرين ردود ، و لازم اللى هيتكلم يرد في وقت قصير و بطريقة لبقة و يتكلم عن الإسلام و من غير ما ينتقص من الدين المسيحي ، فيتقدم مين عشان يرد على النجاشى نيابة عن الصحابة ؟ .. سيدنا " جعفر بن أبي طالب " و يطلع لقدام خطوتين و يلخص الإسلام في دقيقتين و يقول :

" يا أيها الملك كنا قوم نعبد الأصنام و نأكل الميتة و نسئ الجوار و يأكل القوي منا الضعيف و نقطع الرحم و نأكل مال اليتيم فكنا على ذلك .. حتى بعث الله منا رسولآ نعرف نسبه و صدقه و عفافه و أمانته فدعانا إلى عبادة الله وحده لا شريك له و ترك الأصنام و حسن الجوار و صلة الرحم و الكف عن المحارم و الدماء و أمرنا بالصدق و الصلاة .. فأمنا برسول الله عليه الصلاة و السلام و أتبعناه و حرمنا ما حرم علينا و أحللنا ما أحل لنا .. و بسبب ذلك تعرضنا للإيذاء من قومنا فقهرونا و عذبونا و ضربونا .. فأنطلقنا إلى بلادك و أخترناك على من سواك و قال لنا نبينا : " أذهبوا إلى أرض الحبشة فإن بها ملك لا يظلم عنده أحد .. فجئنا إليك أيها الملك و نرجوا ألا نظلم عندك " ..

فالنجاشى عجبه الكلام فيقول له : " يا جعفر هل معك شئ مما نزل على نبيك " ، قال : " أجل "..

فقال : " أقرأ علي :) " ، فقرأ جعفر " سورة مريم " : { كهيعص * ذِكْرُ رَحْمَتِ رَبِّكَ عَبْدَهُ زَكَرِيَّا * إِذْ نَادَىٰ رَبَّهُ نِدَاءً خَفِيًّا * قَالَ رَبِّ إِنِّي وَهَنَ الْعَظْمُ مِنِّي وَاشْتَعَلَ الرَّأْسُ شَيْبًا وَلَمْ أَكُن بِدُعَائِكَ رَبِّ شَقِيًّا } .. و يقرأ لحد ما يوصل لآية : { وَاذْكُرْ فِي الْكِتَابِ مَرْيَمَ إِذِ انتَبَذَتْ مِنْ أَهْلِهَا مَكَانًا شَرْقِيًّا * فَاتَّخَذَتْ مِن دُونِهِمْ حِجَابًا فَأَرْسَلْنَا إِلَيْهَا رُوحَنَا فَتَمَثَّلَ لَهَا بَشَرًا سَوِيًّا * قَالَتْ إِنِّي أَعُوذُ بِالرَّحْمَٰنِ مِنكَ إِن كُنتَ تَقِيًّا * قَالَ إِنَّمَا أَنَا رَسُولُ رَبِّكِ لِأَهَبَ لَكِ غُلَامًا زَكِيًّا } ..

و يكمل الآيات لحد نهاية سورة مريم .. و أول ما جعفر خلص كلام ، لقى النجاشي عيونه بتنزل منها الدموع و راح باصص لجعفر وقايل : " والله هذا الذي قلت ( القرآن ) و الذي جاء به عيسى ليخرجان من مشكاة واحدة " ،

وبص لعمرو بن العاص و عبد الله بن ربيعة و قال " أخرجا فلن أرد معكم أحد إلى مكة " ..

💢 الحمد لله عدت على خير ومشى جعفر و الصحابة و غضب عمرو بن العاص غضب شديد و قال لعبد الله بن ربيعة سنظل ليلة آخرى في الحبشة وسأرجع غدا فوالله لأستأصل أصحاب محمد " ..

فقال عبد الله : " لا تفعل يا عمرو فإن لهم رحماً " ( عبد الله مش عجبه الكلام و أتأثر أوى و صعبوا عليه ) فعمرو أصر.

و فعلاً تاني يوم راح عمرو للنجاشي و قال له : " أيها الملك إن هؤلاء يقولون في عيسى بن مريم قولاً عظيماً " ( و النجاشي يؤمن بسيدنا عيسى ) ، فقال : " ماذا يقولون ؟ " ، فقال عمرو : " لا أستطيع أن أقول ".. فغضب النجاشي و أستدعى المسلمين ..

فلما جم .. قال النجاشي : " يا جعفر يقول عمرو أن نبيكم يقول في عيسى بن مريم قولاً عظيما ً، فما تقولون في عيسى بن مريم ؟ " ..

بيحكى جعفر و يقول فخفت ثم قررت قول الصدق و قلت : " أيها الملك عيسى بن مريم هو عبد الله و رسوله ".. فالناس كلها سكتت و سكت النجاشي شوية كتير و راح ماسك عود من الأرض و راح قايل : " يا جعفر والله ما عادا عيسى بن مريم عن ما قلت هذا حتى أرادوا قتله " ( يعنى كلامك ده هو نفس اللى قالوا عيسى عشان كده اليهود كانوا عايزين يقتلوه ) و راح النجاشى مكمل كلامه و قايل : " يا جعفر بن أبى طالب أنتم آمنون في أرضي من سبكم غرم ( اللي هيأذيكم هيتأذى ) أذهب يا جعفر أنتم آمنون في أرضي .. و يا عمرو بن العاص خذ هداياك و أموالك فلا حاجة لي فيها هم و الله في حمايتى أبداً ما حييت "..

و رجع عمرو بن العاص و عبد الله بن ربيعة لمكة و فشلت مكيدة قريش ✋ .. 

نكمل بكرة إن شاء الله ❤

#كن_محمديا

👈لاتنسى الإعجاب بالصفحه ليصلك الحلقات الجديده 👍

👈هذة الحلقات نقلا عن أستاذة نورهان الشيخ

#سيرة_النبيﷺ

💢💢💢💢💢💢💢💢💢

لمتابعه باقي الأجزاء

السيره النبويه العطره 1

https://qesas-allamtny.blogspot.com/2025/12/1

.html

السيره النبويه العطره 2

https://qesas-allamtny.blogspot.com/2025/12/2_9.html

السيره النبويه العطره 3

https://qesas-allamtny.blogspot.com/2025/12/blog-post_10.html

السيره النبويه العطره 4

https://qesas-allamtny.blogspot.com/2025/12/blog-post_11.html

السيره النبويه العطره 5

https://qesas-allamtny.blogspot.com/2025/12/5.html

السيره النبويه العطره 6

https://qesas-allamtny.blogspot.com/2025/12/blog-post_646.html

السيره النبويه العطره 7

https://qesas-allamtny.blogspot.com/2025/12/blog-post_975.html

السيره النبويه العطره 8

https://qesas-allamtny.blogspot.com/2025/12/blog-post_15.html

السيره النبويه العطره 9

https://qesas-allamtny.blogspot.com/2025/12/9_0843694798.html

السيره النبويه العطره 10

https://qesas-allamtny.blogspot.com/2025/12/10_01302236403.html

السيره النبويه العطره 11

https://qesas-allamtny.blogspot.com/2025/12/11.html

السيره النبويه العطره 12

https://qesas-allamtny.blogspot.com/2025/12/12.html

السيره النبويه العطره 13

https://qesas-allamtny.blogspot.com/2025/12/13.html

السيره النبويه العطره 14

https://qesas-allamtny.blogspot.com/2025/12/14.html